اياۋلى اقىن ءابدىراحمان اسىلبەكوۆتەن بۇگىن ايىرىلىپ قالدىق. ءومىرىنىڭ سوڭعى جىلدارىن اقىن كىتاپ جازۋعا ارناعانىن ءبىرى بىلسە، ءبىرى بىلمەيدى. بەيسەنعالي ەسەنالييەۆتىڭ ايتۋىنشا، مارقۇم ءابدىراحمان اقىنعا اللا تاعالا «قۇراندى ولەڭ قىلىپ جاز» دەپ ايان بەرىپتى.
♦اتاقتى "جار-جاردىڭ" ءسوزىن جازعان ءابدىراحمان اسىلبەكوۆ ومىردەن ءوتتى
«وسى كىتاپتى جارىققا شىعارىپ ۇلگەرەيىن» دەگەن ارمان-تىلەگى دە قابىل بولادى. قۇدايدىڭ كوزى تۋرا بولىپ، توعىز اي تولعاتىپ جازعان كىتابى كوكتەمدە عانا «كوكجيەك» باسپاحاناسىنان شىعىپ ۇلگەردى. قىركۇيەكتىڭ ورتاسىنان باستاپ اتالعان باسپاحانا ءابدىراحمان اسىلبەكتىڭ اۆتورلىعىمەن «قاسيەتتى قۇران – ماڭگىلىك مۇراڭ» دەگەن سۋ جاڭا كىتاپتى ساتىلىمعا شىعاردى. قۇران كارىمنىڭ اياتتارىن ولەڭ تۇرىندە جازىپ شىققان اقىننىڭ باقيلىق بولعانىن ەستىگەن باسپاحانا قىزمەتكەرلەرى ءبىز قوڭىراۋ شالعاندا ابدىراپ قالدى. ءبىز اقىرعى كىتابىنىڭ جازىلۋ سەبەبىن بىلگەندىكتەن، اۆتوردىڭ ءالعىسوزىن وقىرمان قاۋىمنىڭ نازارىنا ۇسىنىپ وتىرمىز. «كوكجيەك» باسپاحاناسى ءوتىنىشىمىزدى اياق استى ەتپەي، مارقۇمعا ءوز قۇرمەتىن بىلدىرە وتىرىپ، كىتاپتىڭ ءسوز باسىن رەداكسيامىزعا ۇسىندى.
ءسوزباسى
بيسميللاھير-راحمانير-راحيم!
اسا مەيىرىمدى، راحىمدى اللانىڭ اتىمەن باستايمىن.
مەنىڭ بۇل ماسەلەنى قولعا الۋىما تۇرتكى بولعان نارسە – قۇران كارىمنىڭ اسەم اۋەزى مەن قۇلاققا قونىمدى ءھام جۇرەككە جاعىمدى قىراعاتى ەدى. قۇران سۇرەلەرى اراب تىلىندە وقىلسا دا، ساي-سۇيەكتى سىرقىراتىپ، ونە بويدى شىمىرلاتىپ، ەرەكشە ءبىر سەرگەك سەزىمگە بولەيتىنى انىق. دەگەنمەن، قۇران اياتتارى ءتول تىلىمىزدەگى اۋدارمالاردان وقىلعاندا ءدال اراب تىلىندەگىدەي اسەر ەتە قويمايتىندىعى جاسىرىن ەمەس. بالكىم، اللا تاعالانىڭ تىلسىمنان تارتۋ ەتكەن ايانىنىڭ دا اسەرى شىعار «نەگە قۇران اياتتارىن تىلىمىزدەگى ويلى ورامدارمەن، مانەرلى ماقامدار، اسەم اۋەز، ۇيلەسىمدى ۇنمەن وقىلاتىنداي ولەڭ تۇرىندە جازىپ شىقپاسقا؟!» دەگەن پىكىر ورالا كەتتى. اقىرىندا، وسىنداي ەڭبەككە قاجىر-قايرات جۇمساۋدى جاۋاپكەرشىلىگىم دەپ سانادىم دا، اللانىڭ ءساتىن سالۋىمەن «ءبيسميللا» دەپ باستاپ كەتتىم. ارداقتى پايعامبارىمىز مۇحاممەدتى (ساللاللاھۋ ءالايھي ءۋا ءساللام) اراب قاۋىمى پايعامبار رەتىندە مويىنداماي قاسارىسىپ تۇرعان شاقتا قۇراننىڭ اۋەزدى اياتتارى باس يگىزىپ، ءدىن قابىلداۋلارىنا سەبەپ بولعان ەدى. دەمەك، دىنىمىزدە نەگىزى بار وسىنداي جاقسى ءداستۇر ءتول تىلىمىزدە جالعاسىن تاۋىپ جاتسا، نۇر ۇستىنە نۇر بولماق.
جالپى الەمنىڭ ءوزى ءبىر ىرعاققا نەگىزدەلىپ، بەلگىلى ءبىر اۋەزدىڭ بەسىگىندە تەربەلىپ، ەسەبى ءدال قۇدىرەتتىڭ قالاۋىمەن قوزعالاتىندىعى بەلگىلى. اللا تاعالانىڭ جاراتىلىس اياتتارىنىڭ مۇنداي ىرعاعى بولعاندا، نەلىكتەن قۇرانىنداعى اياتتاردىڭ ىرعاعى بولماسىن؟! سوندىقتان، قۇران كارىم اياتتارى قازاق تىلىندە دە ىرعاعىمەن جۇرەكتەرگە جەتە بەرسە ەكەن دەگەن ىزگى نيەتپەن وسى ءىستى قولعا الىپ وتىرمىز.
جاۋاپتى دا ساۋاپتى ءىستى اتقارۋ بارىسىندا جىبەرگەن قاتەلىكتەرىمدى كەشىرۋىن اللادان جالبارىنا سۇراپ، مۇسىلمان قاۋىمىنان كەمشىلىكتەرىم ءۇشىن ايىپ ەتپەۋلەرىن وتىنەمىن.
وسى ەڭبەكتىڭ قازاق حالقىنا جول تارتۋىنا جاردەم بەرگەن جاقىندارىم مەن جاناشىرلارىما قوس دۇنيەنىڭ يگىلىگىن تىلەپ، بۇل ەڭبەكتىڭ ساۋابى ورتاق بولسا ەكەن دەپ جالبارىنا سۇرايمىن.
دەمەيمىن حاق قۇراننان قيعاش كەتتىم،
كەي ءسوزدى ىرعاق ءۇشىن ۇيقاس ەتتىم».
ابدراحمان اسىلبەك
