2018 جىلدىڭ 17 قازانى رەسەي ءۇشىن قايعىدان قان جۇتقان كۇنگە اينالدى. قىرىمعا قاراستى كەرچ قالاسى ءالى كۇنگە دەيىن قارا جامىلىپ وتىر. 21 جەتكىنشەك كوللەدجگە ساباق وقۋعا كەتىپ، ىستىق ۇيالارىنا ورالمادى. قانشاماسى اياق-قولدان ايىرىلعان، اۋرۋحانادا وتا جاساۋ كۇنىن اسىعا كۇتىپ جاتىر. ولاردىڭ ءتىرى قالعاندارىنا اتا-انالارى باقىتتى. 17 قازان تاريح قويناۋىنا كەرچ تەراكتىسى بولىپ ەندى. 18 جاستاعى ۆلاديمير روسلياكوۆ بولسا رەسەيلىك باق-تىڭ تىلىمەن ايتقاندا و دۇنيەگە قاساپشى اتتاندى.
تەمەكى شەكپەگەن، سىرا ىشپەگەن، ساباقتان قاشپاعان، ەشكىممەن ارازداسپاعان ۆلاديمير روسلياكوۆتىڭ بيوگرافياسىنان رەسەيلىك جۋرناليستەردىڭ زەرتتەۋ جۇرگىزۋى ارقىلى بەلگىلى بولعان فاكتىلەردى وقىرمان نازارىنا ۇسىنا وتىرىپ، وسىنداي زۇلىمدىققا بارۋىنا نە تۇرتكى بولعانىن سارالاپ كورەيىك.
02 مامىر
2000 جىلدىڭ 02 مامىرى – روسلياكوۆتىڭ دۇنيەگە كەلگەن كۇنى. اكەسى دە، شەشەسى دە بار باقىتتى بالا. اكە-شەشەسىنىڭ اسىپ-تاسىعان بايلىعى بولماسا دا، ءۆلاديميردىڭ قارنىن توق قىلۋعا جاعدايلارى جەتەتىن. مەكتەپ تابالدىرىن العاش اتتاعان كەزدەن-اق ۆلاديمير اتا-انالارىنىڭ كوڭىلدەرىنە قاياۋ تۇسىرگەن ەمەس. №13 مەكتەپتە ۆلاديميرمەن بىرگە وقىعان سىنىپتاستارىنىڭ ايتۋىنشا، ول ءوز ورتاسىنىڭ گ ۇلى بولماسا دا، تىكەنەگى بولعان ەمەس. ەلدەن ەرەكشەلەنىپ تۇرماسا دا، نەگاتيۆ پەن ءازىل-وسپاقتىڭ نىسانىنا دا اينالعان جوق-تىن. «ول كادىمگى تىنىش وقۋشى بولاتىن. بىر-ەكى جاقسى ارالاستىن دوسى بولدى. مەكتەپتەن كەتكەننەن كەيىن دە ولار بايلانىستارىن ۇزگەن ەمەس»،- دەپ ەسكە الدى ءبىر سىنىپتاسى.
10 جىل بۇرىن
ءۆلاديميردىڭ اناسى يەگوۆا كۋاگەرى (رف-دا، قر-دا تىيىم سالىنعان سەكتا تۇرى-رەد.) ەكەندىگىن بۇكىل كورشى-قولاڭ بىلەتىندىگى جاسىرىن ەمەس ەكەن. ول كىسى 10 جىل بۇرىن سولارعا يمانداي سەنىپ، نانىم-سەنىمىن وزگەرتىپتى. يەگوۆانى جاراتۋشى رەتىندە تانىعان ايەل بالاسىنا دا باسقاشا قاراي باستاعانى ايتپاسا دا تۇسىنىكتى. دوستارىمەن بىرگە قىدىرۋعا، ويناپ-كۇلۋگە، كينوتەاترعا بارۋعا تىيىم سالعان ءۆلاديميردىڭ اناسى ۇلىنا قىرىق تىيىم جاساۋ ارقىلى وڭباي قاتەلەسكەنىن ول كەزدە بىلمەدى، سەزبەدى. سەبەبى سول كەزدەن باستاپ اناسىنىڭ ايتقانىنان شىقپاعان ۆلاديمير ۋاقىت وتە كەلە توماعا-تۇيىق جانعا اينالادى. قۇربى-قۇرداسىمەن ەمەس، كومپيۋتەرىمەن سىرلاسادى.
