6 جىل تۋرالى 6 ابزاس
2012 جىل. الماتىعا العاش كەلگەن كەزىم. حاباردا «سونىمەن، سولاي دەيىك» دەپ جۇرگەندە «قازاقستان» ارناسىنا، «ايتۋعا وڭايعا» قۇدايدىڭ (سەرىك اباس-شاح كەيپىندە) ءوزى تاپ قالدى. جانار بايسەمىزوۆا دەگەن ەسىمدى دە ۇلتتىق ارنا تورىندە العاش ەستىدىم. سويتسەم، ءبىزدىڭ باستىق ەكەن. «ايتۋعا وڭايدى» قالايدا ەفيردەن ءساتتى شىعارامىز دەپ جۇرگەندە ءجيى كەزدەستىك.
ايتقانىنان قايتپايتىن، ءوز ءىسىن تياناقتى تىندىراتىن، كاسىبي مامان ەكەندىگى بىردەن بايقالاتىن. مەن دە ءوزىمدى جاڭا ورتادا، جاڭا قالادا ەركىن ۇستاۋعا تىرىستىم. جانار بايسەمىزوۆا دا سونى سەزگەن بولۋى كەرەك، بىردە مەنى ماقتاپ، اپكەلىك مەيىرىمدىلىك تانىتقانى قاتتى ەسىمدە قالىپتى. ودان كەيىن ول كىسىنى ۇلتتىق ارنانىڭ الماتىداعى فيليالىنان كورگەن ەمەسپىن.
ءبىر جىلدان استام ۋاقىتتان كەيىن مەن دە ۇلتتىق ارنامەن قوش ايتىستىم. «پروديۋسەر بول» دەگەن ۇسىنىستان باس تارتىپ، جان تىنىشتىعىن ورناتۋدى قالادىم. سەبەبى «ايتۋعا وڭايدان» كەيىن ءبىراز ەسەڭگىرەپ قالعانىم راس. ارادا جىلدار زۋلاپ ءوتتى.
2016 جىلدىڭ قىركۇيەگىندە بايسەمىزوۆا دەگەن فاميليا قايتادان الدىمنان شىقتى. «قامشىعا» ەندى عانا ورنالاسقان كەزىم بولاتىن، تانىس فاميليانىڭ «The lobster نەمەسە قازاق قوعامىنداعى «نەتاكتيچنىي» سۇراقتار» دەگەن اتاۋمەن بلوگ جاريالاعانىن كوزىم شالىپ قالدى. قالاي كىرىپ، ءبىر دەممەن وقىپ شىققانىمدى بايقاماي قالدىم. «بايدالىدان بايسەمىزوۆاعا جاۋاپ» دەگەن ماقالامدى رەداكتور دارحان مۇقانتەگىنىڭ «جانى اشىعان كەيىپپەن جىنعا تيەتىن سۇراق قوياتىندار بار. ول قانداي سۇراقتار؟» دەپ وزگەرتكەندە ءىشىم ءبىراز اشىدى.
2018 جىلى جانار تاعى الدىمنان شىقتى... ترەنەر، موتيۆاتور رەتىندە... ەكى جىل بۇرىن جازىلعان بايسەمىزوۆا بلوگىنىڭ ماعىنالىق تەرەڭدىگىن، ارتار جۇگىنىڭ اۋىرلىعىن جەتە تۇسىنبەگەنىمدى ەندى ءتۇسىندىم.
التى جىلدان كەيىن جانارعا ينستاگرامداعى «دايرەكت» (حابارلاما) ارقىلى حات جازدىم. الماتىدا ترەنينگ ۇيىمداستىراتىنىن ەستىگەنىمدى، مەن دە سوعان قاتىسقىم كەلەتىندىگىن ءوتىنىش رەتىندە ايتتىم. «جوق» دەمەدى.
