بۇل تۋرالى «نۇر وتان» پارتياسى ءتوراعاسىنىڭ ءبىرىنشى ورىنباسارى ءداستۇرلى «قازاقستاننىڭ ۇزدىك الەۋمەتتىك جوبالارى» بايقاۋىنىڭ جەڭىمپازدارىن ماراپاتتاۋ راسىمىندە ايتتى.
ءىس-شارا بارىسىندا «نۇر وتان» پارتياسى ءتوراعاسىنىڭ ءبىرىنشى ورىنباسارى ماۋلەن اشىمبايەۆ حالىقتىڭ الەۋمەتتىك ماسەلەلەرىن شەشۋ – ەلباسى انىقتاپ بەرگەن ەلىمىزدەگى ەڭ باستى باسىمدىقتاردىڭ ءبىرى ەكەنىنە نازار اۋداردى.
– وسى باعىتتا سوڭعى جىلداردا مەملەكەتتىك ورگاندار تاراپىنان اۋقىمدى جۇمىستار اتقارىلىپ جاتىر. بيىل ەلباسى حالىقتىڭ ءال-اۋقاتىن ارتتىرۋعا ارنالعان ءوزىنىڭ بەس الەۋمەتتىك باستاماسىن جاريالاپ، الدىمىزعا جاڭا مىندەتتەر قويدى. وسى رەتتە قوعامداعى الەۋمەتتىك ماسەلەلەردى شەشۋ ءۇشىن مەملەكەتتىك ورگاندارمەن بىرگە، ۇكىمەتتىك ەمەس ۇيىمدار، قوعامدىق بىرلەستىكتەر، كاسىپكەرلەر جانە ساياسي پارتيالار دا بەلسەندى ارەكەت ەتسە، كوزدەگەن مەجەگە قول جەتكىزۋ جەڭىلدەيتىنى ءسوزسىز، – دەدى ماۋلەن اشىمبايەۆ.
سونىمەن قاتار ول جەڭىمپازدار مەن قاتىسۋشىلاردى قۇتتىقتاپ، بارلىق جوبا اۆتورلارى جەڭىسكە لايىق ەكەنىن ايتتى. ودان بولەك، پارتيا ءتوراعاسىنىڭ ءبىرىنشى ورىنباسارى مۇنداي بايقاۋدىڭ الەۋمەتتىك، رۋحاني جانە تاربيەلىك ماڭىزى زور ەكەنىن تىلگە تيەك ەتتى.
– بۇل، بىرىنشىدەن، الەۋمەتتىك سالادا بەلسەندىلىگىمەن تانىلعان قوعامدىق ۇيىمدار مەن مۇقتاج جاندارعا كومەك قولىن سوزعان جەكە ازاماتتارعا قولداۋ كورسەتۋگە، ولاردىڭ ەڭبەكتەرىن ەلەپ-ەسكەرۋگە مۇمكىندىك بەرەتىن بولسا، ەكىنشىدەن، سونداي بىرلەستىكتەردى كوپشىلىككە ۇلگى-ونەگە رەتىندە دارىپتەۋگە جول اشادى. قازىرگى تاڭدا ەلىمىزدە ونداي ۇيىمدار مەن ازاماتتار مىڭداپ سانالادى. ولار وسىنداي يگى ىستەرىمەن قوعامىمىزدا قايىرىمدىلىق مادەنيەتى مەن الەۋمەتتىك جاۋاپكەرشىلىكتىڭ قالىپتاسۋىنا ۇلكەن ۇلەستەرىن قوسىپ كەلەدى. سول سەبەپتى «نۇر وتان» پارتياسى وسى ءداستۇرلى بايقاۋعا اتسالىسىپ، ونىڭ جاڭا دەڭگەيگە كوتەرىلۋىنە ءوز سەپتىگىن تيگىزىپ وتىر، – دەگەن ماۋلەن اشىمبايەۆ الداعى ۋاقىتتا پارتيا وسى سالاداعى جۇمىستارىن جالعاستىرا بەرەتىنىن جەتكىزدى.
بيىل بايقاۋ العاش رەت «نۇر وتان» پارتياسىنىڭ جانە ەڭبەك جانە حالىقتى الەۋمەتتىك قورعاۋ مينيسترلىگىنىڭ بىرلەسىپ ۇيىمداستىرۋىمەن وتكىزىلدى. ءىس-شاراعا بۇل جولى ەلىمىزدىڭ ءار وڭىرىنەن 318 اۆتور قاتىسىپ، ءوز جوبالارىن ۇسىندى. ناتيجەسىندە «زەينەتكەرلەرگە تەگىن تۇسكى اس» جوباسىمەن قاتىسقان ءراسيما تەمىربايەۆا – 1-ورىن، «ارباداعى كەدەرگىسىز ءومىر» جوباسىمەن قاتىسقان نۇربولات قاراباسوۆ پەن «ەل نازى» ارت-تەراپيامەن دامىتۋ ورتالىعى جوباسىمەن قاتىسقان بەلگىلى ءانشى كەنجەبەك ءجانابىلوۆ – 2-ورىن جانە «ءۇمىت ساۋلەسى»، «مەيكاتون «TOM: Kazakhstan» جوبالارىمەن قاتىسقان مارجان مادييەۆا مەن ءسانيا اراپوۆا 3-ورىن الدى. ودان بولەك، ونلاين-داۋىس بەرۋ ناتيجەسى بويىنشا 5 قاتىسۋشىعا جۇلدە تاپسىرىلدى جانە تاعى 3 جوبا اۆتورىنا ارنايى سىيلىق تاپسىرىلدى.
سالتاناتتى شاراعا «نۇر وتان» پارتياسى ءتوراعاسىنىڭ ءبىرىنشى ورىنباسارىمەن بىرگە ەڭبەك جانە حالىقتى الەۋمەتتىك قورعاۋ ءمينيسترى ءمادينا ءابىلقاسىموۆا، سونداي-اق باسقا دا مەملەكەتتىك ورگان، بيزنەس قاۋىمداستىق، ۇكىمەتتىك ەمەس ۇيىم وكىلدەرى مەن پارلامەنت دەپۋتاتتارى قاتىستى.
