مەملەكەت باسشىسى قازاقستان حالقىنا ارنالعان جىل سايىنعى جولداۋىن جاريالادى، دەپ حابارلايدى Qamshy.kz اقپارات اگەنتتىگى.
نۇرسۇلتان نازاربايەۆ جولداۋىندا قازاقستان پوليسەيلەرى تۋرالى دا ايتىپ ءوتتى.
«حالىق قۇقىق قورعاۋ ورگاندارى، ونىڭ ىشىندە ەڭ الدىمەن پوليسيا جۇمىسى تۇبەگەيلى جاقسارتۋىن كۇتىپ وتىر. قۇقىق قورعاۋ ورگاندارىن جاڭارتۋ كەرەك»، - دەدى نازاربايەۆ.
ەلباسى بۇعان دەيىن دە تالاي رەت قازاقستان پوليسەيلەرىنىڭ جۇمىسىن سىناعان بولاتىن.
«الەمدە پوليسەيلەر – كوشەدە كەتىپ بارا جاتقان ازاماتتىڭ، ادامنىڭ دوسى بولىپ ەسەپتەلەدى. ال بىزدە كىم؟»، - دەگەن ەدى نازاربايەۆ.
ەلباسى پوليسەيلەردىڭ بارلىعىن جۇمىستان شىعارىپ ورنىنا زاڭگەرلەردى العان گرۋزيانى مىسالعا كەلتىردى. قازاقستاندا دا مۇنداي شارا قولدانىلۋى مۇمكىن ەكەنىن جاسىرمادى.
پرەزيدەنت كوپ جىلدان بەرى قۇقىق قورعاۋ جۇيەسىنىڭ جۇمىسىنا سەرپىن كەرەك ەكەنىن ايتىپ، ونى حالىقتىڭ پوليسەيلەرگە دەگەن سەنىمى جوقتىعىمەن ءتۇسىندىرىپ كەلەدى.
قازاقستاندىقتاردىڭ پوليسەيلەردىڭ جۇمىسىنا كوڭىلى تولمايتىندىعى سپورتشى دەنيس تەندى الماتىنىڭ ورتالىعىندا، تاپا-تال تۇستە پىشاقتاپ ءولتىرىپ كەتكەندە ايرىقشا سەزىلدى.
سپورتشىنىڭ ءولىمى حالىق شىدامىنىڭ شەگى بولدى. قازاقستاندىقتار ىشكى ىستەر ءمينيسترى قالمۇحانبەت قاسىموۆتىڭ وتستاۆكاسىن تالاپ ەتكەن ەدى.
ەلىمىزدە مۇنداي جاعدايلاردىڭ ورىن الۋى مەن حالىقتىڭ كوپ جىلدان بەرى پوليسەيلەرگە سەنىمسىزدىك تانىتاتىنى ق ر ءىىم جۇمىسىنىڭ وسالدىعى ەكەنى جاسىرىن ەمەس.
«قۇقىق قورعاۋ ورگاندارى مەن سوت جۇيەسىندەگى قىزمەتكەرلەرگە قاتال تالاپ قويۋ كەرەك. ولاردىڭ جۇمىسى، مورالدى-ەتيكالىق قالىبى كەرەمەت بولۋى شارت»، - دەگەن ەدى.
وسىدان ەكى جىل بۇرىن نۇرسۇلتان نازاربايەۆ حالىقتىڭ پوليسەيلەرگە دەگەن كوزقاراسى وزگەرۋى كەرەك ەكەنىن ايتىپ وتكەن. ولاردىڭ قىزمەتى ەڭ الدىمەن حالىققا كومەكتەسۋگە باعىتتالۋى كەرەك ەكەنىن ايتتى. الايدا ەكى جىلدان بەرى حالىقتىڭ قۇقىق قورعاۋ ورگاندارىنا دەگەن سەنىم ازايماسا، ارتپادى. ياعني ەكى جىلدان بەرى ناتيجە جوق.
ق ر پرەزيدەنتى بۇگىنگى حالىققا جولداۋىندا قۇقىق قورعاۋ ورگاندارىنىڭ جۇمىسىن ادەتتەگىدەي سىناپ وتكەنىن ەسكەرسەك، ىشكى ىستەر ءمينيسترى ورنىن بوساتۋى ابدەن مۇمكىن.