7 قازان. 700 تەڭگەنىڭ جىرى
ترەنينگكە قايىن اپكەم نازگۇل ەكەۋمىز بىرگە باراتىن بولىپ شەشتىك. نەگىزى جۋرناليست جاناردىڭ موتيۆاتورعا اينالىپ كەتكەندىگىن نازگۇل ارقىلى ءبىلدىم. بىرتىندەپ ءوزىم دە جاناردىڭ ىلىمىنە قىزىعۋشىلىق تانىتتىم. قازاننىڭ جەتىسى كۇنى كەرەمەت كوڭىل-كۇيمەن ويانىپ، ترەنينگ وتەتىن جەر –اتاكەنتتەگى «اتالانتا» قوناقۇيىنە جەتۋگە اسىقتىق. ياندەكستىڭ تاكسيىن شاقىردىق. 700 تەڭگە ەكەن. اتاكەنتتەگى اتى شۋلى ءتيىننىڭ ارتىندا ورنالاسقان «اتالانتاعا» جەتۋىمىز مۇڭ بولدى. سويتسەم، ۆەلوسيپەدشىلەردىڭ مارافونى بولىپ جاتىر. ءبىز بولساق حابارسىزبىز. ەكى-ۇش رەت اينالىپ، ايتەۋىر جاقىن ماڭنان ءتۇسىپ قالدىق. باعدارشامنىڭ جاسىل ءتۇسى قاشان جانادى دەپ تۇرعانىمىزدا جانىمىزعا جانار جاقىندادى. التى جىلدان كەيىنگى كەزدەسۋ وسىلاي بولادى دەپ كىم ويلادى. ەڭ قۇرىعاندا ءبىر شوق گۇلدى ساتىپ الماعانىما وكىندىم. سەبەبى باقىتتان بال-بۇل جايناعان جاناردىڭ بەينەسى كوزىمە وتتاي باسىلدى. رۋحاني پراكتيكامەن اينالىسۋ ءۇشىن اتاعى دۇركىرەپ تۇرعان تۇستا جۋرناليستيكادان كەتۋى مەن ءۇشىن ەرلىككە پارا-پار. «مەنىمەن جاعالاسىپ، مارافون ۇيىمداستىرعاندارىن قاراساڭشى. مەنىڭ كەلەتىنىمدى قايدان ءبىلىپ قويعان» دەپ ازىلدەگەن ول ازداپ قوبالجىپ تۇرعانىن جاسىرمادى. مەن ىشتەي كەرىسىنشە ريزاشىلىق ءبىلدىردىم. جاناردىڭ ارقاسىندا قانشاما ەل-جۇرتتىڭ اۋزىنان تۇسپەگەن الماتىنىڭ اتاقتى ءتيىنىن بىرنەشە راكۋرستان اسىقپاي كورىپ شىقتىم.
18 ورىن تۋرالى 18 ءسوز
«اتالانتا». ءدالىز. ۇندىلەر. ءتىزىم. سىمبات. سەلفي. كونفەرەنس-زال. 500. 18. تۇرسىنبايەۆا. اسانبەردى. ساتىبالدييەۆا. ديكتوفون. كونسەنتراسيا. جارىق. شاپالاق. فوتوگراف. جانار...
2016 جىل تۋرالى 9 سويلەم
جانار ترەنينگتى باستاپ كەتپەس بۇرىن قاسىنا قۇربىسى اينۇر اسانبەردىنى شاقىردى. ول ءوز كەزەگىندە «ۇلكەن تۇرعاندا سويلەمەيمىن» دەپ كىشىلىك تانىتىپ، ساحناعا ايتىسكەر اقىن اينۇر تۇرسىنبايەۆانى شاقىردى. قۇرمەت ءبىلدىرىپ، ترەنينگكە قوناق رەتىندە كەلگەن حالىقتىڭ سۇيىكتىسى ءوز ومىرىنەن سىر شەرتتى. «2016 جىلى كوپتەگەن ادامعا اۋىر جىل بولعان سەكىلدى. مەن ءۇشىن دە سولاي بولدى. دەپرەسسيا دەگەنگە ۇشىرادىم. تۇڭعيىققا باتىپ بارا جاتقان جەرىمنەن امان قايتتىم. مەنى قۇتقارعان دۇنيە وسىنداي ترەنينگتەر بولاتىن. قازاق «قايعى ءتۇبى – تۇڭعيىق، باتاسىڭ دا كەتەسىڭ، تاۋەكەل ءتۇبى – جەل قايىق، وتەسىڭ دە كەتەسىڭ» دەپ بەكەر ايتپاعان. قاسىرەت شەككەننەن ءومىر وڭالمايتىنىن تۇسىنگەن مەن تاۋەكەلگە بەل بۋدىم. شۇكىر دەستىم. ترەنينگكە بارۋدان قورقۋدىڭ قاجەتى جوق» دەپ ويىن قورىتىندىلادى ول.
