جەتى ميلليوندىق پاتەر! استانادان ءدال وسىنداي باعاعا باسپانا الۋعا بولادى. بۇل شەنەنۋىنىكتەردىڭ ءسوزى. ونىمەن قوسا، كۇنى كەشە عانا «7-20-25» باعدارلاماسى اياسىندا ەلىمىزدىڭ مەملەكەتتىك قىزمەتكەرلەرىنە 1 ميللون تەڭگە كولەمىندە سەرتيفيكاتتار تاراتىلماق. اقشالاي سەرتيفيكاتتار بيۋجدەتتىك سالا قىزمەتكەرلەرى ءۇشىن العاشقى جارنانى جەڭىلدەتۋ ءۇشىن ازىرلەنگەن. ول ءۇشىن جەرگىلىكتى اتقارۋشى ورگاندار كەمىندە 50 ميلليون تەڭگە كولەمىندە اقشا ءبولۋى ءتيىس. بۇل تۋرالى ەۋرازيا ءبىرىنشى ارناسى حابارلايدى.
بەس جىلدان بەرى جىلجىمايتىن مۇلىك ساتۋمەن اينالىسىپ جۇرگەن عاريفوللا قونىس ەلوردانىڭ ءاربىر اۋدانىن بۇگە-شۇگەسىنە دەيىن بىلەدى. ءتىپتى، نارىقتاعى باعانى بەس ساۋساعىنداي جاتتاپ العان. ريەلتوردىڭ ايتۋىنشا، سوڭعى 5 جىلدا باس قالاداعى پاتەر باعاسى الدەقايدا وسكەن. ساتىپ الۋشالاردىڭ دا قاتارى سيرەپتى.
2013-2014-پەن سالىستىرعاندا 2018 جىلى باعا 12 پايىزعا كوتەرىلدى. بۇل ءبىر بولمەلى پاتەرلەردىڭ كوتەرىلگەندىگى. سول جاعالاۋدان 14-15 ملن، ءبىر بولمەلى، 40 شارشى مەتر پاتەردى الۋعا بولادى. ال ەندى وڭ جاعالاۋعا وتەتىن بولساق، ول رايونىنا بايلانىستى. بايقوڭىر، سارىارقا اۋداندارىندا 8-9 ملن باستالادى. الماتى اۋدانىندا 10-11 ملن تەڭگە كولەمىندە» - دەيدى ريەلتور عاريفوللا قونىس.
سول 15 ميلليوندىق پاتەردىڭ ءبىرىن العان جۇپار احمەتوۆا جۋىردا عانا قونىس تويىن تويلاعان. قالانىڭ قاق ورتاسىندا ورنالاسقان باسپانانى ۇزاق ىزدەپتى. كوڭىلىنەن شىققانى وسى. 39 شارشى مەترلىك پاتەر. ال جەتى ميلليونعا تابۋعا بولا ما دەگەنىمىزدە....
«جوق، ونداي باعا جوق مۇلدەم. ونداي بولسا، ەكى پاتەر ساتىپ الىپ وتىرمايمىن با. ءوزىم قۇرىلىس كومپانياسىندا جۇمىس ىستەگەندىكتەن، كوپ پاتەرلەردى ءبارىن سالىستىرىپ، بارلىعىنىڭ ارتىقشىلىعىن-كەمشىلىگىن بىلگەندىكتەن، وسى باعاعا، وسى رايوندا العانىما قۋانىشتىمىن. سەبەبى، مەنىڭ ويىمشا، ماعان ارزان پاتەر جولىقتى» - دەيدى قالا تۇرعىنى جۇپار احمەتوۆا.
دەگەنمەن مەملەكەت باسشىسىنىڭ الدىندا شىمىرىكپەي 7 ميلليون تۇرماق 3 ميلليونعا پاتەر الۋعا بولادى دەگەن جوعارى لاۋازىمدى شەنەۋنىكتەر ءالى دە ايتقانىنان تايماعان. ەل ەكونوميكاسىنىڭ تۇتقاسىن ۇستاپ وتىرعان مينيسترلەردىڭ ءوزى نارىقتاعى احۋالدان بەيحابار سىڭايلى.
- استانادا 7 ملن-عا ءۇي الۋعا بولا ما؟
-7 ملن-عا، بار شىعار، باعاسىنا قاراعاندا، - دەيدى پرەمەر-مينيستردىڭ ورىنباسارى ەربولات دوسايەۆ.
- 7 ملن-عا استانادا ءۇي بار بىزدە ءقازىر؟
- 7 ملن-عا؟ ارينە، بار.
