اتىراۋ تۇرعىندارىنا ەندى بالانى بالاباقشاعا تىركەۋ جانە كەزەگىن ءبىلۋ ءۇشىن حقو مەن قالالىق ءبىلىم بەرۋ بولىمىندە ۇزىن سونار كەزەككە تۇرۋدىڭ قاجەتى جوق، دەپ ءسۇيىنشى سۇرايدى Qamshy.kz اقپارات اگەنتتىگى اتىراۋ قالالىق اكىمدىگىنىڭ باسپا ءسوز قىزمەتىنە سىلتەمە جاساي وتىرىپ.

2018 جىلعى 5 قىركۇيەكتەن باستاپ اتىراۋدا garden.atyrau.gov.kz سايتى جۇمىس جاساي باستادى، مۇندا ونلاين رەجيمدە بالاباقشانى تاڭداۋعا، ول تۋرالى تولىق اقپارات الۋعا، مەكتەپكە دەيىنگى مەكەمەلەرگە كەزەگىن قاداعالاۋعا، سونداي-اق SMS نەمەسە e-mail - حابارلاما ارقىلى كەرى بايلانىس الۋعا بولادى.

قالالىق ءبىلىم ءبولىمى باسشىسىنىڭ مىندەتىن اتقارۋشى المابەك ابدولوۆتىڭ ايتۋىنشا سايت اتا-انالاردىڭ ۋاقىتىن ۇنەمدەۋگە، سىبايلاس جەمقورلىق تاۋەكەلىن جانە قالالىق ءبىلىم ءبولىمى ماماندارىمەن جەكە بايلانىس جاساۋدى بولدىرماۋعا كومەكتەسەدى.

- بۇگىنگى كۇنى اتىراۋ قالاسىنداعى 42 مەملەكەتتىك بالاباقشادا 13 219 ورىن بار، ونىڭ 1141ء-ى بوس. اتا-انالار بارلىعى 24 925 ارىز بەرگەن. ونىڭ ىشىندە كەزەكتە تۇرعاندار - 22 408، جەڭىلدىك ساناتىنداعى ازاماتتار - 2 517، - دەدى المابەك ابدولوۆ.

سونىمەن قاتار سايتتا قالاداعى بارلىق بالاباقشالاردىڭ تولىق ءتىزىمى، ارىزداردىڭ كەزەگى، بوس ورىندار بيۋللەتەنى، الىنعان جولدامالاردىڭ جيىنتىعى ورنالاستىرىلعان. اتا-انالار ۇيدەن شىقپاي-اق بالاباقشاعا كەزەگىن تەكسەرىپ، جولداما الا الادى.

بۇل جەردە سونداي-اق جەكە مەنشىك بالاباقشالاردىڭ ءتىزىمى جانە ولارداعى ورىندار مەن بوس ورىنداردىڭ سانى تۋرالى اقپارات تا ورنالاستىرىلعان.