جاروكوۆ 124
اينۇردان كەيىن قولىنا ميكروفون العان جۋرناليست، نۋمەرولوگ اينۇر اسانبەردى ارماندار كارتاسىن 10 جىل بۇرىن جاساعاندا تۋعان-تۋىسى تاڭ قالىسىن جاسىرماي، جولداسى ەكەۋىن قياليلارعا بالاعانىن اشىپ ايتتى. ۋاقىت وتە كەلە ارماندارى اينا-قاتەسىز ورىندالعاندا ولاردىڭ تاڭىرقاعاندارى ءالى ەسىندە ەكەن. «بۇگىندە جولداسىم ەكەۋمىز 1000 ادامدى جۇمىسپەن قامتاماسىز ەتىپ وتىرمىز. ءبارى-بارى ترەنينگتەردىڭ ارقاسىندا. ادام ءوز ويىن باقىلاسا، ارمانداي بىلسە، الىنبايتىن قامال جوق ەكەنىنە كوزىمىز الدەقاشان جەتكەن. بىرەۋلەر بيزنەس اشاردا بۇل مەنىڭ ءساتتى جىلىم با دەپ نۋمەرولوگتاردىڭ كومەگىنە جۇگىنەدى. ءبىر ايتا كەتەتىنى، ءساتسىز پەريودتىڭ ءوزى ماكسيمۋم 2 جىلعا دەيىن جالعاسادى. تاباندىلىق تانىتىپ، ماقساتىڭىزدان اينىماساڭىز، بىرنەشە ايدا، جارتى جىلدا-اق بارلىق كەدەرگىلەردىڭ كوزىن جويا الاسىز. مىنا بيزنەسىم ءساتتى بولادى ما، بولمايدى ما دەپ بولجاعانشا ماركەتينگتىك زەرتتەۋ جۇرگىزگەن ابزال. ۇساق-تۇيەككە دەيىن ءبارى ەسەپتەۋلى بولسا، بيزنەس مىندەتتى تۇردە ءساتتى بولادى. مىسالى، ءوز باسىم الماتىداعى «تونۋس كلۋبتى» اشپاس بۇرىن جاروكوۆتىڭ بويىندا كۇندىز-تۇنى ارى-بەرى وتكەن قىز-كەلىنشەكتەردىڭ سانىن ساناۋمەن ايلار وتكىزدىم. كلۋبتىڭ تۇرعان ورنىن تاڭداۋدان قاتەلەسپەگەنىمە كوزىم ابدەن جەتكەندە عانا كەڭسەنى ساتىپ الدىم دا بيزنەستى باستاپ كەتتىم» دەدى اينۇر.
33 جاس، 38 جاس
33 جاسىندا يسا پايعامباردى (ع.س.)، 63 جاسىندا مۇحاممەد پايعامباردى (س.ع.س) اللا تاعالا كوككە الدىرتقان دەيدى. سوندىقتان دا جانار حانىمنىڭ ايتۋىنشا، بۇل جاسقا كەلگەندە ادام وزگەرىسكە دايىن تۇرادى. ءوز-وزىن ىزدەي باستايدى. «مىقتى جۋرناليست بولسام»، «تەكستى كۇشتى جازسام» دەپ ارمانداپ جۇرگەندە جاناردىڭ سانيتاركا بولىپ جۇمىس ىستەگەنى مەن ءۇشىن سەنساسيالىق جاڭالىق بولدى. «ءوز ماماندىعىممەن جۇمىس ىستەسەم» دەپ قۇدايدان جىلاپ تا، سۇراپ تا تىلەگەن تىلەكتىڭ ورىندالعانىن بىلەمىز. الەمنىڭ جارتىسىن ارالاپ، «شەتەلدەگى قازاق بالالارى» جوباسىن كوك جاشىككە شىعارىپ، قازاق تەليەۆيدەنياسىن ءدۇر سىلكىندىرگەن، قازاقستان جۋرناليستەر وداعىنىڭ مۇشەسى، «حالىقتىڭ سۇيىكتىسى» ۇلتتىق سىيلىعىنىڭ يەگەرى جانار بەيسەمىز-كولەسنيكوۆا 33 جاسىندا رۋحاني پراكتيكاعا دەن قويادى.
