نۇرسۇلتان نازاربايەۆ پرەزيدەنت اكىمشىلىگى باسشىلىعىمەن جينالىس وتكىزدى. بۇل تۋرالى اقوردانىڭ باسپا ءسوز قىزمەتى حابارلادى.

ەلباسى جينالىس بارىسىندا پرەزيدەنت اكىمشىلىگىنىڭ جاڭا باسشىسى اسەت يسەكەشيەۆتى تانىستىردى.

«اسەت ورىنتاي ۇلى مەنىڭ كومەكشىم بولدى، مينيستر، ۆيسە-پرەمەر قىزمەتتەرىن اتقاردى. سوڭعى ەكى جارىم جىلدا باس قالانى باسقارىپ، استانالىقتاردىڭ كوڭىلىنەن شىقتى. ول بەلسەندى پوزيسياسى جانە كرەاتيۆتى ويلاۋىمەن ەرەكشەلەنەدى. بىزگە كەرەگى ءدال وسىنداي ادام. ەلوردانىڭ اكىمى بولعان ۋاقىتتا EXPO-2017 كورمەسى مەن استانانىڭ 20 جىلدىق مەرەيتويىن جوعارى دارەجەدە ابىرويمەن وتكىزدىك. اسەت ورىنتاي ۇلى جاڭا قىزمەتىن دە ءساتتى اتقاراتىنىنا سەنىمدىمىن»، - دەدى نازاربايەۆ.

وتىرىس اياقتالاردا قازاقستان پرەزيدەنتى پرەزيدەنت اكىمشىلىگىنىڭ بولاشاقتاعى جوسپارلارىمەن ءبولىستى. الداعى باستى مىندەت ەلدەگى ەكونوميكالىق ءوسىم مەن حالىقتىڭ جاعدايىن جاقسارتۋ ەكەندىگىن ەسكەرتتى.

«اكىمشىلىك الدىندا ماڭىزدى تاپسىرما تۇر – بۇعان دەيىن قابىلدانعان مەملەكەتتىك باعدارلامالاردىڭ ساپالى ورىندالۋىن قاداعالاۋى ءتيىس. ءبىر ايتا كەتەرلىگى، قازىرگى ۋاقىتتا جۇمىس ايماقتىق دەڭگەيگە اۋىسادى، اكىمدىكتەردىڭ قىزمەتى ءتيىمدى تۇردە ۇيلەستىرىلىپ، جۇمىلا جۇمىس ىستەۋ كەرەك»، - دەدى نازاربايەۆ.

ايتا كەتەيىك، كۇنى كەشە ەلباسىنىڭ جارلىعىمەن استانا قالاسىنىڭ اكىمى اسەت يسەكەشيەۆ قىزمەتىنەن بوساتىلىپ، پرەزيدەنت اكىمشىلىگىنىڭ باسشىسى لاۋازىمىنا تاعايىندالدى.