قازاقستاندا 23 جىل بويى تەمەكى وسىرەتىن ورىستە جۇمىس ىستەگەن 51 جاستاعى قىرعىزستاندىق وتانىنا ورالىپ، اپكەسىمەن قاۋىشتى. اپالى-سىڭلىلەردىڭ كەزدەسۋى 2018 جىلدىڭ 19 قىركۇيەگىندە بىشكەكتەگى ۇلتتىق قىزىل جارتى اي قوعامدىق قىزمەتىنىڭ مەرەيتويىن تويلاۋ قارساڭىندا ءوتتى. اتالمىش قىزمەت بۇل كۇنگە دەيىن قىرعىزستاننىڭ 135-كە جۋىق وتباسىن قاۋىشتىرعان.

23 جىلدان كەيىن كەزدەسكەن اپالى-سىڭلىلەردى كورگەن جۇرتتىڭ كوڭىلدەرى بوساپ سالا بەردى. بۋرماكان بولتويەۆا وسى كۇنگە دەيىن اپكەسىنىڭ تابىلارىنا سەندى، ءۇمىتىن ۇزبەدى.

«ول قازاقستانعا 1995 جىلى كەتكەن. ءبىز قالادا تۇراتىنبىز، اپكەمدى الداپ الىپ كەتتى. قىزىل جارتى اي قوعامىنا العىس بىلدىرەمىن»، - دەدى بولتويەۆا.

21 جاستاعى زۋۋرا بولتويەۆا وش وبلىسى قارا-قۇلجا اۋدانىنىڭ تۇرعىنى. قىزىل جارتى اي قوعامى استاناداعى قىرعىز دياسپوراسىنىڭ وكىلدەرىمەن بىرىگىپ ايەلدى ءبىر اپتا بۇرىن تاپتى. قۇجاتتارىن جوعالتىپ العان زۋۋرا ەلگە قايتا المادى، سول سەبەپتى تەمەكى وسىرەتىن الاڭدا جۇمىس ىستەۋگە ءماجبۇر بولعان، بۇعان قوسا اش قالماس ءۇشىن مال دا باقتى.

«جۇمىس ىستەدىم، كەيىن كۇيەۋگە ءتيدىم. كۇيەۋىم 11 جىلدان كەيىن قايتىس بولدى. قىزىم ەكەۋمىز جالعىز قالدىق. ءبىراق اتا-ەنەم قىزىمدى تاربيەلەي المايتىنىمدى ايتىپ تارتىپ الدى. ول كەزدە جاسى 11-دە ەدى. ءقازىر قىزىم قازاقستاندا تۇرىپ جاتىر.

ال مەن قارا جۇمىسقا جەگىلدىم. ءۇش ءتۇرلى قوجايىنمەن جۇمىس ىستەدىم. ونىڭ ەكەۋى مەنى ۇرىپ سوعاتىن، قالاعاندارىن ىستەتەتىن. تۋىستارىمنىڭ مەنى ىزدەپ جۇرگەنىن بىلمەپپىن. مەنى ىزدەپ تاۋىپ، وتانىما قايتارعان قىزىل جارتى اي قوعامىنا العىسىم شەكسىز»، - دەدى زۋۋرا بولتويەۆا.

قوعامدىق قىزمەت استاناداعى قىرعىز دياسپوراسىمەن بىرلەسىپ زۋۋرا بولتويەۆانى ءۇش اي بويى ىزدەگەن. بىشكەككە كەلگەن ايەل مەديسينالىق تەكسەرۋدەن ءوتتى. ءقازىر قۇجاتتارى مەن جەكە كۋالىگى دايىندالىپ جاتىر. قىرعىزستان ۇلتتىق قىزىل جارتى اي قوعامدىق قىزمەتىنىڭ 25 جىلدىعىنا وراي تويلانعان مەرەيتويدا بۇدان دا وزگە قىرعىزستاندىقتار تابىستى.