قازاقستاندىق جانە شەتەلدىك ب ا ق وكىلدەرى الدىندا سويلەگەن سوزىندە مەملەكەت باسشىسى سەربيا رەسپۋبليكاسىنىڭ پرەزيدەنتىنە قازاقستانعا العاش رەت رەسمي ساپارمەن كەلگەنى ءۇشىن ريزاشىلىق ءبىلدىرىپ، ەكى ەل اراسىنداعى ىنتىماقتاستىقتىڭ دامۋ قارقىنىن ەرەكشە اتاپ ءوتتى، دەپ حابارلايدى Qamshy.kz اقپارات اگەنتتىگى اقورداعا سىلتەمە جاساپ.
نۇرسۇلتان نازاربايەۆ بۇگىنگى وتكەن كەلىسسوزدەر ناتيجەسىندە قول جەتكىزىلگەن كەلىسىمدەرگە توقتالدى.
– ءبىزدىڭ جوعارى دەڭگەيدەگى كەزدەسۋلەرىمىز تاراپتاردىڭ ءوزارا بايلانىستاردى دامىتۋعا مۇددەلى ەكەندىگىن بىلدىرەدى. ەڭ الدىمەن، بۇل – ساۋدا-ەكونوميكا سالاسىنداعى كووپەراسيانى ودان ءارى ىلگەرىلەتۋ. ەلدەرىمىزدىڭ ەكونوميكاسى ءبىرىن-بىرى تولىقتىرىپ تۇرادى. جەتكىزىلەتىن ونىمدەر تۇرلەرىن كەڭەيتۋگە دايىنبىز، – دەدى قازاقستان پرەزيدەنتى.
مەملەكەت باسشىسى قازاقستان مەن سەربيا اراسىنداعى قاتىناستاردى ودان ءارى ىلگەرىلەتەتىن باسىم باعىتتاردى دا اتادى.
– ءبىز ساۋدا-ەكونوميكالىق ىنتىماقتاستىق جونىندەگى ۇكىمەتارالىق كوميسسيا الدىنا جاڭا مىندەتتەر قويدىق. جاقىندا بۇل كوميسسيانىڭ ەكىنشى وتىرىسى ءوتتى. وندا باسىم باعىتتار ايقىندالدى. ولار – اۋىل شارۋاشىلىعى، ونەركاسىپ، قۇرىلىس، كولىك، ەنەرگەتيكا جانە باسقا دا سالالار. ءبىز ازيا مەن ەۋروپا اراسىندا جۇك تاسىمالىن جەدەلدەتۋ ءۇشىن ءتيىستى ينفراقۇرىلىم قالىپتاستىرۋعا مۇددەلىمىز، – دەدى مەملەكەت باسشىسى.
قازاقستان پرەزيدەنتى قازىرگى ۋاقىتتا ەۋرازيالىق ەكونوميكالىق وداق پەن سەربيا اراسىنداعى ەركىن ساۋدا ايماعىن قۇرۋ ءۇشىن ساراپتامالىق كەلىسسوزدەر جالعاسىپ جاتقانىن اتاپ ءوتتى.
سونداي-اق، مەملەكەت باسشىسى كەلىسسوزدەر بارىسىندا وڭىرلىك جانە حالىقارالىق ساياسات ماسەلەلەرى تالقىلانعانىن ايتتى.
سوڭىندا مەملەكەت باسشىسى الەمدىك جانە ءداستۇرلى دىندەر كوشباسشىلارىنىڭ VI سەزىنە قاتىسۋعا شاقىرۋىن قابىل العانى ءۇشىن سەربيا رەسپۋبليكاسىنىڭ پرەزيدەنتىنە ريزاشىلىق ءبىلدىردى.
الەكساندر ۆۋچيچ قوناقجايلىق كورسەتكەنى ءۇشىن نۇرسۇلتان نازاربايەۆقا العىس ايتىپ، كەلىسسوزدەردىڭ جەمىستى بولعانىن اتاپ ءوتتى.
– مەنىڭشە، ورتالىق ازيادا استانا سياقتى قارقىندى وزگەرىپ ءارى وركەندەپ كەلە جاتقان قالا جوق. پرەزيدەنت نازاربايەۆتىڭ جانە ونىڭ كورەگەندىگىنىڭ، كۇش-جىگەرى مەن ىسكە بەرىلگەندىگىنىڭ ارقاسىندا قازاقستاننىڭ قول جەتكىزگەن جەتىستىكتەرى مەنى تاڭ قالدىرادى. سىزدەردىڭ «قازاقستان-2050» ستراتەگياسىندا بەلگىلەگەن ماقساتتارىڭىزعا جەتەتىندەرىڭىزگە كامىل سەنەمىن، – دەدى ا.ۆۋچيچ.
سەربيا رەسپۋبليكاسىنىڭ پرەزيدەنتى ەكى ەل اراسىنداعى ساۋدا-ەكونوميكالىق ىنتىماقتاستىقتىڭ ماڭىزدىلىعىن ايتىپ، ونى ءارى قاراي كۇشەيتۋ ءۇشىن زور الەۋەتتىڭ بار ەكەنىن اتاپ ءوتتى.
سونىمەن قاتار، سەربيا رەسپۋبليكاسىنىڭ پرەزيدەنتى ەكى مەملەكەتتىڭ حالىقارالىق دەڭگەيدە بىر-بىرىنە ءوزارا قولداۋ كورسەتۋىن نىعايتۋ قاجەتتىلىگىنە توقتالدى.
