سىرتقى ىستەر ءمينيسترى قايرات ءابدىراحمانوۆ قحر-دىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى چجان سياونى قابىلدادى جانە ديپلوماتتىڭ قىزمەتىنە جاقىندا كىرىسۋىمەن قۇتتىقتاي وتىرىپ، قازاقستان مەن جۇڭگو اراسىنداعى جان-جاقتى ستراتەگيالىق ارىپتەستىكتى العا جىلجىتۋدا تابىستار تىلەدى، دەپ جازادى Qamshy.kz اقپارات اگەنتتىگى ق ر ءسىم- ءنىڭ باسپا ءسوز قىزمەتىنە سىلتەمە جاساپ.

كەزدەسۋ بارىسىندا شۇاا ەتنيكالىق قازاقتاردىڭ قۇقىقتارى مەن مۇددەلەرىن قورعاۋعا بايلانىستى ماسەلەلەر ءوزارا سەنىمدىلىك، تاتۋ كورشىلىك، قۇرمەتتەۋ قاعيداتتارى نەگىزىندە جانە ستراتەگيالىق ارىپتەستىكتىڭ جوعارى دەڭگەيىندەگى رۋحىندا وڭ شەشىلەتىن بولادى دەگەن ۋاعدالاستىققا قول جەتكىزىلدى.

قازاقستان تاراپى قازاقستان ازاماتتارىنا قحر-دىڭ جەكە، ىسكەرلىك جانە تۋريستىك ۆيزالارىن بەرۋدى تەز ارادا قايتا جالعاستىراتىنىنا ءۇمىت ءبىلدىردى.

كەزدەسۋ بارىسىندا، تاراپتار قحر-داعى قازاق دياسپوراسىنىڭ قازاقستان مەن جۇڭگو اراسىنداعى «دوستىق كوپىرى» رەتىندە سانالاتىنىن اتاپ ءوتتى. 

سونىمەن قاتار ەكىجاقتى ساياسي قاتىناستاردىڭ جاي-كۇيى مەن كەلەشەگى، قازاقستان مەن جۇڭگو اراسىنداعى ساۋدا-ەكونوميكالىق، مادەني-گۋمانيتارلىق ىنتىماقتاستىقتىڭ وزەكتى ماسەلەلەرى، قاۋىپسىزدىك پروبلەمالارى بويىنشا ءوزارا ىقپالداستىق تالقىلاندى. ءوزارا قىزىعۋشىلىق تۋدىراتىن قازىرگى زامانعى وزەكتى ماسەلەلەردىڭ بۇكىل سپەكترى بويىنشا ديالوگتى دامىتۋدىڭ ماڭىزدىلىعى ايرىقشا اتاپ ءوتىلدى.

قازاقستان پرەزيدەنتى نۇرسۇلتان نازاربايەۆتىڭ قحر-عا مەملەكەتتىك ساپارى جانە ونىڭ 2018 جىلدىڭ ماۋسىم ايىندا شىۇ سامميتىنە قاتىسۋى قورىتىندىسى نەگىزىندە قول جەتكىزىلگەن ەكىجاقتى كەلىسىمدەردى جۇزەگە اسىرۋ بارىسىن تالقىلاۋعا ەرەكشە نازار اۋدارىلدى.

ق. ءابدىراحمانوۆتىڭ ايتۋىنشا، استانا مەن پەكين اراسىنداعى جان-جاقتى تابىستى ىنتىماقتاستىق، نەگىزىنەن ەرەكشە دوستىق جانە سەنىمدى قاتىناستار ورناتقان ەكى ەل باسشىلارى كۇش-جىگەرلەرىنىڭ ارقاسىندا مۇمكىن بولدى. سوڭعى جىلدارى «نۇرلى جول» جاڭا ەكونوميكالىق جوباسىن «بەلبەۋ جانە جول» باستاماسىمەن ۇشتاستىرۋمەن قاتار، ءبىرقاتار ءىرى ينۆەستيسيالىق جوبالار جۇزەگە اسىرىلدى.

جۇڭگو قازاقستاننىڭ ءىرى سىرتقى ساۋدا سەرىكتەسى. سونىمەن بىرگە استانا، قازاقستاننىڭ ونىمدەرىن، ەڭ الدىمەن اۋىل شارۋاشىلىق ونىمدەرىن جۇڭگو نارىعىندا كەڭەيتۋگە مۇددەلى. وسى جىلدىڭ قىركۇيەك ايىندا استانا قالاسىندا «بەلبەۋ جانە جول» باستاماسىنىڭ 5 جىلدىق مەرەيتويىنا وراي 130-دان استام قىتايلىق ىسكەرلىك توپتار وكىلدەرىنىڭ قاتىسۋىمەن ۇيىمداستىرىلعان بيزنەس-فورۋمنىڭ ناتيجەسى جوعارى باعالاندى. تاراپتار وندىرىستىك قۋاتتاردى دامىتۋ باعدارلاماسىن ودان ءارى ىسكە اسىرۋعا قىزىعۋشىلىق تانىتتى. بۇگىنگى كۇنى جالپى قۇنى 27 ملرد. دولل. قۇرايتىن 51 بىرلەسكەن جوبالار بويىنشا جۇمىس جۇرگىزىلۋدە، ونىڭ ىشىندە جالپى قۇنى 2،5 ملرد. دولل. قۇرايتىن 9 جوبا ىسكە قوسىلدى.

وسى رەتتە، تاراپتار جوعارى ۇكىمەتتىك دەڭگەيدەگى الداعى جوسپارلانعان كەزدەسۋلەرگە دايىندىق ماسەلەلەرىن تالقىلادى جانە ولاردىڭ ناتيجەلەرى ەكى ەل اراسىنداعى ساۋدا-ەكونوميكالىق جانە ينۆەستيسيالىق قاتىناستاردىڭ بارلىق سپەكترىن دامىتۋعا وڭ سەرپىن بەرەتىنىن اتاپ ءوتتى.

قحر ەلشىسى، پرەزيدەنت ن. نازاربايەۆتىڭ قازاقستان حالقىنا جولداۋىنىڭ مازمۇنىن جوعارى باعالاپ، 2019 جىلدى جاستار، ءتۋريزمدى قولداۋ، شىمكەنت قالاسىنىڭ ۇلگىسىنە سايكەس مەگاپوليستەردى دامىتۋ جىلى دەپ جاريالاۋ سياقتى ءبىرقاتار باستامالاردى جۇزەگە اسىرۋعا جۇڭگو تاراپىنىڭ قىزىعۋشىلىعىن ءبىلدىردى.