تاتارستان استاناسى قازان قالاسىندا الاش اقىنى ماعجان جۇماباي ۇلىنىڭ 125 جىلدىعىنا ارنالعان حالىقارالىق عىلىمي-پراكتيكالىق كونفەرەنسيا ءوتتى. تاعىلىمدى شارانى «ءححى عاسىرداعى فيلولوگيا جانە ونەرتانۋ» اتتى جاستاردىڭ ءىى عىلىمي مەكتەبى اياسىندا ع.يبراعيموۆ اتىنداعى ءتىل، ادەبيەت جانە ونەر ينستيتۋتى ۇيىمداستىردى. تاتارستان عىلىم اكادەمياسىنىڭ سالتانات زالىندا ينستيتۋت ديرەكتورى كيم ميننۋلين كىرىسپە سوزىندە «ماعجاننىڭ جىرلارى تاتار حالقىنا، كۇللى تۇركى قاۋىمىنا ءقادىرلى، اقىن كىتاپتارى قازان قالاسىندا جارىق كوردى، ول تاتار شايىرلارىمەن تىعىز شىعارماشىلىق بايلانىستا بولدى»،- دەدى. جيىن باسىندا قازاقستان رەسپۋبليكاسىنىڭ قازانداعى گەنەرالدى كونسۋلى ە.تۋكۋموۆ قۇتتىقتاۋىن ءبىلدىرىپ، ەكى حالىقتىڭ دوستىعىن نىعايتاتىن وسىنداي رۋحاني شارالاردىڭ ماڭىزى زور ەكەنىن ايتتى. قازاق، تاتار، باشقۇرت، قاراقالپاق، ءازىربايجان عالىمدارى ماعجاننىڭ شىعارماشىلىعىن تالداپ، تاعدىرى مەن تاعىلىمدى مۇراسى جايلى بايانداما جاسادى. ماعجاننىڭ كىتابىن تاتار تىلىنە اۋدارىپ، جەكە جيناق رەتىندە شىعارعان تاتارستاننىڭ حالىق اقىنى راديف گاتاش، ءازىربايجان تىلىنە ءتارجىمالاعان پروفەسسور، بەلگىلى تۇركىتانۋشى راميز اسكەر تاماشا ادەبي سالىستىرۋلار جاساپ، قازاق شايىرىنىڭ پوەزياسىن بيىك باعالادى.

كونفەرەنسيادا ارنايى شىعارىلعان «تاتار-قازاق ادەبي بايلانىستارى جانە ماعجان جۇماباي ۇلى شىعارماشىلىعى» اتتى كىتاپتىڭ تۇساۋكەسەرى بولدى. قازاق حالقىنىڭ ۇلكەن دوسى، پروفەسسور حاتيپ ميننەگۋلوۆ ەكى ادەبيەت اراسىنداعى بايلانىستىڭ تەرەڭدە جاتقانى جايلى وي ءبولىستى. ا.بايتۇرسىن ۇلى اتىنداعى ءتىل ءبىلىمى ينستيتۋتىنىڭ ءبولىم مەڭگەرۋشىسى، فيلولوگيا عىلىمدارىنىڭ دوكتورى، الاشتانۋشى ورىناي جۇبايەۆا ماعجاننىڭ لينگۆيستيكالىق جانە پەداگوگيكالىق مۇراسىنا، ل.ن.گۋميليەۆ اتىنداعى ەۋرازيا ۇلتتىق ۋنيۆەرسيتەتى قازاق ادەبيەتى كافەدراسىنىڭ دوسەنتى قايىربەك كەمەڭگەر اقىننىڭ قازاق ادەبيەتىندەگى ورنىنا، تاتار ادەبيەتىمەن بايلانىسىنا توقتالدى. ونەر زەرتتەۋشىسى، ءداستۇرلى ءانشى، قازاقستاننىڭ ەڭبەك سىڭىرگەن ءارتىسى سەرىك وسپان اقىن ليريكاسى جايلى ايتىپ، قازاق حالقىنىڭ ىقىلاسىن «ءسۇي، جان ساۋلەم»، «جۇلدىزدى جۇزىك، ايدى القا عىپ بەرەيىن» سىندى ماعجان سوزىنە جازىلعان اسەم اندەرمەن جەتكىزدى. ا.بايتۇرسىن ۇلى اتىنداعى ءتىل ءبىلىمى ينستيتۋتىنىڭ ماگيسترانتى ادىلەت احمەت كوڭىلدەگى ءسوزىن ءوزىنىڭ جالىندى جىرىمەن ءبىلدىردى. مۇقاعالي ولەڭدەرىن ءتارجىمالاپ، تاتار تىلىندە جەكە كىتاپ ەتىپ شىعارعان تاتارستاننىڭ حالىق اقىنى روبەرت ميننۋلين قازاق حالقىنا ارناپ اسەرلى جىرلارىن وقىدى. شاراعا قازان قالاسىندا وقىپ جاتقان قازاقستاندىق ستۋدەنتتەر مەن ماگيسترانتتار قاتىستى.

الاش اقىنىن ارداقتاعان، ارۋاعىن قاستەرلەگەن، قازاق-تاتار ادەبي بايلانىستى، جالپى تۇركىلىك رۋحاني ىنتىماقتاستى دارىپتەگەن تاتار باۋىرلارعا، اسىرەسە ع.يبراعيموۆ اتىنداعى ءتىل، ادەبيەت جانە ونەر ينستيتۋتىنىڭ ديرەكتورى كيم ميننۋلينگە، قازان فەدەرالدى ۋنيۆەرسيتەتىنىڭ پروفەسسورى، فيلولوگيا عىلىمدارىنىڭ دوكتورى لەيلا مينگازوۆاعا ت.ب. تىلەكتەس ارىپتەستەرگە العىس بىلدىرەمىز.

ق.كەمەڭگەر