لاس-ۆەگاستا بولعان جەكپە-جەكتەن كەيىنگى داۋ ءالى كۇنگە دەيىن ءوز شەشىمىن تاپپادى دەپ جازادى Qamshy.kz اقپارات اگەنتتىگى. ەسكە سالساق، داعىستاندىق حابيب نۇرماعامەدوۆ ءتورتىنشى راۋندتا كونوردى تۇنشىقتىرۋ تاسىلىمەن جەڭگەن بولاتىن. مۇنى كۇتپەگەن جانكۇيەرلەر شۋلاي جونەلىپ، كونوردىڭ كومانداسىنداعى ديللونا دانيس پەن حابيب نۇرماعامەدوۆتىڭ اراسىندا توبەلەس باستالدى. كەيىن كونور مەن ءحابيبتىڭ كومانداسىنداعى جاس سپورتشى زۋبايرا تۋحۋگوۆتىڭ اراسىندا دا كيكىلجىڭ باستالىپ، سوڭى توبەلەسسكە ۇلاستى. توبەلەسكە ارالاسقانداردىڭ قاتارىندا ابۋباكىر نۇرماعامەدوۆ پەن ەسەدۋللا ەميرگايەۆ تا بولعان.
UFC پرەزيدەنتى دەنا ۋايت كەلەڭسىز جايتقا بايلانىستى پرەسس-كونفەرەنسيا كەزىندە پىكىر ءبىلدىرىپ، كونور ماكگرەگورمەن توبەلەسكەن جىگىتتەردى الداعى بولاتىن جەكپە-جەكتەن شەكتەتەتىنىن ايتقان. الداعى ۋاقىتتا زۋبايرا تۋحۋگوۆ كونور ماكگرەگوردىڭ رەسەيلىك دوسى ارتەم لوبوۆپەن جەكپە-جەككە شىعۋ كەرەك بولاتىن. الايدا بۇل كەزدەسۋ كەيىنگە قالدىرىلىپ، ءتىپتى زۋبايرا تۋحۋگوۆتى UFC ۇيىمىنان شىعارىپ تاستاۋى مۇمكىن. وسىعان قاتىستى بۇگىن داعىستاندىق چەمپيون حابيب نۇرماعامەدوۆ UFC-گە قارسى شىقتى.
«مەنىڭ UFC-گە ايتار ءۋاجىم بار. نەگە كونوردىڭ كومانداسى اۆتوبۋسقا شابۋىل جاساعان كەزدە ەشكىمگە ەڭ بولماسا ەسكەرتۋ جاسامادىڭدار. ولار توپ بولىپ اۆتوبۋستاعىلارعا شابۋىل جاساپ، بىرنەشە ادام جاراقات الدى. نەگە سول كەزدە بىردە-بىرەۋىنە شەكتەۋ قويمادىڭدار؟ مەنىڭ وتباسىمدى، ءدىنىمدى، حالقىم مەن ۇلتىمدى بالاعاتتاعان ادام تۋرالى جاعىمسىز پىكىر ايتىلمايدى، ەسكەرتۋ جاسالمايدى. نەگە مەنىڭ كوماندامداعى جىگىتتەر عانا جازالانۋى كەرەك؟ ەكى كوماندا دا توبەلەسكە قاتىستى عوي. ەگەر مەنى توبەلەس باستادى دەپ ايىپتاساڭىزدار مەن وعان مۇلدەم كەلىسپەيمىن. مەن ولاردىڭ باستاعان توبەلەسىن اياقتادىم. جارايدى، كەز كەلگەن ايىپپەن مەنى جازالاڭدار. نەگە مەنىڭ باۋىرىم زۋبايرا تۋحۋگوۆ زارداپ شەگۋ كەرەك؟ ەگەر مەنى ءۇنسىز قالادى دەپ ۇمىتتەنسەڭدەر، وندا قاتتى قاتەلەسەسىڭدەر. سىزدەر كونوردى ۇرعانى ءۇشىن زۋبايرانىڭ كەزدەسۋىن كەيىنگە شەگەرىپ، ءتىپتى ونى ۇيىمنان شىعارىپ تاستايىن دەپ شەشىم شىعارعالى جاتسىڭدار. الايدا مەنىڭ كوماندام مەن كونور اراسىنداعى توبەلەستى كونوردىڭ ءوزى باستاعان. كامەرادان قاراساڭدار بارلىعى كورىنىپ تۇر. ەگەر مەنىڭ باۋىرىمدى ۇيىمنان شىعارىپ تاستاساڭدار، مەنەن دە ايىرىلدىم دەپ ويلاي بەرىڭدەر. بىزدە، رەسەيدە دوسىن نە باۋىرىن ەشقاشان جارتى جولدا تاستاپ كەتپەيدى. مەن سوڭىنا دەيىن بارامىن. سونىمەن بىرگە جىرتىلعان كەلىسىمشارتتى ماعان جىبەرۋدى ۇمىتپاڭدار. ايتپەسە كەلىسىمشارتتى ءوزىم پارشا-پارشاسىن شىعارىپ جىرتىپ تاستايمىن. ايتپاقشى ۇمىتىپ بارادى ەكەنمىن، سەندەر بەرمەي وتىرعان مەنىڭ گونورارىمدى وزدەرىڭە قالدىرساڭدار بولادى. ءبىز ءوز نامىسىمىزدى ەشتەڭەگە ايىرباستامايمىز جانە جەكپە-جەك كەزىندە نامىسىمىزدى ساقتاپ قالدىق. بۇل باستىسى جانە باۋىرلارىمىز ءۇشىن سوڭىنا دەيىن بىرگە بارامىز»، دەدى حابيب نۇرماعامەدوۆ.