8 جىل بۇرىن
بالاسىنىڭ ءوزىن-وزى ءولتىرىپ قانا قويماي، كوللەدجىندە جارىلىس جاساپ، قاساپشىعا اينالعانىن ەستىگەن اكەسى بالاسىن كىنالامايتىنىن جەتكىزدى. جان جارىمەن 8 جىل بۇرىن ايىرىلىسقان ءۆلاديميردىڭ اكەسى بالاسىمەن دە 8 جىل بويى كورىسپەگەنىن، ارالاسپاعاندىعىن ايتتى. «ايەلىم بالامدى ماعان كورسەتكىسى كەلمەدى. ءبىزدىڭ قويان-قولتىق ارالاسۋىمىزعا ۇزىلدى-كەسىلدى قارسىلىق تانىتتى. مەن دە «قوش» دەدىم»، - دەپ جۋرناليستەرگە سىرىن اقتارىپتى. ۆلاديمير ەر جەتىپ، اكەسىنىڭ دەمەۋىنە مۇقتاج بولعان شاقتا اكەسىنىڭ نازارىنان تىس قالۋى ونى قامىقتىرىپ، پسيحولوگيالىق سوققى العانىن وقىرماننىڭ ءىشى سەزىپ وتىرعان شىعار. «ۆلاديميردەن ايىرىلدىڭىز. نە دەيسىز؟» دەگەن ءجۋرناليستىڭ سۇراعىنا سوعىستان كونتۋزيا العان اۋعان سوعىسىنىڭ ارداگەرى بىلاي دەپ جاۋاپ بەردى: «ول مەنىڭ قانىم، ول مەنىڭ سارعايا كۇتكەن بالام بولاتىن. ۆلاديمير قاراپايىم بالا بولىپ ءوستى. بالالارعا ارنالعان ادەبيەتكە قاتتى قىزىعاتىن. ال بۇگىن ول جاي عانا مۇردە. مۇردەنى كەشىرۋگە نەمەسە كەشىرمەۋگە بولمايدى. ءوز باسىم پراۆوسلاۆ ءدىنىنىڭ وكىلىمىن. بۇرىنعى ايەلىم يەگوۆا كۋاگەرى. ءۆلاديميردى شايتان ازعىردى دەپ بىلەمىن. باسقا ايتارىم جوق». ءۆلاديميردىڭ اكەسىن اۋلا بالالارى ماس كەزىندە ۇستاپ الىپ، تاياقتىڭ استىنا العاندارىن كورشى-قولاڭدارى جايىپ سالدى. تاعدىردىڭ تەزىنە ۇشىراعان ءۆلاديميردىڭ اكەسى قارۋ-جاراق تىعىلعان جەر بار ەكەندىگىن ايتقاندا ەشكىم سەنبەگەنى دە وسىدان.
ۆلاديمير روسلياكوۆتىڭ اجەسى كەزىندە ۇلاعاتتى ۇستاز بولعان جان ەكەن. ءقازىر جاسى 76-دا. اجەسى جاقىندا عانا 20 000 رۋبل اقشاسىنىڭ جوعالىپ كەتكەنىن باق-قا ايتىپ بەردى.
2017 جىلدىڭ قاڭتارى
مىنە، وسى ۋاقىتتان بەرى ۆلاديمير روسلياكوۆ تەراكتىگە دايىندالعان دەسەدى. كوللەدجدە كوڭىل-كۇيى كوتەرىلىپ، اشىلعان بويدا ءۆلاديميردىڭ ءبىر كۇنى شەتەلدەگىدەي بۇكىل كوللەدجدى قىرىپ سالعىسى كەلەتىندىگىن ايتقانىن گرۋپپالاستارى ەندى ەسكە ءتۇسىرىپ وتىر. الەۋمەتتىك جەلىدە اناتوليي سميرنوۆ دەگەن اتپەن قۇربىسىمەن حات الماسىپ وتىراتىن ۆلاديمير وعان دا وسىنداي جوسپارلارىنىڭ بار ەكەندىگىن ايتىپ قالعان. ارينە، ول كەزدە ەشكىم وعان ءمان بەرمەگەن. ءبىراق كورشى-قولاڭ ءۆلاديميردى مىسىق-يتتەردى قيناۋشى مانياك رەتىندە بىلەدى ەكەن. الايدا ىشتەگى اشۋ-ىزاسىن ماقۇلىقتان الاتىن ءۆلاديميردىڭ ەسكەرتۋلەرىنەن ول كەزدە ەشكىم سەكەم المادى.
