فۋتبولدان قازاقستان قۇراماسىنىڭ بۇرىنعى كاپيتانى قايرات نۇرداۋلەتوۆ پەن دجيۋ-دجيتسۋ بويىنشا الەمنىڭ قولا جۇلدەگەرى گۇلجان التىنبەكوۆا جازاسىن وتەۋشىلەرمەن كەزدەستى، دەپ حابارلايدى Qamshy.kz اقپارات اگەنتتىگى استانا قالاسى اكىمدىگىنىڭ باسپا ءسوز قىزمەتىنە سىلتەمە جاساپ.
«استانا جاستارى» كمم قىلمىستىق-اتقارۋ جۇيەسى دەپارتامەنتىمەن بىرلەسىپ «ومىرلىك قيىن جاعدايعا تاپ بولعان الەۋمەتتىك جاعىنان قورعالماعان ساناتتاعى جاستاردى قولداۋعا باعىتتالعان پروفيلاكتيكالىق ءىس-شارالار» جوباسى اياسىندا تانىمال سپورتشىلار 166/5 تۇرمەسىندە وتىرعان جازاسىن وتەۋشىلەرمەن كەزدەستى.
«بۇل كەزدەسۋ جازاسىن وتەۋشىلەرگە قولداۋ ءبىلدىرىپ، قوعامنىڭ ءبىر بولشەگى ەكەندىگىن تۇسىندىرۋگە ارنالدى. بىزدە وسىنداي جەتى كەزدەسۋ جوسپارلانعان. سونداي-اق، جازاسىن وتەۋشىلەرمەن كەسكىندەمە ساباعىن وتكىزۋ جوسپاردا بار. قايرات نۇرداۋلەتوۆ جەكسەنبىدە جازاسىن وتەۋشىلەرمەن بىرگە فۋتبول ويناۋعا كەلىستى. ولار كەلەسى كەزدەسۋگە سەرىك ساپييەۆ پەن گەنناديي گولوۆكيندى شاقىرۋدى سۇرادى. ولارعا اتاقتى سپورشىلارمەن سويلەسۋ قىزىقتى»، – دەدى «استانا جاستارى» كمم-نىڭ ديرەكتورى ۇكىباي نۇرپەيىسوۆ.
كەزدەسۋ بارىسىندا سپورتشىلار جارىستارعا قالاي دايىندالاتىندارىن جانە الەمدىك جارىستاردا قازاقستان اتىنان سايىسقا ءتۇسۋدىڭ جاۋاپكەرشىلىگىن ايتتى. «جازاسىن وتەۋشىلەرگە اكىمدىك جاقسى كوڭىل بولۋدە. ال قوعام قايراتكەرلەرىنىڭ ولارمەن كەزدەسۋى ولارعا جىگەر بەرەدى. نەگىزىنەن جازاسىن وتەۋشىلەرگە ارناپ سپورتتىق سەكسيالار اشىلسا جاقسى، ويتكەنى سپورت ادامنىڭ تەك فيزيكالىق تۇرعىدا ەمەس جانە رۋحاني دامۋىنا دا ىقپال ەتەدى»، – دەيدى گۇلجان ناكيپوۆا.
ءىس-شارانىڭ ماقساتى – جازاسىن وتەۋشىلەرگە قولداۋ، ولاردىڭ الەۋمەتتىك بەلسەندىلىگىن ارتتىرۋ، ورتاعا بەيىمدەۋ جانە جۇمىسقا ورنالاستىرۋ.
«ولار قوعامنىڭ ءبىر بولىگى. جازاسىن وتەپ بولعان سوڭ ءبىزدىڭ ورتالىقتان كومەك سۇراسا بولادى. ەگەر ارنايى ءبىلىمى بولماسا دايىندىق كۋرسىنان ءوتىپ جۇمىسقا تۇرا الادى. جازاسىن وتەپ كەلگەندەر قوعامنان قالىس قالماۋى كەرەك، بىزدە ولارعا ارنالعان باعدارلاما بار»، – دەدى ءۇ. نۇرپەيىسوۆ.
پىكىر قالدىرۋ