بۇگىن بارسەلونادا ەسىمى الەمگە ايگىلى وپەرا ءانشىسى مونسەررات كابالە 85 جاسىندا قايتىس بولدى دەپ جازادى Qamshy.kz اقپارات اگەنتتىگى.  بۇل تۋرالى يسپانيانىڭ La Vanguardia باسىلىمى حابارلادى.

داڭقتى ءانشى تۇندە سان-پاۋ اۋرۋحاناسىندا كوز جۇمعان. قىركۇيەك ايىندا مونسەررات كابالەنىڭ ناۋقاستانىپ، بارسەلوناداعى اۋرۋحانالاردىڭ بىرىندە ەمدەلىپ جاتىر دەگەن اقپارات تاراعان ەدى. جۋرناليستەر ونىڭ قۋىق بەزى اۋىراتىنىن دا اشىق مالىمدەگەن.

مونسەررات كابالە 1933 جىلى بارسەلونادا دۇنيەگە كەلگەن. ول 1954 جىلى سول قالاداعى ليسەو تەاترى جانىنداعى كونسەرۆاتوريانى بىتىرگەن. ساحناداعى ەڭبەك جولىن 1956 جىلى بازەل وپەراسى ءانشىسى بولىپ باستاعان. 1960 جىلداردىڭ ورتاسىنا دەيىن كابالە ەۋروپاداعى ءتۇرلى وپەرا تەاترلارىندا ونەر كورسەتكەن.

1965 جىلى مونسەررا كابالە كارنەگي-حوللدا قويىلعان گاەتانو دونيسەتتيدىڭ "لۋكرەسيا بوردجيا" وپەراسىندا امەريكالىق ءانشى مەريلين حورننىڭ ورنىنا ساحناعا شىعىپ، ءان شىرقاعاننان كەيىن ونىڭ ەسىمى الەمگە تانىلعان. سول جىلى ول العاش رەت "مەتروپوليتەن-وپەرادا" ءان سالعان، كابالە ول جەردە 1980 جىلداردىڭ سوڭىنا دەيىن ونەر كورسەتتى.

جەرلەۋ ءراسىمى دۇيسەنبى كۇنى وتەدى دەپ جوسپارلانۋدا.