وتكەن اپتادا اقمولا وبلىسىندا استانا قالاسىنا جاقىن جەردە ەلىمىزدەگى ءىرى، جىلىنا 50 مىڭ توننا قۇس ەتىن ءوندىرۋ قۋاتى بار ماكينسك قۇس فابريكاسىنىڭ ءبىرىنشى كەزەگى ىسكە قوسىلدى. جوبا قۇرىلىسىنا ارنالعان قاراجاتتىڭ جارتىسىنا جۋىعىن «قازاقستاننىڭ دامۋ بانكى» اق ءبولىپ وتىر.

ءبىرىنشى كەزەڭدە قۇس فابريكاسىنىڭ وندىرىستىك قۋاتتىلىعى جىلىنا 25 مىڭ تونناعا، ەكىنشى كەزەڭدە 50 مىڭ تونناعا جەتەدى. قۇس فابريكاسى اقمولا وبلىسىنىڭ بۇلاندى اۋدانىنىڭ بايسۋات اۋىلىندا، اۋدان ورتالىعى – ماكينسك قالاسىنا جاقىن ورنالاسقان. 

«ەكىنشى كەزەكتەگى 50 مىڭ توننالىق ءوندىرىس ەلىمىزدەگى تاۋىق ەتىنە دەگەن سۇرانىستىڭ 15%-ىن قامتاماسىز ەتەدى. بۇل ايتارلىقتاي كولەم. كومپانيا ءوز ءونىمىن جوعارى دەڭگەيدە، ساتىپ، تاراتا الادى. ءونىمنىڭ كوپ بولىگى وسكەمەن قۇس فابريكاسى سەكىلدى توڭازىتىلعان تاۋىق ەتى تۇرىندە ساتىلاتىندىقتان، يمپورتتىق مۇزداتىلعان قۇس ەتىمەن باسەكەلەس بولا الادى. سوندىقتان ينۆەستور رەتىندە ءبىز جوبانىڭ ۇنەمدىلىگىنە وتە سەنىمدىمىز»، - دەدى قدب ءتوراعاسى بولات جامىشيەۆ قۇس فابريكاسىنىڭ اشىلۋ سالتاناتىندا.

قۇنى 33،5 ملرد تەڭگە جوباعا قاجەت ينۆەستيسيانىڭ 50%-دان استامىن قدب ەنشىلەس ۇيىمى – «بايتەرەك» حولدينگى (16،1 ملرد تەڭگە) جانە «قازىنا كاپيتال مەنەدجمەنت» اق (قكم)، قالعان كولەمىن جوبانىڭ باستاماشىسى «Aitas KZ» اق ءبولىپ وتىر. ەۋروپالىق قايتا قۇرۋ جانە دامۋ بانكى (ەقدب) «Aitas KZ» اق كاپيتالىنا قاتىسۋ ارقىلى جوباعا ينۆەستيسيا قۇيدى.

ماكينسك قۇس فابريكاسى قۇرىلىسىنىڭ جالپى قۇنى، ەكىنشى كەزەكتى قوسقاندا، 45،6 ملرد تەڭگەنى قۇرايدى.

العاشقى ءونىم نارىققا بيىلعى قاراشادا تۇسەدى دەپ جوسپارلانۋدا.

«Aitas KZ» قۇرىلتايشىسى سەرىك تولىقبايەۆتىڭ ايتۋىنشا، كومپانيا ەلىمىزدىڭ سولتۇستىگىن: پەتروپاۆل، كوكشەتاۋ، قوستانايدى قۇس ەتىمەن قامتاماسىز ەتەدى. كومپانيانىڭ جوسپارىندا استانا دا بار.

«ءبىز ول جاقتان (استانادان – اۆت.) وسكەمەن قۇس فابريكاسىنىڭ ونىمدەرىن الىپ شىعامىز، ونى بىرتىندەپ ماكينسك قۇس فابريكاسىنىڭ ونىمدەرىمەن اۋىستىرامىز. مۇنىڭ ءبارى «كۋس-كۋس» برەندى ارقىلى بولادى»، - دەدى س.تولىقبايەۆ.

ەلوردا تۇرعىندارى ماكينسك قۇس فابريكاسىنىڭ ونىمدەرىن جاڭا جىلدان كەيىن ساتىپ الا الادى.

قۇس فابريكاسىنىڭ اشىلۋ سالتاناتىندا سونداي-اق قدب تاۋەلسىز ديرەكتورى قاتىستى. انتونيو سومما بۇل جوبانى جۇزەگە اسىرۋ بانك ءۇشىن «نەگىزگى مۇناي گاز ءوندىرۋشى سالادان بولەك، ەكونوميكانى ءارتاراپتاندىرۋدى قولداۋ ميسسياسىن جۇزەگە اسىرۋدىڭ تاماشا مىسالى» بولىپ تابىلاتىنىن اتاپ ءوتتى.

«بۇل جوبالار يمپورتتى الماستىرۋعا مۇمكىندىك بەرەدى. قوسىلعان قۇن تىزبەگىنىڭ اۋىستىرىلۋى، جوعارى قوسىلعان قۇن، ۇزاقمەرزىمدى تۇراقتى جۇمىسپەن قامتۋ، يمپورتتى الماستىرۋ –بۇل ءارتاراپتاندىرۋدىڭ حالىقارالىق ستاندارتى جانە بۇل ءادىستى ەىدۇ قازاقستان ەكونوميكاسىنىڭ دامۋىن نىعايتۋ ءۇشىن ۇسىنىپ وتىر»، - دەدى ا.سومما، قدب قورجىنىندا وسىنداي جوبالاردىڭ كوبىرەك بولۋىنا تىلەكتەستىك بىلدىرە كەلىپ.