1999 جىل
1999 جىلدىڭ 20 ساۋىرىندە اقش-تىڭ كولورادو شتاتىنداعى «كولۋمباين» مەكتەبىنىڭ ەكى وقۋشىسى ەريك حارريس پەن ديلان كليبولد وزدەرىنىڭ سىنىپتاستارىن، مۇعالىمدەرىن قىرىپ سالعان. بۇل جانتۇرشىگەرلىك وقيعا تاريح قويناۋىنا كولۋمباين تەراكتىسى رەتىندە ەندى. 13 ادامدى ءولتىرىپ، وتىز شاقتىسىن جارالى ەتكەن ەكى بوزبالا بۇل قىلمىسقا ۇزاق ۋاقىت دايىندالعان. ءتىپتى بۇل تۋرالى وزدەرى ارنايى قۇرعان سايتتا دا جازىپ وتكەن. الايدا ەشكىم ءمان بەرمەگەننىڭ ناتيجەسىندە ويعا العاندارى وڭاي ىسكە اسادى. ەڭ قىزىعى، كەرچتىك ۆلاديمير روسلياكوۆ وسى ەكەۋىن ۇلگى تۇتقان. كەرچ تەراكتىسىنىڭ جۇيەسى، ءۆلاديميردىڭ كيىنۋ ءستيلى، ءوزىن حارريس پەن كليبولد سەكىلدى كىتاپحانادا اتۋى – ءبارى-بارى سونىڭ ايعاعى. كولۋمباين تەراكتىسى تۋرالى تۇسىرىلگەن «كلاسس» دەگەن كينو دا روسلياكوۆتىڭ سۇيىكتى ءفيلمى ەكەن. ول بۇل تۋرالى بىرنەشە رەت گرۋپپالاستارىنا ايتقان. روسلياكوۆ دەگەنىنە جەتتى. 13 ەمەس، 21 ادامدى اجال قۇشتىرىپ، امەريكالىق «كۋميرلەرىن» شاڭ قاقتىرىپ كەتتى.
2014 جىل 07 شىلدە
ۆلاديمير روسلياكوۆ «ۆكونتاكتە» الەۋمەتتىك جەلىسىندە ۆلاد روسلياكوۆ دەگەن اتپەن تىركەلگەن. پاراقشاسىنا كوز جۇگىرتە وتىرىپ، ونىڭ ءپۋتيننىڭ فاناتى بولعاندىعىن بىردەن بايقاۋعا بولادى. ءپۋتيننىڭ فوتولارىن پاراقشاسىنا كوپ سالعان ۆلاديمير 2014 جىلدىڭ 07 شىلدەسىندە «بۇل مەملەكەتتى جەڭۋ مۇمكىن ەمەس» دەگەن توپتىڭ اگيتاسيالىق سۋرەتتەرىن بولىسكەنىن كورە الامىز. ول سۋرەتتەردە ءبارىن قىرىپ-جويۋعا دايىن رەسەيدىڭ اگرەسسيالى كەسكىن-كەلبەتى بەينەلەنگەن.
18 شىلدە 2018 جىل
ءدال وسى كۇنى ۆلاديمير روسلياكوۆ سەمفەروپول قالاسىنا ساپار شەگەدى. قىدىرۋ ءۇشىن ەمەس، مىلتىقتى قولدانۋ ەرەجەلەرىنىڭ قىر-سىرىن مەڭگەرۋ ءۇشىن. 6 ساعاتقا سوزىلعان ءدارىس ءۇشىن روسلياكوۆ «ەگيدا» ورتالىعىنا 4 000 رۋبل تولەپتى. سول ورتالىقتا روسلياكوۆقا ءدارىس بەرگەن ينسترۋكتور بىلاي دەپ ەسكە الادى: «ول مەنىڭ كوزىمە بىردەن ءتۇستى. ءبارىن بىلگىسى كەلەتىندىگى ۇنادى. ءبىز مىلتىقتى قالاي ۇستاۋ كەرەكتىگىن، قاۋىپسىزدىك شارالارىن، وقىس جاعدايدا كورسەتىلەتىن العاشقى مەديسينالىق كومەك تۋرالى ءسوز ەتەمىز. ودان كەيىن سىناق الامىز. مەن وعان بەس بالدىق شكالا بويىنشا ءتورت دەگەن باعا قويار ەدىم. ءبىزدىڭ ءدارىستى ءتامامداعاننان كەيىن قارۋ-جاراقتى ساتىپ الۋ ءۇشىن ليسەنزيا الۋ شارتتى».
08 قىركۇيەك 2018 جىل
جاڭا وقۋ جىلى باستالدى دەپ ەل-جۇرت قۋانىپ جۇرگەن كەزدە روسلياكوۆ جوسپارىن جۇزەگە اسىرۋعا بەلسەندى تۇردە كىرىسكەن. ول ليسەنزياعا قول جەتكىزگەننەن كەيىن قارۋ ساتىپ الۋعا اسىققان ەكەن. نازارى كاليبرى 12 ميلليمەترلىك، تۇركيالىق Hatsan Escort دەگەن پومپتىق مىلتىققا تۇسەدى. بۇل مىلتىق نىساناعا ۇنەمى ءدوپ تيمەگەنىمەن، دىبىستىق قۋاتتىلىعى زور بولاتىن. جانە مۇنداي مىلتىقتاردىڭ وقتارىن تەز اۋىستىرۋعا بولادى. وسىنداي ەرەكشەلىكتەرگە روسلياكوۆ ءمان بەرگەن بولسا كەرەك. 21 ادامنىڭ ءومىرىن جالماعان مىلتىق ساتىلعان دۇكەن بۇگىنگى تاڭدا جابىق تۇر. دۇكەن ءوز جۇمىسىن قايتادان جانداندىرا ما بەلگىسىز.