- استانادا؟
- استانادا ودنوكومناتنىي بار، - دەيدى ق ر ۇلتتىق ەكونوميكا ءمينيسترى تيمۋر سۇلەيمەنوۆ.
الايدا استانانىڭ 4 اۋدانىنان شارق ۇرىپ ىزدەپ، 7 ميلليون تۇراتىن پاتەر ىزدەپ تاپپادىق. تەك قالادان تىس جەردەن ىزدەستى.
استانادان 15 شاقىرىم جەردە ورنالاسقان «لەسنايا پوليانا » تۇرعىن ءۇي الابىنان 7 ميلليونعا ساتىلاتىن ءۇي تاپتىق. ول قانداي باسپانا؟ ونىڭ شارشى مەترى قانشا، بىرگە كورەيىك!
قوسشى اۋىلىنا قارايتىن شاعىن اۋدانداعى قۋىستاي بولمەنىڭ ءوزى 7 ميلليوننان باستالادى. اس بولمەسى مەن قوناق ءۇيى دە وسى. پاتەر قوجايىنىڭ سوزىنشە، بۇل باعا ەڭ ءتيىمدى. سەبەبى نارىقتا مۇنداي سوماداعى ءۇيدىڭ ساپاسى سىن كوتەرمەيدى.
«25،8 كۆ مەتروۆ زا 7 ميللونوۆ.. مەن 25،8 شارشى مەترلىك پاتەرىمدى 7 ميلليون تەڭگەگە ساتىپ جاتىرمىن. ال نەگىزىندە باعا 11 ميلليون تەڭگەدەن باستالادى. ءقازىر ساتىپ الۋشىلار از. ال نەگىزىندە قالادان مۇنداي باعادا ءۇي الۋ مۇمكىن ەمەس» - دەيدى قالا تۇرعىنى پاۆەل گريازنوۆ.
ال حالىقتى قولجەتىمدى باسپانامەن قامتۋى ءتيىس "7-20-25" باعدارلاماسى دا ەلباسىنىڭ سىنىنا ۇشىراعانى بەلگىلى. سەبەبى، باعدارلاما اياسىندا تەك 2000 عانا ءوتىنىشى قابىلدانعان. ماسەلەنى تەز ارادا شەشپەك بولعان اتقامىنەرلەر نەبارى 2-3 كۇننىڭ ىشىندە پيلوتتىق جاڭا جوبانى ازىرلەدى. يپوتەكالىق ۇيىمنىڭ مالىمەتىنشە، 50 مىڭ بيۋجەتتىك قىزمەتكەرلەرگە جىل سوڭىنا دەيىن 1 ميلليون تەڭگەدەن سەرتيفيكاتتار تاراتىلماق. ول قايتارىمسىز جانە نەسيە رەتىندە بەرىلەدى.
«بۇل جەردەگى ءبىزدىڭ جەرگىلىكتى اكىمشىلىكتەر شەشەتىن بولادى. قاي جەردە بەرىلىپ، قاي ۋاقىتتا قايتارىلاتىنىن. بۇل جەردە ءبىزدىڭ ۇسىنىسىمىز بويىنشا ەكى جوبا بار. ءبىرىنشىسى قايتپايتىن كومەك رەتىندە بەرىلەدى. ەكىنشىسى ۇزاق مەرزىمدى نەسيە پايىزسىز، قايتارىلىمى بار، نەسيە رەتىندە بەرىلەدى. مەملەكەتتىك قىزمەتكەرلەر دەگەن ەمەس، ءوزىمىزدىڭ ەلباسىمىزدىڭ ايتقانى بويىنشا بۇل سەرتيفيكاتتاردى مۇعالىمدەر، دارىگەرلەر، پوليسيالار جانە دە الەۋمەتتىك سالادا ىستەيتىن كىسىلەرگە» - دەيدى مەملەكەتتىك يپوتەكالىق ۇيىمىنىڭ باسشىسى قايرات التىنبەكوۆا.
قالاي دەسەك تە، سوڭعى ەكى ايدا ەلىمىزدىڭ ءۇش قالاسىندا ءۇيدىڭ باعاسى كۇرت قىمباتتاعان. وعان قوسا، ءۇيدى ساتىپ الۋشىلار مەن ساتۋشىلاردىڭ دا قاتارى ازايىپتى. ماسەلەن، ستاتيستيكا كوميتەتىنىڭ مالىمەتىنشە، ءبىر جىلدىڭ وزىندە استانادا كەلىسىمدەرىنىڭ سانى 2،4 %، الماتىدا 12 پايىزعا دەيىن قىسقارعان. ال مامانداردىڭ سوزىنشە تۇرعىن ءۇيدىڭ باعاسى مۇنىمەن توقتامايدى.
