فەيسبۋك الەۋمەتتىك جەلىسىندە الماتىدا كۇنى كەشە ورىن العان وقيعانىڭ ۆيدەوسى تارادى. ءنومىرى 23 اۆتوبۋستىڭ جۇرگىزۋشىسى مۇمكىندىگى شەكتەۋلى بالاسى بار ايەلدى اۆتوبۋسقا كىرگىزبەي قويعان. ۋممۋ حاديجا ابدۋسامات دەگەن فەيسبۋك قولدانۋشىسىنىڭ تۇسىرگەن بۇل ۆيدەو حالىقتىڭ اشۋ-ىزاسىن تۋدىردى. قۇربان ايت كەزىندە ادامگەرشىلىك تانىتىپ، مەيىرىمدى بولۋعا ۇمتىلۋدىڭ ورنىنا قاتىگەزدىك تانىتقان اۆتوبۋس جۇرگىزۋشىنىڭ ءتيىستى جازالانۋىن سۇراۋدا. ۋممۋ حاديجا ابدۋساماتتىڭ بايلانىس ءنومىرىن تاۋىپ، سول كۇنگى وقيعانى ەگجەي-تەگجەيلى ايتىپ بەرۋىن سۇرادىق.

ء-وزىڭىزدى تانىستىرىپ وتسەڭىز. ۋممۋ حاديجا ابدۋسامات دەگەن ءسىزدىڭ شىن ەسىمىڭىز بە؟

– ءاتى-جونىم - ءلاززات قوزىبايەۆا. «حاديجا»، «ابدۋسامات» دەگەن بالالارىمنىڭ ەسىمدەرى. «ۋممۋ» دەگەن «انا»، «انامىن» دەگەن ماعىنا بىلدىرەدى. حاديجا مەن ابدۋساماتتىڭ اناسىمىن ياعني. جالپى، ءوزىمنىڭ ءۇش بالام بار. الماتى وبلىسى قاراساي اۋدانى اباي اۋىلىندا تۇرامىز.

-سول كۇنگى وقيعانى ەسكە الىڭىزشى. قايدا باعىت العان ەدىڭىز؟

– بۇل 20-تامىز كۇنگى وقيعا. ساعات 11-لەر شاماسى بولاتىن. ورتالىق مەشىتتى كومەك كورسەتەمىز دەپ شاقىرعان بولاتىن. ءوزىمنىڭ بالالارىمدى، كورشى ايەلدىڭ بالالارىن ەرتىپ العان ەدىم. جانىمدا مۇمكىندىگى شەكتەۋلى كورشى ايەل بولدى. بارلىق بازارىنان ورتالىق مەشىتكە باراتىن قوعامدىق كولىككە وتىرماقشى ەدىم. 11 اۆتوبۋستى كورمەگەن مەن 23 اۆتوبۋسقا كىرمەكشى بولدىم. ايالداماعا كەلىپ توقتاعان اۆتوبۋستىڭ ەسىگى اشىق بولدى. ءىشى تولعان ادام. مەنىڭ مۇمكىندىگى شەكتەۋلى بالامنان باسقا بارلىق بالالار كىرىپ ۇلگەرگەن بولاتىن. ەندىگى كەزەكتە كورشى ايەل كىرمەكشى ەدى. كەنەتتەن اۆتوبۋستىڭ ەسىگى جابىلا قالدى. مۇمكىندىگى شەكتەۋلى ايەلدىڭ اياعى قىسىلىپ قالدى.

-ەسكەرتپەستەن ەسىكتى جابۋىنا نە تۇرتكى بولدى؟ كوندۋكتور كومەككە كەلدى مە؟ كورشى ايەلدىڭ ءاتى-جونى كىم؟ ول كىسى ءقازىر قانداي جاعدايدا؟

– بالالاردىڭ اراسىندا مەكتەپ جاسىنا جەتپەگەن بالالار دا بار. ولارعا اقشا تولەنبەيدى عوي. مەكتەپكە باراتىن بالالار ءۇشىن قۇننىڭ جارتىسىن تولەيمىز. وسىنى العا تارتقان بولۋى كەرەك. ايتەۋىر قوعامدىق كولىككە ونىڭ كوزىنشە جاعدايى ناشار ءبىزدىڭ كىرۋىمىزگە قارسىلىق تانىتتى. كورشىمنىڭ ەسىمى توقشابايەۆا ۇلجالعاس. جاعدايى قالىپتى. ۇلجالعاستىڭ اياعى قىسىلىپ قالعاندا قاتتى قورىقتىم. كومەك سۇراپ، ايعايعا باستىم. كوندۋكتور كورىنبەدى.

-ەلەڭدەگەن بىرەۋ تابىلدى ما؟ اۆتوبۋستىڭ ءىشى لىق تولى دەدىڭىز.

– ءبارى تۇك بولماعانداي وتىرا بەردى، وكىنىشىمىزگە قاراي. مەن بولسام، اربادا وتىرعان بالاممەن شىر-پىر بولدىم. جۇرگىزۋشى ەسكەرتپەستەن ەسىكتى جابا سالعانىنا، ايەلدىڭ اياعىنا زاقىم كەلتىرە جازداعانىنا كەشىرىم سۇراماق تۇگىلى مەنىڭ بالاممەن ىشكە كىرۋىمە تىيىم سالدى.

