ەسكەرتە كەتەتىن ءبىر جايت، تالاپكەرلەر ءۇشىن ۇلتتىق ءبىرىڭعاي تەستىلەۋدى قاڭتار ايىندا تاپسىرۋ مۇمكىندىگى تۋىپ وتىر. الايدا، قاڭتار ايىندا وتەتىن تەستىلەۋدەن كەيىن تالاپكەر جوعارى وقۋ ورنىنا تەك اقىلى نەگىزدە وقي الادى. ۇلتتىق ءبىرىڭعاي تەستىلەۋگە وتىنىشتەر 1-15 جەلتوقسان ارالىعىندا قابىلدانادى. مەملەكەتتىك ءبىلىم بەرۋ گرانتتارى نەگىزگى ۇبت تاپسىرىلعاننان كەيىن ۇلەستىرىلەتىن بولادى.  بۇل تۋرالى ءبىلىم جانە عىلىم مينيسترلىگىنىڭ باسپا ءسوز قىزمەتى Qamshy.kz اقپارات اگەنتتىگىنە حابارلادى.  

سونىمەن، ۇلتتىق ءبىرىڭعاي تەستىلەۋگە (ۇبت) كىمدەر قاتىسادى؟

– ورتا مەكتەپتەردىڭ 11-12 سىنىپ وقۋشىلارى (2019-2020 وقۋ جىلىندا جوو-دا اقىلى نەگىزدە وقۋ ءۇشىن). قاڭتار ايىندا وتەتىن بۇل تەستىلەۋ تۇلەكتەرگە نەگىزگى تەستىلەۋدىڭ الدىندا ءوز بىلىمدەرىن تەكسەرۋ ءۇشىن تاپتىرماس مۇمكىندىك. مەملەكەتتىك ءبىلىم بەرۋ گرانتىنا ۇمىتتەنگەن تالاپكەر 2019 جىلعى جازدا وتەتىن ۇبت-نى مىندەتتى تۇردە تاپسىرۋى قاجەت. ويتكەنى، قاڭتار ايىنداعى تەستىلەۋدە شەكتى بالل جيناعان تەستىلەنۋشى بۇل سەرتيفيكاتىمەن جوو-دا تەك اقىلى نەگىزدە وقي الادى؛

– جوو-عا ۋاقىتشا تىركەلگەن جانە ءبىرىنشى سەمەستردى اياقتاپ جاتقان ستۋدەنتتەر. بۇل تەستىلەۋدەن ستۋدەنت ءبىلىم الىپ جۇرگەن وقۋ ورنىنا رەسمي تىركەلۋ ءۇشىن جانە جوو-داعى وقۋىن جالعاستىرۋ ءۇشىن وتەدى. ەگەر ستۋدەنت شەكتى بالل (50 بالل) جيناي الماسا، وقۋدان شىعارىلاتىن بولادى.

ەستەرىڭىزگە سالا كەتەيىك، تەستىلەنۋشىلەر قاڭتار ايىندا وتەتىن ۇبت-عا قاتىسقاننان كەيىن ماۋسىم ايىندا وتەتىن ۇبت-عا قاتىسۋ جانە مەملەكەتتىك ءبىلىم بەرۋ گرانتتارىن تاعايىنداۋ بويىنشا وتەتىن بايقاۋعا قاتىسۋ مۇمكىندىگىنەن ايىرىلمايدى. تەستىلەۋگە قاتىسۋ ءۇشىن وتىنىشتەر ۇلتتىق تەستىلەۋ ورتالىعىنىڭ ۇبت تاپسىرۋ پۋنكتەرىندە قابىلدانادى. ءبىلىم جانە عىلىم مينيسترلىگى باسپا ءسوز قىزمەتىنىڭ حابارلاۋىنشا، قاڭتار ايىنداعى تەستىلەۋ اقىلى، قۇنى – 2242 تەڭگە.