پارتيالىقتار ەلباسىنىڭ جولداۋىنداعى تاپسىرمالاردىڭ ورىندالۋ بارىسىن باقىلاۋعا بەلسەنە كىرىستى. «نۇر وتان» ق ر پارلامەنت ماجىلىسىندەگى فراكسياسى ارقىلى مەملەكەت باسشىسى تاپسىرمالارىنىڭ ءتيىمدى ورىنداۋلى ءۇشىن جاسالعان ءنورماتيۆتى-قۇقىقتىق اكتىلەرگە قوسىمشا وزگەرىستەر ەنگىزۋدى جوسپارلاپ وتىر.

نۇرسۇلتان نازاربايەۆ حالىققا جولداۋىندا ەكونوميكاداعى باسەكەلەستىكتىڭ دامۋ جولى مەن تۇرعىن ءۇي كوممۋنالدىق شارۋاشىلىعى (تۇكش) قىزمەتىنىڭ تاريفتەرىنە اسا ءمان بەرگەن بولاتىن. ەلباسىنىڭ سوزىنشە، كوممۋنالدىق قىزمەت سالاسى مەن شىنايى مونوپوليانىڭ رەتكە كەلتىرىلۋىندە ءتيىمدى مونيتورينگ پەن باقىلاۋ جۇيەسى جاسالماعان. وسىعان وراي، پرەزيدەنت اتالمىش ماسەلەنى قاراستىرىپ، مونوپولياعا قارسى ۆەدومستۆو جۇمىسىن رەفورمالاۋ، باسەكەلەستىكتى ساقتاۋ فۋنكسياسىن كۇشەيتۋ جۇمىستارى ءۇشىن شەنەۋنىكتەرگە ءۇش اي ۋاقىت بەردى.

ەلباسى جولداۋىندا قاراستىرىلعان شارالاردى زاڭدى تۇرعىدا جۇزەگە اسىرۋ ماقساتىندا پارتيالىقتار «تۇرعىن ۇ-كوممۋنالدىق شارۋاشىلىعى ماسەلەلەرى بويىنشا قر-نىڭ كەيبىر اكتىلەرىنە وزگەرىستەر مەن تولىقتىرۋلار ەنگىزۋ» تۋرالى زاڭنامانى تالقىلادى. بۇل تاقىرىپ قازاقستاندىقتاردى بىرنەشە جىلدان بەرى مازالاپ كەلە جاتقان ەدى. «نۇر وتان» پارتياسىنىڭ ستراتەگيالىق زەرتتەۋ ينستيتۋتىنىڭ دەرەكتەرىنە سايكەس، رەسپۋبليكا تۇرعىندارىنىڭ 36 پايىزى كوممۋنالدىق قىزمەتتىڭ جۇمىسىنا كوڭىلدەرى تولمايدى. تۇرعىنداردىڭ شاعىمىنان كومپانيالاردىڭ قىزمەت كورسەتۋ ساپاسىنىڭ تومەندىگى مەن تولەنىپ جاتقان اقشانىڭ ءتيىستى تۇردە باقىلانبايتىنىن بايقاۋعا بولادى.

باسپا ءسوز ءماجىلىسىن اشقان «نۇر وتان» پارتياسى ءتوراعاسىنىڭ ءبىرىنشى ورىنباسارى ماۋلەن اشىمبايەۆ كوممۋنالدىق قىزمەت تاريفتەرىن باقىلاۋدى قولعا الاتىنىن ەسكەرتتى.

«ەلباسىنىڭ تاپسىرماسىنا وراي اتالمىش شارانى جۇزەگە اسىرۋدى «نۇر وتان» پارتياسىنىڭ العاشقى جوسپارى دەپ ايتقىم كەلەدى. بۇل ءبىز اتقاراتىن ءىرى ءارى اۋقىمدى جۇمىستىڭ ءبىرى بولماق»، - دەدى ماۋلەن اشىمبايەۆ.

«نۇر وتان» پارتياسى ءتوراعاسىنىڭ ءبىرىنشى ورىنباسارى اشىمبايەۆتىڭ سوزىنشە، تۇكش ماسەلەسى بويىنشا جوعارىدا اتالعان زاڭناماعا وزگەرىستەر مەن تولىقتىرۋلار ەنگىزۋ قازىرگى ۋاقىتتا پارلامەنتتىڭ قاراۋىندا. پارتيانىڭ مىندەتى – حالىقتى الاڭداتقان سۇراقتاردى جيناپ، ساراپتاۋ.

«ءبىز بۇل سالادا ءتيىمدى مونيتورينگ ۇيىمداستىرۋىمىز قاجەت. مونوپوليستەر مەن كوممۋنالدىق قىزمەت ماماندارى قالاي جۇمىس ىستەيدى؟ وسىعان وراي ءبىز قوعامدىق ۇيىمدارمەن، ءتيىستى ماماندارمەن، ۇكىمەتتىك ەمەس ۇيىمدارمەن بىرلەسىپ جۇمىس ىستەمەكپىز»، - دەدى ماۋلەن اشىمبايەۆ.

قايتا قارالعان زاڭناماعا سايكەس، تۇرعىن ءۇي كوممۋنالدىق شارۋاشىلىعىنىڭ بىرلەسكەن مەملەكەتتىك اقپاراتتىق جۇيەسىن قۇرۋ مۇمكىندىگى قاراستىرىلۋدا. 

جالپى وزگەرىستەر تۇكش جۇيەسىنە بايلانىستى بىرنەشە سۇراقتارعا جاۋاپ بەرە الادى. سونىڭ ىشىندە:

-باسقارۋشى كومپانيانىڭ ساپالى قىزمەت ەتۋىن قامتاماسىز ەتۋ؛

-كوممۋنالدىق قىزمەتتەر مەن تولەمدەردى ەسەپكە الۋدى جەتىلدىرۋ؛

-تۇكش سالاسىنا جوعارى تەحنولوگيالاردى ەنگىزۋ؛

-ۇيگە ورتاق مۇلىكتەردى ەسەپكە الۋ پروسەدۋراسىن جەدەلدەتۋ؛

-ۇيگە ورتاق مۇلىكتى ۋاقىتىلى جوندەۋدەن وتكىزۋدى قامتاماسىز ەتۋ.

دوڭگەلەك ۇستەل بارىسىندا قازاقستان رەسپۋبليكاسى پارلامەنتىنىڭ دەپۋتاتتارى، «نۇر وتان» پارتياسىنا قاراستى كەڭەس مۇشەلەرى، مەملەكەتتىك ورگاندار مەن ۇكىمەتتىك ەمەس ۇيىمداردىڭ وكىلدەرى، سونىمەن قاتار، وڭىرلەردەن بىرنەشە وكىل قاتىستى.