– سول كەزدە ۇيالى تەلەفوننىڭ كومەگىنە جۇگىندىڭىز عوي؟

– امال جوق، ۆيدەونى قوستىم. قول-اياعىم دىرىلدەپ، بويىمدى شوك بيلەدى. سوندىقتان دا دۇرىستاپ تۇسىرە المادىم. نەگىزى، ادام سياقتى كەشىرىم سۇراسا، ارباعا تاعىلعان بالامدى جۇرتتىڭ كوزىنشە ءوزىنىڭ ىڭعايسىز سەزىنۋىنە جول بەرمەسە، مەن بۇل ۆيدەونى تۇسىرمەس ەدىم. عالامتورعا سالماس ەدىم. وسىنداي قادامعا بارۋىما ءوزى ءماجبۇر ەتتى. ايتپەسە، بەس ۋاقىت نامازىمدى قازا قىلمايتىن اداممىن. بىرەۋدىڭ الا ءجىبىن اتتامايتىن قازاقپىن. اۆتوبۋس جۇرگىزۋشىنىڭ قاتىگەزدىگى، دورەكىلىگى جۇرەگىم اۋىرتتى، كوڭىلىمە قاياۋ ءتۇسىردى.

– ارى قاراي وقيعا قالاي ءوربىدى؟

– كەنەتتەن كوندۋكتور پايدا بولدى. «ۆيدەو تۇسىرمەسەڭىز. بۇل اۆتوبۋسقا ەشكىم وتىرمايدى. ءنومىرى 11 اۆتوبۋسقا نە ءۇشىن وتىرمادىڭىز؟»، - دەدى ول. ايالداماعا كەلىپ توقتاعان، ونىمەن قوسا ادامعا لىق تولى، «وتىرىڭدار» دەپ ارتقى ەسىگى اشىلعان قوعامدىق كولىككە ءبىزدىڭ وتىرۋىمىزعا بۇلار نەگە سونشا قارسى بولدى دەپ قايران بولدىم. اۆتوبۋس جۇرگىزۋشىسى جۇمسارۋدىڭ ورنىنا بەت باقتىرمادى. «ماعان نە ىستەي الاسىڭدار؟ كەرەك بولسا اكىمياتقا، نازاربايەۆىڭا ايت. سەنىڭ بالاڭدى مۇگەدەك قىلعان مەن بە؟» - دەپ ۇرسىسا جونەلدى.

-ورتالىق مەشىتكە جەتە الدىڭىزدار ما؟

– ءيا، اقىرى سول 23-كە وتىردىق.

-پوليسياعا شاعىمداندىڭىز با؟

– ورتالىق مەشىتكە بارىپ كەلگەن سوڭ بالالاردى ۇيگە قالدىرىپ، بارلىق بازارىنداعى پوليسيا بولىمشەسىنە باردىق. ارىزىمىزدى قابىلدامادى. ولار بۇل جاعداي بويىنشا ءىس قوزعاي المايتىنىن ايتتى.  قاجەت بولسا جۇرگىزۋشىمەن سويلەسەتىندەرىن، جۇرگىزۋشىنىڭ كەشىرىم سۇرايتىنىن جەتكىزدى. ماعان ونىڭ ۇيالىسىن بەردى.  ءبىراق اۆتوبۋس جۇرگىزۋشىسى قوڭىراۋ شالمادى، كەشىرىم سۇرامادى. مەن نە ءۇشىن وعان ءوزىم زۆوندايمىن!؟

– اۆتوبۋستىڭ ءنومىرىن ايتىڭىزشى

– 23 اۆتوبۋس. ءنومىرى – 491MLA05

باياعىدا ءۇندى كينوسىن كورىپ وتىرعاندا ۇرىس-توبەلەس، ايعاي-شۋ ورىن الىپ جاتقاندا اراشا ءتۇسىپ، كومەك كورسەتپەيتىن، نەمقۇرايلىق تانىتاتىن ۇندىلەردى كورىپ تاڭ قالاتىنمىن. "قالايشا قۇر قاراپ تۇرادى؟"، "نەگە جەدەل جاردەمگە زۆوندامايدى؟"، "نەگە كومەكتەسپەيدى" دەگەن زاڭدى سۇراق تۋىندايتىن. مىنا ۆيدەونى كورىپ وتىرىپ، وكىنىشتەن بارماعىمدى تىستەدىم. ايىرماشىلىعىمىز جوق ەكەن. 

Qamshy.kz اقپارات اگەنتتىگى ءلاززات قوزىبايەۆانىڭ باسىنان وتكەن جاعدايىن جالپى جۇرتقا جاريا ەتە وتىرىپ، ادىلەتتىلىكتىڭ ورناعانىن قالايدى. ەسكەرتۋ كەتەتىن جايت، اۆتوبۋس جۇرگىزۋشىسىنە حابارلاسىپ، ەكىنشى تاراپتىڭ دا وي-كوزقاراسىن بەرەتىن بولامىز.