38 جاسىندا تۇرمىسقا شىعىپ، جۋرناليستيكامەن قوش ايتىسادى. قىز-كەلىنشەكتەرگە ارنالعان «ەشنارسەگە قاراماستان باقىتتى بول» دەپ اتالاتىن اۆتورلىق ترەنينگتەر وتكىزۋمەن اينالىساتىن جانار «ءسىز ترەنينگكە كەلدىڭىز، اسىعا كۇتكەن جەكسەنبىلىك دەمالىس كۇنىڭىزدى ماعان ارنادىڭىز، ءىلىم جيناۋعا كەلدىڭىز، دەمەك ءسىز ءوزىڭىزدى تانۋعا جول سالدىڭىز، سول ءۇشىن دە سىزدەرگە العىسىم شەكسىز» دەگەندى سان مارتە رەت قايتالاپ ايتتى. جالپى، ءار كۇندى اللاعا ماداق ايتۋدان، تاڭ اتقاندا ءتىرى بولىپ ويانعان ءۇشىن راقمەت ايتۋدان باستاۋعا كەڭەس بەردى.
5 مينۋت=5 ساعات
«تاڭەرتەڭ ەرتە تۇرۋدى ادەتكە اينالدىرىڭىز. ەرتە تۇرعان ايەلدىڭ ءبىر ءىسى عانا ارتىق ەمەس. ەرتە تۇرعان ادامنىڭ بويىندا ەرەكشە كۇش-قۋات، ەنەرگيا بولادى. وياتقىشتىڭ دىبىسىن ەستي سالا «بەس مينۋتتان كەيىن تۇرامىن» دەگەن ويدان ارىلىپ، بىردەن تۇرىپ كەتىڭىز. بەس مينۋتتان كەيىن تۇرساڭىز، ءومىرىڭىزدىڭ بەس ساعاتىن زايا كەتىردىم دەي بەرىڭىز. ءبىر مينۋت ارتىق ۇيىقتاعاننىڭ وزىندە ءبىر ساعاتىڭىز كەميدى. مۇنى تىكەلەي ماعىناسىندا تۇسىنبەگەن ابزال. ساعاتتىڭ ءتىلى ءوز ورنىندا تۇرعانمەن، بەرەكەسى بولمايدى» دەيدى جانار.
40 مينۋتتىق قۇلشىلىق
«ويانعاننان كەيىن بىردەن تۇرىپ كەتۋگە اسىقپاڭىز. ءتىرى بولىپ ويانعانىڭىز ءۇشىن راقمەت ايتىڭىز. بۇگىنگى كۇندى اللا رازىلىعى ءۇشىن وتكەرەتىنىڭىزدى ايتىڭىز. دۇنيەگە اكەلگەن اكە-شەشەڭىزدى ەلەستەتىپ، ولاردى رەنجىتكەن ساتتەر بولسا، كەشىرىم سۇراپ، جاساعان قامقورلىقتارى ءۇشىن ىشتەي العىس بىلدىرەسىز. اتا-ەنەگە دە ءسويتىڭىز. اتا-اناعا دا، اتا-ەنەگە دە سالەم سالۋدى ابىروي ساناڭىز. سول ارقىلى ءوز مەنمەندىلىگىڭىزدى باساسىز. كۇن سايىن دۋشقا تۇسۋگە كەڭەس بەرەمىن. 3 رەت راقمەت ايتىپ، سۋ ىشەمىز. جالپى، سۋ ىشەردە جاقسى وي ويلاپ، سۋدىڭ مولدىرلىگى مەن تاتتىلىگىنە ءمان بەرىپ، ىشكەن ابزال. سوسىن رۋحاني پراكتيكامەن اينالىسىڭىز. كۇنىنە 40 مينۋت قۇدايعا قۇلشىلىق ەتسەڭىز، ءومىرىڭىز وزگەرەدى»،- دەيدى جانار بايسەمىز.
