بۇگىن ءبىلىم جۇيەسى، جەر، تۇرعىن ءۇي ماسەلەسى، قۇقىق قورعاۋ ورگاندارى وزگە دە وزەكتى تاقىرىپتاردى قاۋزاعان نازاربايەۆ جاستاردى دا نازاردان تىس قالدىرمادى. 2019 جىلدى جاستار جىلى دەپ جاريالاۋدى ۇسىندى، دەپ حابارلايدى Qamshy.kz اقپارات اگەنتتىگى.
«ءار قازاقستان ازاماتى رەفورمالاردىڭ ءمانىسىن، وتانىمىزدى وركەندەتۋ جولىندا ولاردىڭ ماڭىزدى ەكەنىن ءتۇسىنۋ كەرەك. ال مۇنى جەتكىزۋ ءبىزدىڭ مىندەتىمىز. «رۋحاني جاڭعىرۋ» باعدارلاماسىن ءبارى قولدادى. وعان قوسىمشا «بەس الەۋمەتتى باستامانى» كوتەردىك»، - دەگەن ەلباسى جاستار مەن وتباسى ينستيتۋتىن قولداۋ – مەملەكەتتىك ساياساتتىڭ باسىمدىعىنا اينالۋى ءتيىس ەكەندىگىن ەسكەرتتى.
«جاستاردىڭ بارلىق ساناتىن قولداۋعا ارنالعان شارالاردى تولىق قامتيتىن الەۋمەتتىك ساتىنىڭ اۋقىمدى پلاتفورماسىن قالىپتاستىرۋ كەرەك. كەلەسى جىلدى «جاستار جىلى» دەپ جاريالاۋدى ۇسىنامىن»، - دەدى نۇرسۇلتان نازاربايەۆ.
بۇعان قاتىستى ل.ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىندەگى تاريح فاكۋلتەتىنىڭ دەكانى تىلەگەن سادىقوۆ پىكىر ءبىلدىردى. ول ەلباسىنىڭ بۇگىنگى جولداۋىن «جاس ماماندارعا جارقىن جول اشقان بىردەن ءبىر جولداۋ» دەپ ەسەپتەيدى.
«ەلباسى ن.ءا. نازاربايەۆتىڭ بيىلعى جىلعى جولداۋىندا ەلىمىزدىڭ تىرەگى – جاستار ماسەلەسىنە جەتە ءمان بەرگەندىگىمەن اسا ماڭىزدى دەپ سانايمىز. قوعامنىڭ دامۋ ۇدەرىسىن ىلگەرىلەتۋدىڭ جەتەكشى كۇشى جاستار ەكەندىگى اقيقات دۇنيە. جولداۋدا جوعارى وقۋ ورىندارىنا ماماندىق الىپ شىققان جاستاردىڭ ءوز ماماندىعى بويىنشا جۇمىسقا تۇرىپ، ەلىمىزگە قىزمەت ەتۋى ماسەلەسى قوعامنىڭ دامۋ تەندەنسياسىن انىقتايتىن فاكتور ەكەندىگىنە زور ماعىنا بەرىلگەن.
وقۋ ءبىتىرۋشى تۇلەكتەردىڭ ماماندىقتارىنا سايكەس جۇمىس ىستەۋىنىڭ الەۋمەتتىك-ەكونوميكالىق استارى تۇپتەپ كەلگەندە ەلىمىزدىڭ دامۋ يندەكسىن انىقتايدى. بىلىكتى مامان شىعارۋ جانە ونى جۇمىسپەن قامتاماسىز ەتۋ ءبىلىم بەرۋشى جانە جۇمىس ۇسىنۋشى مەكەمەلەر اراسىنداعى بار بايلانىسقا جاڭاشا سيپات بەرەتىن بولادى. ەكونوميكالىق اسپەكتىدە ەلىمىزدىڭ وركەندەپ دامۋ ستراتەگياسى جۇزەگە اساتىن بولسا، ال الەۋمەتتىك تۇرعىدا جاس ماماننىڭ جاقسى ءومىر ءسۇرۋ قاعيداتتارى ورىندالاتىن بولادى. كاسىبي شەبەرلىگى شىڭدالعان مامان قوعامىمىزدىڭ ەكونوميكالىق تۇراقتىلىعىن قامتاماسىز ەتەدى.
ەلباسىنىڭ جولداۋى جوعارى وقۋ ورنى سالاسىندا قىزمەت ەتەتىن پەداگوگتارعا تىڭ سەرپىلىس اكەلىپ، جاڭا فورماتتا مامان دايارلاۋ جانە ونىڭ جۇمىسقا قابىلدانۋ تراەكتورياسىن ايقىنداۋداعى باستى باعدارىمىز»، - دەدى سادىق تىلەگەن.
ايتا كەتەيىك، ەلباسى 5 قازاندا اقوردا رەزيدەنسياسىندا حالىققا جولداۋىن جاريالادى. جولداۋىن جاريالاماس بۇرىن قازاقستاننىڭ بۇگىنگى كۇنگە دەيىنگى جەتىستىكتەرىن ءتىزىپ، الداعى جوسپارلاردى اتادى.
ەلباسى جولداۋىن ۇلتتىق تەلەارنالار مەن اقوردانىڭ فەيسبۋكتەگى رەسمي پاراقشاسى تىكەلەي ەفيردە كورسەتتى.
