ەلوردانىڭ 20 جىلدىعىن مەرەكەلەۋدىڭ اياسىندا جەرگىلىكتى گازەتتەر - «استانا اقشامى» مەن «ۆەچەرنيايا استانا» بەتتەرىندە جاريالانعان ماتەريالداردىڭ نەگىزىندە ەكى تىلدە ەلوردانىڭ كۇندەلىكتى تىرشىلىگى مەن ءار جىلى وتكەن ماڭىزدى دا قىزىقتى شارالار تۋرالى كىتاپتار باسپادان شىعادى، دەپ حابارلايدى Qamshy.kz اقپارات اگەنتتىگى استانا قالاسى اكىمدىگىنىڭ باسپا ءسوز قىزمەتىنە سىلتەمە جاساپ.

جوبا جەتەكشىسى قايسار جۇماباي ۇلى ماتەريالدار باسپاعا بەرىلمەس بۇرىن كوپتەگەن جۇمىستاردىڭ اتقارىلعانىن ايتادى.

«مۇنداي كىتاپتاردى شىعارۋ يدەياسى بىرنەشە جىل بۇرىن پايدا بولدى. «استانا اقشامى» مەن «ۆەچەرنيايا استانا» گازەتتەرىنىڭ بۇرىنعى نومەرلەرىندەگى ماتەريالداردى وقي وتىرىپ، مەن قالانىڭ قالاي وسكەندىگى، ونداعى قۇرىلىستىڭ قالاي جۇرگىزىلگەنى، ونىڭ دامۋ قارقىنى، ءتۇرلى كەڭ-اۋقىمدى ساياسي، مادەني ءىس-شارالار تۋرالى قىزىقتى ماتەريالدارمەن تانىستىم، قۇندى فوتوسۋرەتتەردى كوردىم. استانا تۇرعىندارى ءۇشىن 20 جىل ىشىندە ەلوردامىزدىڭ قالاي وزگەرگەندىگىن كورۋ قىزىق بولادى دەپ ويلايمىن. ەڭ الدىمەن بۇل ماتەريالداردى گازەتتەرىمىزدىڭ بەتتەرىندە ارنايى ايدارمەن جاريالاۋدى ءجون سانادىق. جىل باسىنان گازەتتەرىمىزدىڭ 20 ءنومىرىن بەلگىلى ءبىر جىلى جازىلعان ماتەريالدارعا ارنادىق. ەندى مىنە كىتاپتارىمىزدىڭ باسپادان شىققانىن كۇتىپ وتىرمىز»، - دەيدى «Elorda Aqparat» ءجشس-نىڭ ديرەكتورى قايسار جۇماباي ۇلى.

ول، سونداي-اق، ءار كىتاپتىڭ بىرەگەي ەكەندىگىن العا تارتتى.

«قازاق تىلىندە شىعاتىن كىتاپ «استانا اقشامى» گازەتىندەگى ماتەريالدارعا، ورىس تىلىندەگى كىتاپ «ۆەچەرنيايا استانا» گازەتىندەگى ماتەريالدارعا نەگىزدەلگەن. ءبىر قالاداعى شارالار بولعان سوڭ، ەكى كىتاپتاعى ماتەريالدار ۇقساس بولۋى مۇمكىن، ارينە. دەسەك تە، بۇل اۋدارما ەمەس. بۇل – ءار ءتۇرلى جۋرناليستەردىڭ جازعان ماقالالارى. كىتاپتىڭ اتاۋلارى ءالى بەكىتىلگەن جوق. ولار «ەلوردا شەجىرەسى» جانە «سەردسە موە – استانا» دەگەن اتاۋمەن شىعادى دەپ جوسپارلاپ وتىرمىز»، - دەپ ءبولىستى قايسار جۇماباي ۇلى.

ايتا كەتەيىك، استانانىڭ 20 جىلدىعىنا وراي باسىپ شىعارىلاتىن كىتاپتار وسى جىلدىڭ قاراشا ايىندا تانىستىرىلماق.