اتى بار دا، زاتى جوق! تۇركىستان وبلىسىندا اتا-اناسىنان ايىرىلعان تۇل جەتىم ازاماتتىعىن دالەلدەي الماي ءجۇر. 24 جاستاعى جىگىت تۇراقتى مەكەنجايى بولماعاندىقتان، مەكتەپكە بارماپتى. سالدارىنان كىتاپ وقىماق تۇگىلى، حات تانىمايدى. ءتىپتى، ءوزىنىڭ ءاتى-جونىن دە جازا المايدى ەكەن. 18 جىل بويى اركىمنىڭ قولاستىندا جۇمىس ىستەپ، دالادا تۇنەپ كەلگەن. ومىردەن ءوز ورنىن تابا الماي جۇرگەن كەيىپكەر تۋرالى ەۋرازيا ءبىرىنشى ارناسى حابارلايدى.
ىرىسبەك جاڭابەكوۆ – تۇركيانىڭ تۋماسى. اكەسىنەن بەس، ال، اناسىنان التى جاسىندا ايىرىلعان ول الدەكىمدەردىڭ ىقپالىمەن وسىدان ون سەگىز جىل بۇرىن قازاقستانعا كەلىپتى. سودان بەرى جەتىسايدا تۇرىپ جاتىر. كەزىندە قۇجاتتارى بولماعاندىقتان، مەكتەپكە دە بارماپتى. ءارىپ تانىماعاندىقتان، ءاتى-جونىن دە قاعازعا تۇسىرە المايدى.
ىرىسبەك قۇجاتسىز جۇرگەندىكتەن تالاي مارتە ءوز قۇقىعىن قورعاي الماي قور بولعانىن ايتادى. تەك، جۋىردا عانا جەرگىلىكتى زاڭگەر ءامىرحان امانكەلدييەۆتىڭ كومەگىمەن ءتولقۇجاتقا يە بولىپتى. ءسويتىپ، بىردەن تۇرعىن ءۇي كەزەگىنە ءوتىنىش تاپسىرعان. وعان دەيىن دالادا تۇنەۋگە ءماجبۇر.
«ءقازىر ءبىر ۇيدە تۇرعانمىن، ول ساتىلايىن دەپ جاتىر عوي. ءسال وقىعانمىن، جوعارى وقۋ ورنىنا ءتۇسۋىم كەرەك قوي. ارى قاراي جۇمىس ىستەۋىم كەرەك» - دەيدى جەتىساي قالاسىنىڭ تۇرعىنى ىرىسبەك جاڭابەكوۆ.
ىرىسبەك ومىرىندە دارىگەردىڭ قابىلداۋىندا بولماعانىن ايتادى. سونىڭ اسەرى بولسا كەرەك، ءقازىر دەنساۋلىعى ازداپ سىر بەرىپ ءجۇر ەكەن. باسى اۋىرىپ، بالتىرى سىزداسا، وزىنشە ەم-دوم جاساۋعا داعدىلانىپ الىپتى. ونىڭ جاعدايىنان حاباردار بولعان اۋدان اكىمدىگى جاۋاپتى تۇلعالار جۋىردا مەديسينالىق تەكسەرۋدەن وتكىزىپ، قىسقا مەرزىمدى كۋرستارعا جىبەرەمىز دەپ وتىر. ءارىپ تانىعان سوڭ، اقىلى قوعامدىق جۇمىسقا ورنالاستىرماق.
«بۇل جىگىت بىزگە كەلىپ، ەگەر مەديسينا جاعىنان تەكسەرىلىپ، اقىل-ەسىنىڭ دۇرىستىعى، جۇمىسقا قابىلەتتى دەپ تانىلىپ جاتسا، ءبىز بۇل جىگىتكە مەملەكەت تاراپىنان قانداي كومەك كورسەتىلەدى، سونىڭ ءبارىن كورسەتۋگە دايىنبىز. ول، ءبىرىنشى - وقىتۋ، ەكىنشى - جۇمىسپەن قامتۋ» - دەيدى جەتىساي اۋدانى اكىمىنىڭ كەڭەسشىسى ايدار سەيدازىم.
ىرىسبەك وسى كۇنى اركىمگە جالدانىپ، ەڭبەك ەتەدى. تاپقان تابىسىن كۇندەلىكتى تاماعىنا جۇمسايدى. كامەلەتتىك جاسقا تولعاندىقتان، مەملەكەت تاراپىنان وعان ەشقانداي جاردەماقى تاعايىندالمايدى ەكەن. ەگەر دەنساۋلىعىندا قانداي دا ءبىر كىنارات تابىلاتىن بولسا، وندا ءسوز باسقا دەيدى ماماندار.
«باسىم اۋىرادى، قۇلاپ قالا بەرەمىن دەگەن اڭگىمەلەردى ايتىپ وتىر. ال ەگەر راسىندا باسى اۋىرىپ، قۇلاپ قالا بەرەتىن جايى بولاتىن بولسا، بۇل كىسى ورتالىق ەمحاناعا بارىپ، سول جەردەن دارىگەرلەرگە كورىنىپ، اۋداندىق ۆكك كوميسسيا بار عوي، سول كوميسسيادان ءوتىپ، ءيا، مىنانداي اۋرۋى بار دەپ انىقتايتىن بولسا، وندا مۇگەدەكتىك تاعايىندالادى» - دەيدى جەتىساي اۋداندىق حالىقتى جۇمىسپەن قامتۋ جانە الەۋمەتتىك باعدارلامالار ءبولىمىنىڭ باسشىسى ءادىلحان ءابجانوۆ.
ومىردەن قانشا تەپەرىش كورسە دە 24 جاستاعى جىگىت ەش جاسىماعان. ارمانسىز دا ەمەس. تەزدەتىپ ءبىلىم الىپ، جاقسى ءبىر مامان بولۋدى ماقسات ەتىپ وتىر. وتباسىلى بولۋ دا ويىندا بار.
