جول
(كەرەكۋ ءوڭىرىنىڭ ءبىرتۋار ونەرپاز ازاماتى ارداق رايىمبەكوۆ جان-جارى دانارامەن، ءۇش جاسار ۇلى نۇرجولمەن بىرگە
جول-كولىك وقيعاسىندا قازا تاپتى)
ۇلى تۇندە ۇيقىم ۇركىپ تۇردىم مەن،
ۇيالادى ۇرەي كىرپىك ۇشىندا!
قارالى اۋەن تارالارىن كىم بىلگەن،
قارا جولدان قارا قالا تۇسىندا؟
ءۇش جۇلدىزعا كەتتى اينالىپ ءۇش ءۇمىت،
ۇشەۋىن دە قۇس جولىنا ۇزاتتىم.
بەيمەزگىلدە بالاپانىن ۇشىرىپ،
قالجىرادى عاسىردان دا ۇزاق كۇن.
كوك توسىندە سۇڭقىلداعان قۇس كىلەڭ
كەرۋەن قۇراپ كوكجيەككە ۇشتى دا.
ءماشھۇر ءجۇسىپ مەشىتىنىڭ ۇستىنەن
ءۇش اينالىپ ۇزادى ءۇنسىز ءۇش تىرنا...
بەيباق اۋىل شامشىدە تەك ءتان قالدى،
جانى، ءسىرا، ءۇشبۇرىشتا ءجۇر اناۋ...
الدە ۇشەۋى بۇزىپ جارىپ جالعاندى،
ماڭگىلىككە ءوتىپ كەتكەن شىعار-اۋ...
...ۇلى تۇندە ۇمتىلساق تا مۇراتقا،
پەشەنەگە جازىلعاندى كورەمىز!
سول بوزداقتار ەنگەن شىعار جۇماققا،
ال ءبىز ءالى جول ۇستىندە كەلەمىز...
ارمان قاني
