"ەلباسى نە دەيدى؟" دەپ كۇتىپ وتىرعان قازاق قانشاما. نازاربايەۆتىڭ اۋزىنان شىققان ءاربىر سوزدەن جاقسىلىقتىڭ نىشانىن ىزدەپ وتىرعان كوپشىلىكتىڭ ءۇمىتىن ەلباسى اقتادى. "7-20-25"  باعدارلاماسىنىڭ نەگە جۇزەگە اسپاي جاتقانىنا الاڭداعان نازاربايەۆ دانيار اقىشيەۆ پەن اسقار ءماميندى تىك تۇرعىزدى. "قازاقستاندىقتار وسى باعدارلاماعا قىزىعۋشىلىق نەگە بىلدىرمەي جاتىر؟" دەگەن ەكەۋىن دە ابىگەرگە سالعانداي بولدى. اقىشيەۆتىڭ ايتۋىنشا، 2000 ادام "7-20-25ء-تىڭ" يگىلىگىن كورىپ ۇلگەردى، باسپانالى بولدى. الايدا بۇل سانعا ەلباسىنىڭ كوڭىلى تولمادى. "50 شارشى مەترلىك ءبىر بولمەلى پاتەردىڭ قۇنى قانشا؟" دەگەن كەزەكتى سۇراققا ءمامين "7 ميلليون تەڭگە" دەپ جاۋاپ بەردى. زالدا الدەكىمنىڭ 3 ميلليون دەگەنى ەستىلدى. "7 ميلليون" دەگەندى ەستىپ، يمانداي سەنگەن نازاربايەۆ "1 ميلليون 300 مىڭ تەڭگەسى جوق پا قازاقستاندىقتاردىڭ؟" دەپ نالىعانى داۋسىنان ءبىلىندى. وسى كەزەكتە، 50 شارشى مەترلىك ءبىر بولمەلى پاتەرلەردىڭ قۇنى قانشا ەكەندىگىنە توقتالساق. استاناداعى باعالاردى ءبىلۋ ءۇشىن عالامتوردىڭ كومەگىنە جۇگىندىك، ال الماتىداعى تۇرعىن ءۇي كەشەندەرىنىڭ ساتۋ ءبولىمىنىڭ مەنەدجەرلەرىمەن تىلدەسۋگە تۋرا كەلدى. 

استانانىڭ ەسىل اۋدانىنان 42-53 شارشى مەترلىك ءبىر بولمەنى 14 000 000 - 21 000 000 تەڭگە ارالىعىندا الا الاسىز (Krisha.kz سايتىنداعى ىزدەۋ جۇيەسىنىڭ بەرگەن سيفراسى وسىنداي)

الماتىداعى "ابايدىڭ بويىنداعى ءۇي" تۇرعىن ءۇي كەشەنىندەگى ءبىر بولمەلى پاتەرلەر 55 شارشى مەتردەن باستالادى ەكەن. قۇنى 24 750 000 تەڭگە. بۇل ەڭ تومەنگى باعاسى.

"اكۆارەل" تۇرعىن ءۇي كەشەنىندە 1 بولمەلى پاتەرلەر 37.9 شارشى مەتر ەكەن. باعاسى 14 278 000 تەڭگە.

58.8 شارشى مەترلىك ەكى بولمەلى پاتەرلەر دە بار. قۇنى 20 894 000 تەڭگە. 

"المالى تۇرعىن ءۇي كەشەنىندە 33.7 شارشى مەتردەن قۇرالعان ءبىر بولمەلى پاتەردى ساتىپ الۋ ءۇشىن 8 725 000 تەڭگە بەرەسىز. 53.5 شارشى مەترلىك ەكى بولمەنىڭ قۇنى 13 696 000 تەڭگە.

ءبىر ايتا كەتەرلىگى، تۇرعىن ۇيلەر بىرنەشە كلاسقا بولىنەدى ەكەن: 1، 2، 3، 4 كلاسس.

1 كلاسس-پرەميۋم. باعالارى ۋداي.

2 كلاسس - بيزنەس. اتى ايتىپ تۇر.

3 كلاسس-كومفورت.  مىسالى، كومفورتتى باعالار 14 278 000-نان باستالادى.

4 كلاسس-ەكونوم. مىسالى، ەكونومدى باعالار 13 696 000-عا تەڭ. 

اسقار ءمامين ايتقان 7 ميلليون تەڭگەگە، وكىنىشكە قاراي، 50 شارشى مەترلىك ءبىر بولمەلى پاتەردى ەكى قالادان دا تاپپادىق. ارينە، قوستاناي سياقتى كىشىگىرىم قالالاردان تابۋعا بولادى. ءبىراق اڭگىمە استانا مەن الماتى توڭىرەگىندە بولعان سياقتى.