باتىس قازاقستان وبلىسىنداعى بەلەس اۋىلىنىڭ تۇرعىنى، فيزيكا ءپانىنىڭ ءمۇعالىمى شەرحان بايزەنوۆ دەنيس تەننىڭ ءولىمى جايلى جازعان جازباسى ءۇشىن 4 جىلعا سوتتالدى. بۇل تۋرالى Qamshy.kz اقپارات اگەنتتىگى Tengrinews.kz پورتالىنىڭ مالىمەتىنە سىلتەمە جاساپ حابارلايدى.

بايزەنوۆ ق ر قك 174-بابىنىڭ 1 ءبولىمى – الەۋمەتتىك، ۇلتتىق، رۋلىق، ناسىلدىك جانە ءدىني الاۋىزدىقتى تۋدىرۋ نەمەسە ناسيحاتتاۋ بويىنشا ايىپتى دەپ تانىلدى.

♦دەنيس تەن قايتىس بولدى

«بايزەنوۆكە 4 جىلعا شارتتى جازاعا كەسۋ تۋرالى جازا تاعايىندالدى. بايزەنوۆ الەۋمەتتىك جەلىدەگى پاراقشاسىنا ۇلتتىق وشپەندىلىكتى ناسيحاتتايتىن جازبا قالدىرعان. ول سوتتا ءوز كىناسىن تولىق مويىندادى. قىلمىستىق ءىستىڭ ماتەريالدارىنا سايكەس، بايزەنوۆ كىناسىن تولىق مويىندادى»، - دەپ حابارلادى ورال قالالىق سوتىنىڭ سۋدياسى قايرات وتەشوۆ.

سوت بايزەنوۆكە تاعايىندالعان جازانىڭ سەبەبىن دە ءتۇسىندىرىپ ءوتتى.

«بايزەنوۆ بۇدان بۇرىن سوتتى بولماعان، جەرگىلىكتى تۇرعىندار ونى جاقسى جاعىنان سيپاتتايدى، ءارى ازامات ءوز كىناسىن مويىندادى، وتباسىلىق جاعدايى دا بار. وسى جاعدايلاردى ەسكەرگەن سوت ەڭ جەڭىل جازانى قولداندى»، - دەپ پىكىر ءبىلدىردى وتەشوۆ.

♦دەنيس تەندى ءولتىردى دەگەن كۇدىكتى ۇستالدى

♦دەنيس تەندى ولتىرگەن ەكىنشى كۇدىكتىنىڭ سيپاتتاماسى پايدا بولدى

♦دەنيس تەندى ءولتىردى دەگەن كۇدىكتى قىلمىسىن قالاي ىسكە اسىرعانىن ايتىپ بەردى

ايتا كەتەيىك، بايزەنوۆتىڭ الەۋمەتتىك جەلىدەگى جازباسى جۇرتتىڭ نارازىلىعىن تۋدىرعان. ءمۇعالىمنىڭ ۇستىنەن شاعىم تۇسىرگەندەردىڭ قاراسى كوبەيدى. ول ساباق بەرەتىن مەكتەپتەگى وقۋشىلاردىڭ اتا-انالارىنا دەيىن شاعىمدانىپ، بالالارىنا «ونداي ءمۇعالىمنىڭ ساباق بەرگەنىن قالامايتىنىن» جەتكىزدى. بۇل جاعدايلاردان كەيىن بايزەنوۆ مەكتەپ ديرەكتورىنا كىرىپ، جۇمىستان شىعۋ تۋرالى ارىز جازىپتى.