تۇركيا پرەزيدەنتى رەجەپ تايىپ ەردوعان ساۋد ارابياسىنىڭ وپپوزيسيالىق ءجۋرناليسى جامال حاشوگگيدى ءولتىرۋ وپەراسياسىنىڭ بىرنەشە كۇن بۇرىن جوسپارلانعانىن مالىمدەدى دەپ جازادى Qamshy.kz اقپارات اگەنتتىگى ازاتتىققا سىلتەمە جاساپ.
23 قازان كۇنى پارلامەنتتە سويلەگەن ەردوعان ساۋد ارابياسىنىڭ اگەنتتەرى تۇركياعا حاشوگگيدى ولتىرەتىننەن ءبىر كۇن بۇرىن كەلگەنىن ايتتى.
ەر-ريادتىڭ ساياساتىن سىنايتىن، Washington Post باسىلىمىمەن جۇمىس ىستەسكەن جۋرناليست جامال حاشوگگي 2 قازان كۇنى ستامبۋلداعى ساۋد ارابياسىنىڭ كونسۋلدىعىنا نەكەگە تۇرۋ قۇجاتىن الماق بولىپ بارعان سوڭ جوعالىپ كەتكەن.
ەردوعاننىڭ ايتۋىنشا، سول كۇنى ساۋد ارابياسىنان 15 ادامنان قۇرالعان ارنايى توپ كەلىپ، ولاردىڭ ۇشەۋى ستامبۋلداعى بەلگراد ورمانىن بارلاپ قايتۋعا بارعان.
بىرنەشە اپتا بويى حاشوگگيدىڭ تاعدىرىنا قاتىستى ءتۇرلى بولجام ايتىلىپ، 19 قازان كۇنى ساۋد ارابياسىنىڭ بيلىگى ونىڭ «كونسۋلدىقتا بولعان «توبەلەستە» قازا تاپقانىن مالىمدەگەن.
ەردوعان ساۋد ارابياسىنىڭ بيلىگى ءجۋرناليستى ءولتىرۋدى جوسپارلاعانداردى شەنىنە قاراماستان جاريا ەتۋى تيىستىگىن مالىمدەپ، كۇدىكتىلەردى ستامبۇلدا سوتتاۋعا شاقىردى.
تۇركيا پرەزيدەنتى قىلمىسكەرلەر حاشوگگيدى «قاتىگەزدىكپەن ولتىرگەنىن» ايتىپ، بۇل ءىستى جابۋلى كۇيدە قالدىرۋعا بولمايتىنىن مالىمدەدى.
پىكىر قالدىرۋ