15 قىركۇيەكتە استانا قالاسىنىڭ سۋ جاڭا اكىمى باقىت سۇلتانوۆ الماتى وبلىسىنىڭ اۋىل شارۋاشىلىعى جارمەڭكەسىنە قاتىسىپ، ءبىر پاكەت الما ساتىپ العان ەدى. بۇل جاڭالىقتى ەستىگەندەر "اكىم دە ءبىز سەكىلدى ادام ەكەن عوي"، - دەپ تاڭىرقاپ، "ءسۇيىنشى" سۇراپ، جارىسا جازدى. ءيا، اكىم دە ءبىز سياقتى قاراپايىم ادام، الايدا ءبىز سياقتى كۇن سايىن اياق-كيىمنىڭ وكشەسىن، جۇيكە جاسۋشالارىن توزدىرىپ جۇرگەن ادام ەمەس. ولار ارزان باعاداعى ازىق-تۇلىكتى ىزدەپ، بازار جاعالامايدى، ۇل-قىزىن قايدا وقىتامىن، نەسيە مەن پاتەر اقىنى قالاي تولەيمىن دەپ تە باس قاتىرمايدى، جۇمىس كۇندەرى قارجىنى ۇنەمدەۋ ءۇشىن اۆتوبۋستىڭ ارتىنان جۇگىرىپ، لىق تولى ادامدارمەن قىسىلىپ تۇرمايدى دەگەندەي. بۇل ءتىزىمدى تاڭدى-تاڭعا ۇرىپ جالعاستىرا بەرۋگە بولادى.

استانا اكىمى الما ساتىپ العان كەزدە نە ويلادى ەكەن؟ الماتىنىڭ تۋماسى تۋعان جەردىڭ اپورتىن شىنىمەن دە ساعىنىپ قالدى ما الدە ءوزىن كورسەتۋدىڭ، پياردىڭ ءبىر ءتۇرى مە؟! ءجا، باستىسى بۇل ەمەس. ءبىز اكىمدەر اۆتوبۋسقا مىنسە، ۆەلوسيپەد ايداسا، الما ساتىپ السا، قالانى گۇلدەندىرىپ جىبەرگەندەي جاپا-تارماعاي جارىسا جازىپ، قۋاناتىنىمىز قاي ساسقانىمىز؟ كەي اكىمدەردىڭ حالىقتى ءوز قىزمەتشىسىندەي كورىپ، مۇڭ-مۇقتاجىنا قۇلاق اسپاۋىنا، ءوزىنىڭ اكەسىنەن مۇراگەرلىككە قالعان قالاسىندا تۇراتىنداي تالتاڭداپ جۇرۋىنە ءبىز كىنالىمىز دەپ ەسەپتەيمىن. سەبەبى ولاردىڭ تۇيمەدەي ىس-ارەكەتىن تۇيەدەي ەتىپ كورسەتەمىز. ولار سوعان ماستانىپ الىپ، وزدەرىن حالىقتان ەرەكشەمىن دەپ ويلايدى. ءسويتىپ قارا حالىقتىڭ كۇندەلىكتى جاساپ جۇرگەن ىس-ارەكەتىن وزدەرىنە پيار رەتىندە پايدالانادى. بىرەۋى ۆەلوسيپەد ايدايدى، ەندى ءبىرى اۆتوبۋسقا مىنەدى. حالىققا وزگەرىس اسا قاجەت ۋاقىتتا ءبىزدىڭ اكىم-قارالار ءبىر پاكەت الما ساتىپ الۋدان ارى اسا الماي وتىر. سۇلتانوۆتىڭ ءبىر پاكەت الما ساتىپ الۋدان باسقا قانداي جوسپارى بار ەكەنىن ازىرگە بىلمەدىك. الايدا حالىق ەكس-مينيستردىڭ قانداي بىلىكتى اكىم ەكەنىن استانانىڭ اۋا-رايى قۇبىلعان كەزدە بىلەتىن بولامىز. 

سۋ جاڭا اكىمگە سەرىكقازى كوكەناي ءوزىنىڭ فەيسبۋك پاراقشاسىنا سۇلتانوۆقا 7 تىلەك ءھام كەڭەس بەرىپتى. اتالمىش كەڭەستەردىڭ ءتىزىمىن Qamshy.kz اقپارات اگەنتتىگى وقىرماننىڭ دا، سۇلتانوۆتىڭ دا نازارىنا ۇسىنۋدى ءجون كوردى. 

"قۇرمەتتى استانا اكىمى! ءوزىڭىزدى جارمەڭكەدەن الما ساتىپ الۋ سياقتى ارزان پيارمەن كورسەتپەي، قاراپايىم بولعىڭىز كەلسە، مىنالاردى ىستەسەڭىز بولادى:
1. جاعدايدىڭ بارلىعى جاسالعان ۇكىمەت مۇشەلەرىنە ارنالعان ۇيدە ەمەس، قاراپايىم حالىق تۇراتىن ارزان ۇيگە كوشىڭىز، سوندا تۇرىڭىز، كورىڭىز.
2. جۇمىسقا اۆتوبۋسپەن كەلىڭىز.
3. ايلىعىڭىزدى استانالىقتاردىڭ ورتاشا جالاقىسىنداي ەتىپ بەلگىلەڭىز.
4. بالالار نەمەسە نەمەرەلەرىڭىزدى قاراپايىم بالاباقشا، مەكتەپ نەمەسە ۋنيۆەرسيتەتكە بەرىڭىز.
5. پاتريوت رەتىندە ەلىمىزدە تىگىلگەن كيىمدەردى كيىپ، ەلىمىزدە وندىرىلگەن زاتتاردى پايدالانىپ، قازاقستاندىق تاماقتى ءىشىڭىز.
6. قالانى ءوزىڭىز جاياۋ ارالاپ، حالىقپەن كەزدەسىپ، مۇڭ-مۇقتاجىن تىڭداڭىز.
7. الەۋمەتتىك جەلىلەردەگى اككاۋنتتارىڭىزدى قولعا الىپ، ۆيرتۋالدى كەڭىستىكتە اشىق بولىڭىز.
ەگەر وسىلاردى ورىنداي الماساڭىز، الما ساتىپ الۋ سياقتى ارزان پيار جاساپ، سۇيكىمىڭىزدى كەتىرمەگەنىڭىز دۇرىس!"، دەپ جازادى سەرىكقازى كوكەناي.