ماۋلەن اشىمبايەۆ ءوزىنىڭ فەيسبۋك پاراقشاسىندا جاماعاتتان ءسۇيىنشى سۇراي وتىرا، جاڭا تاعايىنداۋدى جاريا ەتتى دەپ حابارلايدى Qamshy.kz اقپارات اگەنتتىگى.
"بىلىكتى مامان، ءوز ءىسىنىڭ شەبەرى راۋان كەنجەحان ۇلى «نۇر وتان» پارتياسى ءتوراعاسىنىڭ ءبىرىنشى ورىنباسارىنىڭ كەڭەسشىسى بولىپ تاعايىندالدى.
راۋان كوپشىلىككە بەلگىلى جۋرناليست، قوعام قايراتكەرى، كوپتەگەن جوبالاردىڭ اۆتورى رەتىندە جاقسى تانىمال. ونىڭ باستاماسىمەن جۇزەگە اسىرىلعان جوبالار قازاقستاندىقتاردىڭ زياتكەرلىك الەۋەتىن ارتتىرىپ، وتاندىق ءبىلىم سالاسىنىڭ جاڭا ۇردىستەرگە ساي دامۋىنا جول اشتى. سونداي-اق راۋان كەنجەحان ۇلى ايگىلى ۆيكيپەديانى قازاقشا سويلەتىپ، انا ءتىلىمىزدىڭ اياسىن كەڭەيتۋگە ۇلكەن ۇلەس قوستى. قازاق ءتىلىنىڭ Google اۋدارما جۇيەسىنە ەنگىزىلۋىنە دە سىڭىرگەن ەڭبەگى زور.
راۋان مەملەكەتتىك قىزمەتتە دە ءوزىن جاقسى قىرىنان كورسەتىپ، مول تاجىريبە جينادى. قازىرگى تاڭدا ول ەلىمىزدىڭ رۋحاني ءومىرىن دامىتۋ جولىندا ايانباي ەڭبەك ەتىپ كەلەدى. «رۋحاني جاڭعىرۋ» باعدارلاماسى اياسىندا قولعا الىنعان «قازاق تىلىندەگى 100 جاڭا وقۋلىق» جوباسىن جۇزەگە اسىرۋدا راۋاننىڭ ەرەن ەڭبەگىن ەرەكشە اتاپ وتكەن ءجون. ول باسقاراتىن «ۇلتتىق اۋدارما بيۋروسى» ءساۋىر ايىندا جوبانىڭ العاشقى جەمىسى رەتىندە الەمنىڭ ەڭ ۇزدىك جوعارى وقۋ ورىندارىندا وقىتىلاتىن 18 وقۋلىقتى قازاق تىلىنە اۋدارعانىن جاقسى بىلەمىز. الداعى ۋاقىتتا دا راۋان رۋحاني جاڭعىرۋ اياسىنداعى جۇمىستاردى جالعاستىرىپ، ونىڭ باسشىلىعىمەن اۋدارما بيۋروسى مۇنداي وقۋلىقتاردىڭ قاتارىن تولىقتىرا تۇسەدى دەگەن ويدامىز جانە سوعان تىلەكتەسپىز.
سونىمەن قاتار راۋان كەنجەحان ۇلى باسقا دا تىڭ جوبالاردى پارتيا قاتارىندا ءجۇرىپ جۇزەگە اسىرادى دەپ سەنەمىز. ول ءۇشىن پارتيا جان-جاقتى قولداۋ كورسەتۋگە دايىن. سوندىقتان راۋانعا الداعى قىزمەتىنە تەك تابىس پەن ساتتىلىك تىلەيمىز!"
