انە، بايانى جوق بەس كۇننەن شەراعاڭ دا وتە باردى. نە قىلساق تا ەندى ونى قايتارا المايمىز. كوپ وكىنىش كوكىرەكتى قارس ايىرىپ، جۇرەكتى ەزگىلەۋدە... 
مەن ونىڭ قاسىندا كوپ ءجۇردىم عوي. قىستاي قاتۋلى كەزدەرىن دە، جازداي جايدارى شاقتارىن دا كوپ كوردىم. اقيقاتتى ايتقاندا كەسەك سويلەپ، ءىرى تۋرايتىن ەدى-اۋ، جارىقتىق. ءجا، جارايدى، ارىستانداي ايباتتى شەراعام تۋرالى ءالى تالاي شىندىقتى جازارمىن. بۇل جولى، ەسىمە ءتۇسىپ وتىرعان ءبىر عانا وقيعانى قىسقاشا باياندايىن. 
شەراعاڭ 70 جاسقا تولىپ جاتقان كەز ەدى. شەراعاڭنىڭ مەرەيتويى وتكەن سوڭ كوپ ۇزاماي پارلامەنت ۇكىمەتكە سەنىمسىزدىك ءبىلدىردى. شەراعاڭ سول پارلامەنتتىڭ بەلدى مۇشەسى بولاتىن. ءبارى «جەردى ساتۋ تۋرالى زاڭ جوباسىنىڭ» توڭىرەگىندەگى داۋعا بايلانىستى ءوربىدى. شەراعاڭ بەلسەنە كىرىسىپ، ۇكىمەتتىڭ جەردى ساتۋ جونىندەگى ۇسىنىستارىنا قارسى شىقتى. اقىرى سول ۇكىمەتتى تاراتىپ تىندى. ءبىر كەزدەسكەندە: 
– شەراعا! ۇكىمەت باسشىسى ءسىزدى 70 جاسىڭىزدا قاتتى كوتەرىپ ەدى. استانانىڭ تورىنەن ءۇش بولمەلى پاتەر سىيلاپ، كىتابىڭىزعا قىرۋار قارجى بولگىزدى. باسقالاي دا كومەگى از بولعان جوق. ەندى ول باسقارىپ وتىرعان ۇكىمەتكە قارسى شاپقانىڭىز ىڭعايسىزداۋ ەمەس پە؟ – دەپ ەدىم، شەراعاڭ:
– مۇكاممال دۇنيەگە باس يەتىن ادامىڭ مەن ەمەس. ۇكىمەتتىڭ باسشىسى بۇگىن بار دا ەرتەڭ جوق. ال حالىق ماڭگى! حالىقتىڭ تاعدىرى تارازىعا ءتۇسىپ جاتقاندا ماعان جەكە ادامنىڭ امبيسياسى كوك تيىن. نە قىلسا دا حالقىمدى ساتا المايمىن! – دەدى الىسقا كوز تىگىپ. سول ساتتە شەراعاڭدى شاۋ تارتسا دا شارىقتاۋدان جاڭىلماعان، قىراعى كوز تاۋ قىرانىنا ۇقساتتىم.
اقيقاتتىڭ الداسپانىنداي بولعان قايران شەراعام-اي! باقۇل بول! سەنى ۇمىتۋعا حالقىڭنىڭ حاقىسى جوق!

تەمىرعالي كوپباي