ق ر اقپارات جانە كوممۋنيكاسيالار ءمينيسترى داۋرەن ابايەۆ قوعامدا ءبىرشاما شۋ تۋعىزعان ۆلكسم-نىڭ 100 جىلدىعىن اتاپ ءوتۋ شاراسىنا قاتىستى ءوزىنىڭ پىكىرىن ءبىلدىردى.

«ءسىز ايتىپ وتىرعان شارانى (جۇرىزۋشىگە قاراتا - اۆت.) مۇشەلىك جارنانىڭ جيىنىمەن جانە (بالكىم - ابايەۆ) دەمەۋشىلىك اقشامەن قازاقستاننىڭ كوممۋنيستىك پارتياسى ۇيىمداستىرعان. مەملەكەتتىك بيۋدجەتتەن ءبىر تيىن دا شىققان جوق»، - دەدى داۋرەن ابايەۆ «حابار» ارناسىنداعى «اشىق ديالوگ» باعدارلاماسىندا.

مينيستر ءوز سوزىندە سونىمەن بىرگە، كومسومول كۇنىن اتاپ ءوتۋ الاش اۆتونومياسىنىڭ 100 جىلدىعىن كولەڭكەسىندە قالدىردى دەگەن پىكىرگە قاتىستى ويىن ايتتى.

«بۇل - تولىعىمەن شىندىققا سايكەس كەلمەيدى. ءبىر جاعىنان بىرنەشە ءجۇز ادام تەاترلاردىڭ بىرىندە شارا وتكىزەدى دە، ەكىنشى جاعىنان جىل بويى ەلىمىزدىڭ بارلىق ايماقتارىندا الاشتىڭ 100 جىلدىعىنا ارنالعان شارالاردىڭ تولىققاندى كەشەنى ۇيىمداستىرىلادى»، - دەدى مينيستر.

داۋرەن ابايەۆ ءوز ءسوزى دالەلدى بولا ءتۇسۋ ءۇشىن بىرنەشە مىسال كەلتىردى.

«بىرىنشىدەن، الاش قوزعالىسىنىڭ 100 جىلدىعىنا وراي 12 سەريالىق «تار زامان» سەريالى ءتۇسىرىلدى. ول «Qazaqstan» ۇلتتىق ارناسىندا كورسەتىلدى. سونىمەن بىرگە، كينوتەاترلاردا ونىڭ تولىقمەتراجدى نۇسقاسى بەرىلدى. ءدال سول سەكىلدى بىرنەشە ءفيلمنىڭ تۇسىرىلگەنىن اتاپ ءوتۋ كەرەك. ونىڭ ىشىندە «الاش تۋى استىندا» اتتى دەرەكتى ءفيلمدى دە ايتا كەتۋگە بولادى. مەملەكەت قارجىسىنىڭ ەسەبىنەن سەمەي قالاسىندا ءاليحان بوكەيحاننىڭ ەسكەرتكىشى ورناتىلدى. «الاش ارىستارى» مۋزەيىنىڭ ەكسپوزيسيالارى جاڭارتىلدى. ءتىپتى الاش قوزعالىسى تۋرالى ءبىرقاتار كىتاپ شىقتى. باق-تا ءبىرشاما ماتەريال جاريالاندى»، - دەدى مينيستر.

داۋرەن ابايەۆ سونىمەن بىرگە، وتكەن جىلدىڭ قىركۇيەك ايىندا الاشوردانىڭ 100 جىلدىعىنا ارنالعان ءىرى حالىقارالىق عىلىمي-پراكتيكالىق كونفەرەنسيا وتكەنىن ەسكە سالدى.

«ەستەرىڭىزدە بولسا، ول شاراعا قازاقستان رەسپۋبليكاسىنىڭ مەملەكەتتىك حاتشىسى گۇلشارا ءابدىحالىقوۆا قاتىسىپ، مەملەكەت باسشىسىنىڭ قۇتتىقتاۋ ءسوزىن وقىپ بەرگەن بولاتىن»، - دەدى داۋرەن ابايەۆ.

مينيستر سونىمەن بىرگە، كومسومول كۇنىن اتاپ ءوتۋ شاراسىندا «رۋحاني جاڭعىرۋ» باعدارلاماسىنىڭ لوگوتيپى ءىلىنىپ تۇرعانىنا قاتىستى پىكىرىن ايتتى.

«مەن بۇل رەتتە قوعامدىق دامۋ ءمينيسترى دارحان كالەتايەۆتىڭ پىكىرىمەن تولىق كەلىسەمىن. بىزدە تۇيمەدەي نارسەنى تۇيەدەي ەتەتىن داعدىمىز بايقالىپ قالىپ جاتىر. بۇنىمەن كۇرەسۋ كەرەك. مۇنداي اسىرا سىلتەۋدەن مەملەكەت تە، قوعام دا ۇتپايتىنىن ءتۇسىنۋ كەرەك. مەن تاعى دا قايتالايمىن: ۆلكسم-نىڭ 100 جىلدىعىن اتاپ ءوتۋ - مەملەكەتتىڭ يدەولوگيالىق ساياساتىمەن ورتاق تۇگى جوق. بۇل بۇرىنعى كومسومولداردىڭ قاتىسۋىمەن وتكەن جەكە شارا بولاتىن. ونى ەسكى دوستاردىڭ نەمەسە تۇلەكتەردىڭ كەزدەسۋىمەن عانا سالىستىرۋعا بولادى. ودان ارتىق ەمەس»، - دەيدى ول.

داۋرەن ابايەۆ ءوز سوزىندە اشىعىن ايتقاندا كومسومول قازاقستان ءۇشىن وتكەن كۇندە قالعانىن اتاپ ءوتتى.

«ءبىراق، ول وتكەن زاماندا قازاقستاندىقتاردىڭ تولىعىمەن بۋىنى ءومىر سۇرگەن. ءبىز بۇنى جوققا شىعارا المايمىز. كومسومول ارقىلى وتكەن ادامداردىڭ ءبىزدىڭ ەلگە سىڭىرگەن ەڭبەگىن دە جاسىرا المايمىز. ءقازىر بۇل شارانى سىناپ جاتقانداردىڭ كوبىنىڭ ءوزى دە كومسومول بولعان. ال بۇل شارا - ساياسي جيىن نەمەسە كوممۋنيزمگە دەگەن نوستالگيا ەمەس، بۇل - جاستىق شاقتارىن ەسكە العان ادامداردىڭ كەزدەسۋى»، - دەدى داۋرەن ابايەۆ.