الەمدە اركىم ءوز ىسىمەن اينالىسىپ ۇيرەنگەن. تەمىر ۇستاسى – تەمىر جونادى، باعبان – باۋ-باقشا ىسىمەن شۇعىلدانادى. سوندىقتان دا بارلىق ەلدە ءوز ءىسىنىڭ مامانى بولۋعا ۇيرەتەتىن ءتۇرلى وقۋ ورىندارى اشىلىپ، «سەن مىنا مامان يەسىسىڭ» دەپ قولىنا قالپاقتاي ديپلومدارىن ۇستاتادى. ياعني، كەز كەلگەن ادام بەلگىلى ءبىر ماماندىق يەسى. ماسەلەن، ءبىلىم بەرۋ سالاسىندا بازالىق ءبىلىمىڭ سايكەس كەلمەسە، مىڭ جەردەن سەن سول سالانى تەرەڭ مەڭگەرسەڭ دە، تۇراقتاپ جۇمىس ءىستەي المايسىڭ. كەلگەن كوميسسيا «ماماندىعى سايكەس كەلمەيدى ەكەن» دەپ، الدىمەن ساعان شۇيلىگە باستايدى. مەملەكەتتىك قىزمەتتە دە سولاي. قىزمەتكە قابىلداۋ سالاعا قابىلەتتىلىگىڭدى تەكسەرىپ، تەست تاپسىرۋ تۇرىندە انىقتالادى. جۋرناليستەر دە ءۇش ايلىق سىناق مەرزىمىنەن وتپەي بۇقارالىق اقپارات قۇرالدارىنا قىزمەتكە قابىلدانا المايدى. ءتىپتى، ساحنادا ەل ىقىلاسىنا بولەنىپ جۇرگەن مامان اكتەردىڭ ءوزى دە كينوعا تۇسەتىن بولسا، مىندەتتى تۇردە سىناق كاستينگىنەن وتەدى.
ءدال وسىنداي تالاپ تەك انشىلەرگە عانا قاتىسى جوق-اۋ دەپ ويلايسىڭ كەيدە. ويتكەنى، سەريالدار مەن كينوفيلمدەردە قولىندا الگىندەي «اكتەر» دەگەن ديپلومى بار ارتىستەردەن گورى انشىلەردى كوبىرەك كورەسىڭ. جانار ايجانوۆا، ءمولدىر اۋەلبەكوۆا، جازيرا مەن جانبولات، كامشات جولدىبايەۆا، ايقىن تولەپبەرگەن، داستان ورازبەكوۆ، جانار دۇعالوۆا، جىگەر اۋىپبايەۆ... وسىلاي كەتە بەرەدى. ءتىپتى، بارلىق سەريالدارعا قاتىسىپ، ەكراننان تۇسپەي، «جاۋىر» بولعان انشىلەر دە بار. بالكىم، كەيبىرىنىڭ اكتەرلىك ماماندىعى دا بار شىعار، ءبىراق ءبىز ولاردى ءانشى رەتىندە جاقسى تانىپ قالعانبىز (ارينە، كەيبىرىنىڭ اكتەرلىك قابىلەتىنە تاڭ قالماي تۇرا المايمىز).
ماسەلەن، ۇلتتىق كينو ونەرىمىزدىڭ جاۋھارلارىنا اينالعان «قىز جىبەك»، «گاۋحارتاس»، «اتاماننىڭ اقىرى»، «مەنىڭ اتىم قوجا» فيلمدەرىنەن كينوعا تۇسكەن بىردە-بىر ءانشىنى تاپپايسىز. انشىلەر تەك ارتىستەر سالعان اندەرگە عانا كادر سىرتىنان دۋبلياج جاسايدى.
سوندا كينو يندۋسترياسىنداعى ماماندارعا فيلمدەرىنە ءتۇسۋ ءۇشىن كاسىپقوي اكتەرلەردەن گورى انشىلەردىڭ ءتيىمدى بولعانى ما؟ جوق، الدە، ودان دا تانىمال بولا ءتۇسۋ ءۇشىن ونسىز دا «جۇلدىز اۋرۋىمەن» اۋىرىپ جۇرگەن انشىلەردىڭ وزدەرى كينوعا تۇسۋگە سۇرانا ما؟ مۇنىڭ باسقاداي دا ءبىر سەبەپتەرى بار شىعار؟ ءبىز بىلمەدىك...
بەكجىگىت سەردالىنىڭ فەيسبۋك پاراقشاسىنان
