نۇر قانات ۇلى دەگەن اتپەن فەيسبۋكتە تىركەلگەن ازامات ءوزىن بلوگەر، قازاقستاندىق كاسىپكەرلەر مەن قاراپايىم ازاماتتاردىڭ قۇقىعى مەن قىزىعۋشىلىعىن قورعايتىن قوعام بەلسەندىسى، جەمقورلىققا جانى قاس ادام رەتىندە سيپاتتايدى. ول ءوزىنىڭ فەيسبۋك پاراقشاسىندا كۇنى كەشە ورتاعا ءبىر ۇسىنىس تاستادى. نۇر قانات ۇلىنىڭ ايتۋىنشا، گرۋزيانىڭ بۇرىنعى پرەزيدەنتى ميحايل سااكاشۆيليدى قازاقستانعا شاقىرىپ، ۇكىمەتتى باسقارۋعا مۇمكىندىك بەرسەك، نۇر ۇستىنە نۇر بولادى. فەيسبۋكتە جاريالانعان جازبانىڭ اينا-قاتەسىز وقىرمان نازارىنا ۇسىنامىز:
«جاقىندا عانا ءوز جولداۋىن جاريالاعان ەلباسىمىز ەرىنشەك، ەنجار، ءوز مىندەتىن ورىندامايتىن شەندىلەردى قۋىپ، ولاردىڭ ورنىنا شەتەلدىك كاسىبي مامانداردى شاقىرامىن دەپ بىزدىكىلەردى قورقىتتى. مەنىڭ دە ەلباسىعا ايتار ناقتى ۇسىنىسىم بار. ميحايل سااكاشۆيليدى 5 جىلعا ەلىمىزگە شاقىرايىق، ءتىپتى بۇكىل كومانداسىمەن كەلسە قارسى ەمەسپىز. ەلباسىنىڭ قولداۋىمەن سااكاشۆيلي بىر-ەكى جىلدا ەل ىشىندە ءتارتىپ ورناتاتىنىنا سەنىمدىمىن. ناقتى اتقارعان ىستەرى ءۇشىن وعان بيۋدجەتتەن قوماقتى قارجى بەرىلسە دە قۇبا-قۇپ. باستىسى - ناتيجە. ءبىزدىڭ ۇكىمەتتى نەمەسە ەڭ قۇرىعاندا ءبىر ماڭىزدى ورتالىقتىڭ تىزگىنىن قولىنا العانىن قالايتىن ەدىم. ال ءسىز قالاي ويلايسىز؟»،-دەپ جازادى نۇر قانات ۇلى.
قوعام بەلسەندى نۇر قانات ۇلى بۇل ۇسىنىس ارقىلى ءوزىنىڭ قازاققا قانشالىقتى جانى اشيتىنىن كورسەتكىسى كەلدى مە الدە بۇل «لايك» جيناپ، تانىمالدىلىققا يە بولۋ ارەكەتى مە، بىلمەدىك. سااكاشۆيلي ۋكرايناعا بارعاندا دىم بىتىرمەگەنىن بىلەمىز. ىرىتكى سالىپ، ماسقاراسى شىعىپ، ەلدەن قۋىلدى. ءبىزدىڭ بيلىك ميحايلگە وڭ قاباق تانىتىپ، ەلگە شاقىرىپ، قولىنا قامشى ۇستاتقانىمەن سااكاشۆيلي ءبىر نارسە تىندىراتىنىنا كۇمانىمىز بار.
