اسەت يسەكەشيەۆ كوپتەگەن جۇمىستىڭ قولعا الىنىپ، بىرنەشە جىلدا قالانى سۋ باسۋعا قاتىستى ماسەلەلەردىڭ تولىقتاي شەشىلەتىنىن جەتكىزدى. سونداي-اق، ول وسى ماسەلەگە قاتىستى باقىتجان ساعىنتايەۆقا ۇسىنىس ايتتى، دەپ حابارلايدى Qamshy.kz اقپارات اگەنتتىگى Sputnik قازاقستانعا سىلتەمە جاساي وتىرىپ.

"2016 جىلعى ەلباسىنىڭ ءۇشجىلدىق تاپسىرماسىنا سايكەس، قۇبىر جۇيەسى جوندەلىپ جاتىر. ءقازىر بولىنگەن قاراجات ەسەبىنەن 2019 جىلى جۇيەنى تولىقتاي وزگەرتۋدى جوسپارلاپ وتىرمىز. اكىمدىك وتە ۇلكەن جۇمىس اتقاردى. بىلتىر تۇران — ۇلى دالا، 31 كوشە، كوكتال كەنتى، مىڭجىلدىق ساياجولى، س. سەيفۋللين كوشەلەرىنىڭ تازارتۋ قۇرىلىستارىن اياقتادىق. تازارتىلعان سۋلاردى ەسىل بەيسەكوۆا — قورعالجىن تاس جولى-پريگورودنىيعا اعىزۋ ءۇشىن 15 شاقىرىم كوللەكتوردى بۇراتىن تۇران-سىعاناق تازارتۋ قۇرىلعىلارىنىڭ رەكونسترۋكسياسى ءبىر جىل ىشىندە جەدەل قارقىنمەن اياقتالدى"، — دەدى استانا اكىمى ۇكىمەت وتىرىسى بارىسىندا.

سونداي-اق، اسەت يسەكەشيەۆ استانادا جاۋىن-شاشىن سۋىن كارىزگە بۇرىپ وتىرۋ جۇمىستارىن باقىلايتىن كاسىپورىن قۇرۋ جوسپاردا بار ەكەنىن ايتتى. كاسىپورىندى "استانا تازالىق" نەگىزىندە قۇرۋ كوزدەلگەن.

"سۋاعار جۇيەسىنىڭ جۇمىسىن ەكى ەسەگە ارتتىرۋعا كومەكتەسەتىن تەحنيكالىق مۇمكىندىكتەر بار. 2019 جىلى ولار تولىقتاي جۇزەگە اسىرىلادى. قاراجات ءبولىنىپ قويعاندىقتان شۇعىل جۇمىستار جۇرگىزىلىپ جاتىر. وسى ءۇش جىلدا نەگىزگى ماسەلەلەر شەشىلەتىن بولادى. كەشە قالا تۇرعىندارىن، راسىمەن، جايسىز جاعدايعا قالدىرعان ماسەلەگە كەلسەم، قازگيدرومەت مالىمەتى بويىنشا، 1،5 تاۋلىكتە جاۋىن-شاشىن مولشەرى 45 ميلليمەترگە دەيىن جەتكەن. ال ءبىر ايدا نورما بويىنشا 29 ميلليمەتر ءتۇسۋى ءتيىس. بۇل ءبىر ايلىق نورمادان ءبىر جارىم ەسەگە كوپ بولىپ وتىر"، — دەپ اقتالدى اسەت يسەكەشيەۆ.

ءارى قاراي قالا اكىمى پرەمەر-مينيسترگە ۇسىنىس ايتىپ، ونىڭ بۇل ماسەلەنى جۋىق ارادا شەشۋگە كومەكتەسەتىنىنە توقتالدى.

"باقىتجان ءابدىر ۇلى، ءقازىر تابيعي مونوپوليالار تۋرالى زاڭدا سۋاعارلار قىزمەتىنىڭ باعاسى بەلگىلەنبەگەن. ءبىز "استانا تازالىق" بازاسىندا سۋ اعاتىن كاناليزاسيا جۇيەسىن باقىلاۋدا ۇستاپ وتىراتىن كاسىپورىن قۇرۋدى جوسپارلاپ وتىرمىز. مينيسترلىككە تاپسىرما بەرسەڭىز، ءبىز ءبارىن جۇزەگە اسىراتىن بولامىز. "استانا تازالىقتى" جەكەشەلەندىرۋ باعدارلاماسىنان الىپ تاستاۋدى جوسپارلاپ وتىرمىز. كاسىپورىن تەك سۋاعار ماسەلەسىمەن جۇمىس ىستەيتىن بولادى"، — دەپ قورىتتى اكىم.