قازاقستان قۇراماسى جاستار اراسىندا جالپىكوماندالىق ەسەپتە ءبىرىنشى جانە ەرەسەكتەر اراسىندا ەكىنشى ورىن الدى، دەپ حابارلايدى Qamshy.kz اقپارات اگەنتتىگى.

تۇركيادا ارمرەستلينگتەن وتكەن الەم چەمپيوناتىندا ەركىن ءالىمجانوۆ ەكى التىن جەڭىپ الىپ، ەكى دۇركىن الەم چەمپيونى اتاندى. ەلوردالىق «جىگەر» سپورت كلۋبىنىڭ تاربيەلەنۋشىسى حالىقارالىق دودادا ارداگەرلەر اراسىندا 75 كگ سالماق ساناتىندا ونەر كورسەتىپ، وڭ جانە سول قولمەن كۇش سىناسۋدا ءبىرىنشى ورىن الدى.

ارمرەستلينگتەن الەم چەمپيوناتىندا قازاقستان قۇراماسىنىڭ ساپىندا استانادان «تولاعاي» جوعارى سپورت شەبەرلىگى مەكتەبىنىڭ سپورتشىلارى دا ونەر كورسەتتى. ولار قازاقستاندىق كوماندانىڭ قورجىنىنا ءتورت جۇلدە سالدى: 2 التىن، 1 كۇمىس جانە 1 قولا. ق ر ەڭبەك سىڭىرگەن سپورت شەبەرى گەورگيي دزەرانوۆ 100 كگ سالماق ساناتىندا سول قولمەن كۇرەستە ءبىرىنشى ورىن الدى. ق ر حالىقارالىق سىنىپتاعى سپورت شەبەرى ءالىمجان مۇراتوۆ 80 كگ سالماق ساناتىندا سول قولمەن كۇرەستە ءبىرىنشى ورىن، وڭ قولمەن كۇرەستە ەكىنشى ورىن الدى.

ق ر سپورت شەبەرى ارمان راحمانقۇلوۆ 85 كگ سالماق ساناتىندا وڭ قولمەن كۇرەستە قولا جۇلدەنى قاناعات تۇتتى.

ارمرەستلينگتەن الەم چەمپيوناتى تۇركيانىڭ انتاليا قالاسىندا 12-21 قازاندا ءوتتى. جارىستا الەمنىڭ 40-تان استام مەملەكەتىنەن 1300 تارتا سپورتشى باسەكەگە ءتۇستى.