كەشە كەشكىسىن ساعات 21:00 شاماسىندا ۇلتتىق ۇلانعا قاراستى 5573 اسكەري ءبولىمىنىڭ اسكەري جاساعى ساربازدى پىشاقپەن جاراقاتتاماق بولعان ەر ادامدى قۇرىقتادى دەپ حابارلايدى Qamshy.kz اقپارات اگەنتتىگى ۇلتتىق ۇلاننىڭ باسپا ءسوز قىزمەتىنە سىلتەمە جاساي وتىرىپ.

استانا قالاسىنىڭ كوشەلەرىندە قوعامدىق ءتارتىپتى قاداعالاپ جۇرگەن اسكەري جاساق جاۋىنگەرلەرى ەفرەيتور جاسۇلان قىدىربايەۆ، قاتارداعى جاۋىنگەرلەر قازىبەك ۇيسەمبايەۆ پەن ەربول بەكبايەۆ اباي داڭعىلىنىڭ بويىندا رەڭى سۇستى، ءوزىن ءبىر ءتۇرلى ۇستاعان ەر ادامدى بايقايدى.

اسكەري جاساق مۇشەلەرى الگى كىسىنى توقتاتىپ، سىرتتاي تەكسەرۋ جۇرگىزۋ بارىسىندا بەلگىسىز ازامات كەنەتتەن كۇرتەشەسىنىڭ سول جاق قالتاسىنان پىشاق شىعارىپ، قاتارداعى جاۋىنگەر ۇيسەمبايەۆقا سوققى جاساۋعا ارەكەتتەنەدى. شالت قيمىلدىڭ الدىن العان جاۋىنگەر قاسكۇنەمنىڭ قولىن دەر كەزىندە قاعىپ ءتۇسىپ قايىرىپ، كىسەن سالادى.

ءسويتىپ، كۇدىكتىگە قاتىستى تولىق دەرەكتەردى انىقتاۋ ءۇشىن ول سارىارقا اۋداندىق ءىىب بولىمشەسىنە جەتكىزىلىپ، قۇقىق قورعاۋ ورگاندارىنىڭ قىزمەتكەرلەرىنە تاپسىرىلدى.