كەشە، ياعني 11 قازاندا بايقوڭىر ايلاعىنان ۇشىرىلعان "سويۋز مس-10" عارىش كەمەسىنەن اقاۋ شىعىپ، سونىڭ سالدارىنان كەمە اپاتقا ۇشىراعان، دەپ جازادى Qamshy.kz اقپارات اگەنتتىگى. 

زىمىران-تاسىعىشىنىڭ ۇشىپ، ەكيپاج وتىرعان كاپسۋلا ودان اجىراپ، "بالليستيكالىق تومەن باعىت الۋ رەجيمىمەن" جەرگە قايتا بەت العانىنا كۋا بولعان مارعۇلان سەيسەمباي Facebook پاراقشاسىندا اپاتتىڭ ۆيدەوسىن جاريالاپ، كوزىمەن كورگەنىن جازدى.

«بۇگىن بايقوڭىردا "سويۋز سم-1" xالىقارالىق (رەسەي/اقش) ەكيپاجىمەن باسقارىلاتىن عارىش كەمەسىنىڭ ۇشۋى مەن اپاتىنا كۋا بولدىم. 60 سەكۋندتان كەيىن ءبىرىنشى بولىگى ۋاقىتىنان ەرتە ءبولىنىپ عارىش كەمەسى قۋاتىنان ايىرىلىپ عارىشكەرلەردىڭ كاپسۋلاسى جەزقازعان قالاسىنان 20 شاقىرىم جەرگە كەلىپ قوندى. عارىش كەمەسى قاڭقاسىنىڭ قۇلاعان جەرىن ءالى بەلگىلەنۋدە. اللاعا شۇكىر، عارىشكەرلەر امان ەسەن. عارىش كەمەسىنىڭ جانار مايى - كەروسين. جەرىمىز بۇلىنبەدى. بۇل "سويۋز" كەمەلەرىنىڭ 1975 جىلدان بەرى ءبىرىنشى قۇلاعانى. مەن كەمەنىڭ ءساتتى ۇشىرىلعانى مەن اپاتقا ۇشىراعانىنىڭ كۋاسى بولدىم»، - دەپ جازدى مارعۇلان سەيسەمباي.

•بايقوڭىردان ۇشىرىلعان "سويۋز" كەمەسىندە توتەنشە جاعداي ورىن الدى (ۆيدەو)

جەلى قولدانۋشى عارىش كەمەسىن ۇشىرۋ ءساتى – تۋريستىك پوتەنسيالى بار شارا ەكەنىن، الايدا قازاقستان ونى كادەسىنە دۇرىس پايدالانا الماي جاتقانىن دا ايتىپ ءوتتى.

«تۋريستەر كوپ ەكەن. 500-700 تۋريست بولدى. وقۋشىلار دا بولدى. تۋريستەردىڭ جاعدايىن ويلاستىرماعان. كوپ جەرلەردە دارەتxانا جوق. عارىشتى ۇشىرۋ پروسەسسى جاي اسپانعا كۇندەلىكتى ۇشاق جىبەرگەندەي بولدى. جولدارى جامان، قۇلاپ جاتقان ۇيلەردەن باسقا كىشكەنتاي قالاشىقتار دا قۋراپ جاتىر. نەگە رەسەيلىكتەر بۇنى جوندەمەيدى، نەگە بۇعان دۇرىس قارامايدى؟ دەگەن سۇراققا رەسەيلىكتەر "بۇل قازاقستاننىڭ جەرى، ءبىز جالعا الىپ وتىرمىز" دەپ جاۋاپ قايتارادى. ال بىزدىكىلەر ءوز جەرىندە وگەي بالانىڭ كۇيىن كەشۋدە” دەپ جازدى مارعۇلان سەيسەمباي.