13 قازان 2018 جىل
روسلياكوۆ مىلتىقتى ماقساتتى تۇردە ساتىپ العانى ايان. ەندىگى كەزەكتە ول وق ساتىپ الۋدى كوزدەدى. وقتى باسقا دۇكەننەن ساتىپ الۋدى ءجون دەپ شەشەدى. روسلياكوۆقا وقتى ساتقان دۇكەننىڭ ديرەكتورى اناتوليي لۋنيەۆ بىلاي دەيدى: «13ء-شى قازان كۇنى كەلدى. مىلتىق ۇستاۋعا رۇقسات قاعازىن كورسەتتى».
وسىنىڭ بارىنە 18 جاستاعى ۆلاديمير روسلياكوۆ قايدان اقشا تاپتى دەگەن زاڭدى سۇراق تۋىندايدى. سەبەبى مىلتىققا 20 000-داي، 15 قوراپ وق ءۇشىن 6 000-داي، اتۋ كلۋبىندا ءدارىس الۋ ءۇشىن 4 000 رۋبل كەتكەن. سونىمەن قاتار مىلتىقتى جاسىرۋ ءۇشىن سەيف ساتىپ العانى، ليسەنزياعا اقشا تولەگەنى بەلگىلى. اجەسىنىڭ 20 000 ءرۋبلىن ۇرلاعان ۆلاديمير دەلىك، ال قالعان 20 000-دى روسلياكوۆ كىمنەن الدى؟
17 قازان 2018 جىل
ەكى كۇن “اۋىرىپ قالدىم» دەپ ساباققا بارماعان ۆلاديمير بۇل كۇنى كوللەدجگە كەشتەۋ شىعادى. اناسىنىڭ جۇمىسقا كەتكەنىن كۇتكەن بولۋ كەرەك. رويالكوۆتاردىڭ ۇيىنەن كوللەدجگە دەيىن 15 شاقىرىم. ۆلاديمير №41ء-شى اۆتوبۋسقا وتىرىپ، ءبىر ساعاتتاي جول جۇرەدى. قولىندا اۋىر جولسومكە. ىشىندە مىلتىق، ءدارى جانە جارىلعىش زاتتار... ايالمادان ءتۇسىپ، كوللەدجگە كەلەدى. ەشكىمنىڭ كوزىنە تۇسپەستەن كوللەدجگە ەنەدى. ول ارتىنا قاراپ بۇرىلمايدى...
80%
ۆلاديميرمەن بىرگە ءبىر توپتا وقىعان ستۋدەنت بالا عالامتوردى شارلاپ جۇرگەن اقپاراتتىڭ 80%-ى جالعان ەكەندىگىن ايتىپتى. «ءۆلاديميردى توپتا ەشكىم ۇرىپ-سوعىپ، ماسقارا ەتىپ، قاناعان ەمەس. ءبىزدىڭ توپتاعى بالالار بايسالدى. بىرەۋگە ادەيى سوقتىقپايدى. جانە روسلياكوۆ تا ءالجۋازداردىڭ قاتارىنان ەمەس. ول كەزىندە بوكس ۇيىرمەسىنە قاتىسقانىن بىلەمىز. بىردە بوكستىڭ قولعابىن كيىپ الىپ، ءبىر-بىرىمىزدى جەكپە-جەككە شاقىرعانبىز. سول كەزدە روسلياكوۆ توپتاعى ەڭ مىقتى، بىلەكتى دەگەن بالانى جىعىپ سالعانى شىندىق».
روسلياكوۆتىڭ «شابىت العان» كولۋمباين تەراكتىسىن جاساعان ەكى امەريكاندىق جىگىت كومپيۋتەر ويىندارىنا كىرىپ كەتكەندەرى سونشالىق پسيحيكالىق اۋىتقۋلارعا ۇشىراعان. بىرەۋى ءتىپتى پسيحياترعا ءجيى بارىپ تۇرعان. روسلياكوۆ تا الەمنەن وقشاۋلانىپ، كومپيۋتەرمەن دوس بولعان كۇنى تراگەديا باستاۋ الدى دەپ تۇسىنەمىز. سوندىقتان دا قادىرمەندى اتا-انا، بالاڭىز قانداي كومپيۋتەرلىك ويىن وينايدى، عالامتوردان قانداي اقپارات ىزدەيدى، ءبىلىپ ءجۇرىڭىز، جاعدايدى باقىلاۋدا ۇستاڭىز.