سونىمەن بىرگە UFC سپورتشىسى يسلام ماحاچيەۆ تە ءوزىنىڭ باۋىرلارىمەن بىرگە ەكەنىن جەتكىزدى.
"مەن UFC ءۇشىن اسا ماڭىزدى سپورتشى ەمەس تە شىعارمىن. الايدا مەنىڭ باۋىرلارىمنىڭ قۇقىعىنا شەكتەۋ قويىلىپ جاتقان جەردە مەن دە ونەر كورسەتكىم كەلمەيدى"، دەپ مالىمدەدى.
سوڭعى جەكپە-جەكتەگى كاسىبي جەڭىستەن كەيىن حابيب نۇرماعامەدوۆ ءوز اشۋىن تىزگىندەي الماي كوپشىلىكتى كوڭىلىن تۇسىرگەن بولاتىن. الايدا ءبىراز ۋاقىت وتكەننەن كەيىن داعىستاندىق چەمپيوننىڭ نە ءۇشىن مۇنداي ارەكەتكە بارعانى تۇسىنىكتى بولدى. سونىمەن بىرگە نۇرماعامەدوۆتىڭ ءوزى دە بولعان جايتقا وكىنبەيتىندەي كورىنگەن. بىرىنشىدەن ماكگرەگوردىڭ سەكۋندانتى ديپلون دانيس ءحابيبتىڭ سەنىمىنە قاتىستى بالاعات سوزدەر ايتقانىن ەسكەرگەن ءجون. سەبەبى باسقالار ءۇشىن قايدام، حابيب ءۇشىن بۇل اسا ماڭىزدى تاقىرىپ بولدى. ەكىنشىدەن جەكپە-جەكتىڭ الدىندا كونور عانا ەمەس ۇيىمداستىرۋشىلار دا ءحابيبتىڭ اشۋىنا ءتيىپ، شوۋ جاساعىسى كەلدى. ال داعىستاندىق تاۋ حالقىنىڭ قىزۋقاندىلىعىن بىلدىرتپەۋگە تىرىسىپ، ءوزىن بارىنشا سابىرلى كورسەتتى. ماكگرەگوردىڭ قاسىنا ءبىر توپ جىگىتتەردى جيناپ الىپ اۆتوتۇراقتاعى حابيب وتىرعان اۆتوبۋسقا شابۋىل جاساۋى دا شوۋدىڭ كورىنىسى دەپ ساناۋعا بولادى. سەبەبى بۇل جايتتان كەيىن وقيعاعا ەش قاتىسى جوق، جازىقسىز ەكى ازامات، رەيۋ بورگۋ مەن مايكل كيەسۋ زارداپ شەكتى. ال UFC ەشقانداي رەاكسيا بىلدىرمەدى، ءتىپتى ەسكەرتۋ دە جاسامادى.
Zubaira Tukhugov، peso-pena da equipe de Khabib Nurmagomedov invade octógono e agride Conor McGregor. #ufc229 #mcgregorvskhabib pic.twitter.com/GaujOBWE8h
— ◉ WHO IS... ◉ (@1tweetqualquer) 7 وكتيابريا 2018 گ.
ال ءقازىر UFC ادىلەتتى شەشىم شىعارۋعا تىرىسىپ، وكتاگونعا رۇقساتسىز سەكىرىپ كىرىپ، كونوردى ۇرعان زۋبايرا تۋحۋگوۆتى ۇيىمنان شەكتەتكەلى جاتىر. ءيا، داعىستاندىق جىگىتتىڭ ارەكەتى دۇرىس بولمادى، ونىڭ ماكگرەگورعا شابۋىل جاساۋى دا قاتە. ءبىراق كوكەيدە ءبىر ساۋال قالدى. ماكگرەگوردىڭ اۆتوبۋسقا شابۋىل جاساۋى دۇرىس ءارى ادىلەتتى مە؟ ەكى UFC سپورتشىسىن جارالاعان جايتتان كەيىن، اتالمىش شابۋىلعا قاتىسقان ارتەم لوبوۆتى نە سەبەپتى جەكپە-جەكتەن شەكتەتپەدى؟
ەندىگى كەزەكتە اتى دارداي كومپانيا مەن تانىمال سپورتشىلاردىڭ قانداي مامىلەگە كەلەتىنى قىزىق بولايىن دەپ تۇر. UFCء-دىڭ ەندى عانا تانىلىپ كەلە جاتقان باستى جۇلدىزدان باس تارتۋى اقىماقتىق بولار. ال زۋبايرا تۋحۋگوۆ پەن ارتەم لوبوۆتىڭ جەكپە-جەگى دە كوپشىلىكتىڭ قىزىعۋشىلىعىن ارتتىرۋدا. مۇمكىن ۇيىمداستىرۋشىلار اتالمىش جەكپە-جەكتى كەيىنگە قالدىرۋ ارقىلى كورەرمەن جيناۋدى كوزدەپ وتىرعان شىعار. كىم ءبىلسىن؟! سەبەبى UFC-دەگى كەز كەلگەن جەكپە-جەكتە ونىڭ پرەزيدەنتى دەنا ۋايت قانا جەڭىسكە جەتەدى. سپورتشىلار تەك قانا UFC پرەزيدەنتىنىڭ قولجاۋلىعى ىسپەتتەس.
