«ازاماتتارعا ارنالعان ۇكىمەت» مەملەكەتتىك كورپوراسياسى الماتى قالاسى ناۋرىزباي اۋداندىق فرونت-وفيسىندە سيفرلىق قىزمەتتەردى تانىمال ەتۋگە ارنالعان اكسيا ءوتتى.

شاراعا ەسترادا جانە سپورت جۇلدىزدارى - «مۋزارت» توبىنىڭ انشىلەرى مەيرامبەك بەسپايەۆ، كەنجەبەك ءجانابىلوۆ، دجيۋ-دجيتسۋدان، جاۋىنگەرلىك سامبودان، جەكپە-جەكتەن سپورت شەبەرى، ISCP نۇسقاسى بويىنشا كاسىبي پانكراتيوننان الەم چەمپيونى، مما بويىنشا NOFC گران-پري ءتۋرنيرىنىڭ جەڭىمپازى ەرجان ەستانوۆ، ەرەجەسىز جەكپە-جەكتەن الەم چەمپيونى وسمانجان كاسيموۆ، انشىلەر رومان مايعازييەۆ، تالعات جورابايەۆ، رايىم ۋايىس جانە تاعى باسقا  تانىمال تۇلعالار قاتىسىپ، ناۋرىزباي اۋداندىق فرونت-وفيس كەلۋشىلەرىنە قىزمەت كورسەتتى.

اكسيا بارىسىندا ازاماتتارعا ەلەكتروندىق سيفرلىق قولتاڭبا (ەسق) الۋ، ءموبيلدى ۇكىمەتكە تىركەلۋ جولدارى كورسەتىلدى. جۇلدىزدار ەلەكتروندىق كەزەك تالونىن ۇسىنىپ، مەملەكەتتىك قىزمەتتەردى الۋ بويىنشا كەڭەس بەردى. تۇرعىنداردىڭ سيفرلىق ساۋاتتىلىعىن كوتەرىپ، ەلەكتروندىق قىزمەتتەردى ۇيدەن نەمەسە جۇمىس ورنىنان ءوز بەتىنشە الۋعا، «ەلەكتروندىق ۇكىمەت» ۆەب-پورتالى ارقىلى كوپ سۇرانىسقا يە انىقتامالاردى الۋعا ۇيرەتىپ، سمارتفون، پلانشەت ارقىلى ءبىر رەتتىك كود كومەگىمەن ءوز مالىمەتتەرىن تەكسەرۋ قىزمەتتەرىن كەڭىنەن ناسيحاتتادى. 

–حالىققا قىزمەت كورسەتۋ ورتالىعىنا ءجيى كەلىپ ءجۇرىپ، مۇندا قىزمەت كورسەتۋ وسىنشالىق جاۋاپكەرشىلىك پەن سابىرلىلىقتى، توزىمدىلىكتى تالاپ ەتەتىنىن بىلمەپپىن. تولاسسىز كەلىپ جاتقان ءار ءتۇرلى مىنەزدى ادامداردىڭ كوڭىلىن تاۋىپ، شارشاعانىڭدى سەزدىرمەي، تىك تۇرىپ قىزمەت ەتۋ، سۇراقتارىنا قاناعاتتانارلىقپەن جاۋاپ بەرۋ ەكىنىڭ ءبىرىنىڭ قولىنان كەلە بەرمەيدى. بۇل جەردە جۇمىس ىستەيتىن ازاماتتار بەساسپاپ ماماندار، ناعىز ءتوزىمدى جاۋىنگەرلەر دەر ەدىم. حقو قىزمەتكەرلەرى كۇنبە-كۇن ەنگىزىلىپ جاتقان سيفرلىق قىزمەتتەردى مەڭگەرە وتىرىپ، ونى وزگەلەرگە ۇيرەتىپ، ۇلكەن جۇمىس تىندىرىپ جاتىر ەكەن. ءبىز بۇگىن ولاردى قولداپ كەلىپ وتىرمىز. ءبىر كۇنگى ازعانتاي قولداۋىمىز، حالىق يگىلىگىنە جاراپ جاتسا، ماقساتىمىزدىڭ ورىندالعانى، – دەيدى ءانشى رومان مايعازييەۆ. 

قىزمەت الۋشىلار ءوز كۋميرلەرىنىڭ قولىنان انىقتامالار الىپ قانا قويماي، ولارمەن سۋرەتكە ءتۇسۋ مۇمكىندىگىن دە جىبەرىپ المادى.

 –ءاربىر ادام ءوز ۋاقىتىن ۇنەمدەپ، مەملەكەتتىك قىزمەتتەردى ونلاين الۋعا ۇيرەتۋ ماقساتىندا مۇنداي اكسيالاردى ۋنيۆەرسيتەتتەردە، ساۋدا ورتالىقتارىندا جانە ت.ب. ادامدار كوپ جينالاتىن ورىنداردا وتكىزىپ ءجۇرمىز، – دەيدى «ازاماتتارعا ارنالعان ۇكىمەت» مەملەكەتتىك كورپوراسياسى الماتى قالاسى فيليالىنىڭ PR-مەنەدجەرى جاڭىل اپەتوۆا.

       اكسيا اياسىندا ازاماتتارعا سيفرلىق قىزمەت الۋ جولدارى كورسەتىلگەن ارنايى پاراقشالار تاراتىلدى.

      كوپتەگەن مەملەكەتتىك قىزمەتتەردى ۇيدەن شىقپاي-اق الۋ ەش قيىن ەمەس. ول ءۇشىن pki.gov.kz  ارقىلى ەسق الۋعا ءوتىنىش بەرىپ، مەملەكەتتىك كورپوراسيانىڭ كەز-كەلگەن فرونت-وفيسىنە بارىپ ءوتىنىشىن راستاپ، قاجەت بولسا وزىنە-وزى قىزمەت كورسەتۋ سەكتورىنان قىزمەت الۋعا بايلانىستى  تولىق كەڭەس الۋىنا بولادى. ەسق-سىز دا ءبىر رەتتىك سمس حابارلاما ارقىلى 40- تان اسا مەملەكەتتىك قىزمەت ءتۇرىن جانە EgovKzBot تەلەگرام بوت  ارقىلى دا الۋعا بولادى.
     موبيلدىك ۇكىمەت پورتپلىنا كەز-كەلگەن حقو-دا نەمەسە  ەلەكتروندىق ۇكىمەت پورتالىنداعى جەكە كابينەتىڭىزدە تىركەلۋگە بولادى.

ەركىن قالدان