اقمولا وبلىسىندا قۇقىق قورعاۋ ورگاندارى، قۇتقارۋشىلار مەن ەرىكتىلەر وسىمەن ءۇشىنشى تاۋلىك جۇمباق جاعدايدا جوعالىپ كەتكەن ەر ادامدى ىزدەستىرىپ جاتىر دەپ جازادى Qamshy.kz اقپارات اگەنتتىگى sputniknews.kz سايتىنىڭ دەرەگىن نەگىزگە الىپ.

39 جاستاعى الەكساندر ۆيكتوروۆيچ پەترۋحيننىڭ جوعالىپ كەتكەنى تۋرالى حابار بۋراباي اىىب-گە 11 قازاندا تۇسكەن. تۋىسقاندارىنىڭ ايتۋىنشا، پەترۋحين 10 قازان كۇنى بۋراباي اۋدانىنا اقىلباي اۋىلىنىڭ ماڭىنداعى كىشى شاباقتى كولىنە بالىق اۋلاۋعا كەتكەن. وتباسى كەشكە قاراي ونىمەن بايلانىسقا شىعا الماعان. كەلەسى كۇنى تۋىسقاندارى پوليسياعا جۇگىنگەن. 

ەر ادامدى ىزدەۋگە بۋراباي ءاىىب جەكە قۇرامى جۇمىلدىرىلدى. ارنايى ىزدەۋ توپتارى قۇرىلدى. پەترۋحيننىڭ اۆتوكولىگى سۋ قويماسىنىڭ جاعاسىنان تابىلعان. كولىكتىڭ ىشىندە ەر ادامنىڭ قۇجاتتارى بولعان. 

قازىرگى تاڭدا ىزدەۋ شارالارى جالعاسىپ جاتىر، توتەنشە جاعدايلار دەپارتامەنتىنىڭ قىزمەتكەرلەرى مەن ەرىكتىلەر دە تارتىلدى.