بۇگىنگى ەلباسى جولداۋىنداعى ماڭىزدى ءارى وزەكتى باعىتتاردىڭ ءبىرى – قۇقىق ورگاندارىنىڭ رەفورماسى. ءوزىمىز كورىپ وتىرعانداي، قۇقىق قورعاۋ ورگاندارىنىڭ جۇمىسى بيىل ساراپشىلار قاۋىمداستىعى مەن حالىق تاراپىنان ەڭ كوپ تالقىلاۋعا يە بولعان تاقىرىپتاردىڭ ءبىرى. قوعام تاراپىنان قۇقىق قورعاۋ ورگاندارىن جاڭعىرتۋ جونىندە ءبىرقاتار پايىمدار ايتىلىپ، ۇسىنىستار بەرىلگەن بولاتىن. كۇن تارتىبىندەگى بۇل وزەكتى ماسەلەگە ەلباسى ماڭىزدى ءىس-شارالار كەشەنىن ۇسىنىپ، ناقتى تاپسىرمالار بەردى. بۇل ءىس-شارالاردىڭ باستى ماقساتى – ەڭ الدىمەن قۇقىق قورعاۋ ورگاندارىنا دەگەن حالىق تاراپىنان سەنىمدى ارتتىرۋ.

بۇل رەفورمالار الداعى ۋاقىتتا جۇرگىزىلگەن رەفورمالاردىڭ جالعاسى، ياعني 2010 جىلدان باستاپ ىشكى ىستەر مينيسترلىگىنەن ءبىرقاتار فۋنكسيالار ءبىلىم جانە عىلىم مينيسترلىگى، ادىلەت مينيسترلىگىنە بەرىلگەن بولاتىن، ياعني سايكەس ەمەس قىزمەتتەردى ءتيىستى قۇزىرلى ورگاندارعا بەرىپ، ىشكى ىستەر مينيسترلىگى اينالىساتىن ماسەلەلەر ءتىزىمىن ودان ءارى ناقتىلاۋ جانە رەتتەۋ قۇقىق قورعاۋ ورگاندارىنىڭ ءارى قاراي كاسىبيلەنىپ، ءوز قىزمەتتەرىن ساپالى اتقارۋعا مۇمكىندىك بەرەدى.

سونىمەن قاتار، قۇقىق قورعاۋ ورگاندارىنا دەگەن سەنىمنىڭ ارتۋىنا ىقپال ەتەتىن فاكتور – ولاردىڭ حالىقپەن جۇمىس ىستەۋ مەحانيزمدەرى مەن قۇرالدارى. بۇگىنگى سيفرلاندىرۋ ءداۋىرىن ەسكەرسەك، قۇقىق قورعاۋ ورگاندارى ءوز جۇمىستارىندا جەدەل اقپارات الۋ، حالىقتىڭ شاعىمدارى مەن سۇراۋلارىن وڭدەۋ ءارى تالداۋ، قوعامدىق پىكىردى ەسكەرۋ، كەرى بايلانىس سياقتى باعىتتارعا دا ەرەكشە نازار اۋدارۋى ءتيىس ەكەندىگىنە ۇلكەن ءمان بەردى.

جالپى العاندا، كاسىبي قىزمەت اتقاراتىن قۇقىق قورعاۋ جۇيەسى قوعامنىڭ الەۋمەتتىك ءال-اۋقاتىنىڭ، ءومىر سالتىنىڭ ارتۋىنىڭ نەگىزى ەكەنىن ەسكەرسەك، بۇل رەفورمالار ۋاقىتىلى ءارى وزەكتى.

جولدىبالينا الۋا،

قازاقستان رەسپۋبليكاسى پرەزيدەنتى جانىنداعى قازاقستان ستراتەگيالىق زەرتتەۋلەر زەرتتەۋلەر ينستيتۋتىنىڭ ءبولىم باسشىسى