ايەل ادامنىڭ فيگۋراسى = 8
«ايەل ادامنىڭ فيگۋراسى قانداي بولۋى كەرەك؟» دەپ ورتاعا ساۋال تاستادى جانار. زالدا وتىرعانداردىڭ بىرەۋى «گيتاراداي» دەپ ايعايلادى. زال دۋ كۇلدى. سويتسەك، جاۋابى سەگىز دەگەن سان ەكەن. جىر-داستانداردا ادەمى قىزدى قىپشا بەل دەپ سۋرەتتەيتىنىن بىلەمىز. الايدا ونىڭ رۋحاني پراكتيكاعا، ايەلدىڭ ەنەرگياسىنىڭ مولايۋىنا قاتىسى بار دەپ ەش ويلاماپپىن. جاناردىڭ ايتۋىنشا، نازىك جاندىنىڭ بەلى جىڭىشكەرگەن سايىن ەنەرگياسى تاسيدى.
كارى قىزدارعا 7 كەڭەس
-جىگىت ىزدەيمىن دەپ تۇنگى كلۋبقا، رەستورانعا بارماڭىز؛
-سۇيمەگەنگە سۇيكەنبەڭىز؛
-«كارى قىزبىن» دەپ جىلاپ-سىقتاماڭىز. ءبارى ۋاقىتشا ەكەندىگىن ءتۇسىنىڭىز. جالعىزدىقتى قابىلداڭىز. وسى ۋاقىتتى ماعىنالى وتكىزىڭىز؛
-جۇمىسقا تىم بەرىلمەڭىز. كارەرا قۋامىن دەپ ەنەرگيانى سارقىپ الماڭىز!
-وتباسىلى ادامعا الدانباڭىز. جولاماڭىز؛
-فيزيولوگيا ءۇشىن، دەنساۋلىق ءۇشىن دەپ كۇناعا باتپاڭىز. ءبارى بوس اڭگىمە؛
-رۋحاني پراكتيكامەن اينالىسىڭىز.
85 بەت = 3000 تەڭگە
جانار بايسەمىز كىشكەنتاي كەزىندە جازۋشى بولامىن دەپ تە ارمانداعانىن ايتىپ بەردى. ءبىراق «نە تۋرالى جازامىن؟» دەگەن سۇراق مازا بەرمەگەنىن جاسىرمادى. كۇنى كەشە عانا «جانار بايسەمىزدىڭ رۋحاني پراكتيكاسى» دەگەن كىتاپ قالىڭ وقىرماننىڭ قولىنا ءتيدى. وز-وزىنە سەنىپ، اقىلى مەن قايراتى الىپ شىققان جاناردىڭ كىتابىن ساتىپ الۋعا اسىققان جانداردىڭ ءبىرى مەن بولدىم. 85 بەتتىك دۇنيەنى ەكى ساعاتتاي ۋاقىتتا وقىپ شىقتىم. ءبىراق كوڭىلىمە توقىپ شىقتىم دەي الماسپىن. بۇل كىتاپ قولىمنان تۇسپەيتىن كىتاپقا اينالاتىنىنا ءشۇبام جوق. الدىن-الا ەسكەرتەيىن، جاناردىڭ بۇل كىتابىندا ەشقانداي عىلىمي جاڭالىق جوق. الايدا شىنايى ءومىر بار. اپكەنىڭ سىڭلىلەرىنە ايتار اقىلى بار.
قالعانى قۇپيا بولسىن…
