«31 ارنادا» «ەڭبەكشى» دەپ اتالاتىن جاڭا كومەديالىق تەلەحيكايانىڭ ەكسكليۋزيۆتى كورسەتىلىمى باستالادى. 12 بولىمنەن تۇراتىن «ەڭبەكشى» تەلەحيكاياسى كۇن سايىن ساعات 14.00-دە «31 ارنادان» ەفيرگە شىعادى.
تەلەحيكايا پروديۋسەرى ءسابيت راحىمبايەۆتىڭ ايتۋىنشا، جوبا وتە كوڭىلدى، ىزگى كومەديالىق فيلم بولىپ شىققان. «تەلەحيكايا جاي عانا كۇلكىلى ەمەس، سونىمەن بىرگە وزەكتى ماسەلەلەردى كوتەرەدى. كەيىپكەرلەر جيىنتىق وبرازدان قۇرالعان، سول سەبەپتى قازاقستاندىقتارعا ەتەنە تانىس. بۇل – ءوزى تۇراتىن تۇرعىن ءۇي كەشەنىندەگى پيك جۇمىسىنا كوڭىلى تولمايتىن قالالىقتار جايىنداعى حيكايا. سيۋجەتتىك جەلىدە ءومىر بويى كەڭسە قىزمەتكەرى بولۋدى ارمانداعان، كەڭسەدەن باسقا جەردە جۇمىس ىستەيتىندەردى ۇناتپايتىن جاس جىگىت تۋرالى باياندالادى. وبرازداردىڭ ءبارىن كۇندەلىكتى ومىردەن الدىق، ونداعى ادامدار ءبىزدىڭ اينالامىزدا دا ءجۇر»، - دەدى جوبا پروديۋسەرى.
«ەڭبەكشى» تەلەحيكاياسى ۇرپاقتار اراسىنداعى بىتپەيتىن تەكەتىرەستى سۋرەتتەيدى. كورەرمەن بۇل حيكايادان پيك ىسىنە ءوزىنىڭ ۇلەسىن قوسۋعا تالپىنىپ جۇرگەن جاس مامان الىشەر مەن باستىقتىڭ ورىندىعىنا دەيىن ءوز ەڭبەگىمەن كوتەرىلىپ، جۇمىستى ۇيرەنشىكتى «قالپىنان» وزگەرتكىسى كەلمەيتىن، كەرتارتپا تۇسىنىكتەگى جانىبەك ەسىمدى قاباساقال جىگىت اعاسىنىڭ اراسىنداعى تارتىستى تاماشالايدى.
«ەڭبەكشى» تەلەحيكاياسىنىڭ باستى ءرولىن سومدايتىن جاسۇلان ومىربەك: «مەن ءۇشىن بۇل تەلەحيكايا، ەڭ الدىمەن، بەلگىلى ءبىر الەۋمەتتىك ورتادان شىعىپ، باسقا ءبىر ورتاعا توپ ەتە تۇسكەن ادام تۋرالى وقيعا. سوعان قاراماستان ول وزىنە جات ورتادا ورنىن تابا بىلەدى. ءوز كەيىپكەرىم تۋرالى ايتسام، الىشەر وتە تاباندى، قايراتتى جىگىت».
تەلەحيكايانىڭ باستى كەيىپكەرى الىشەردى جاسۇلان ومىربەك سومداسا، ساۋلە ءرولىن ءجانيا قالييەۆا، جانىبەك ءرولىن مارات قابىشيەۆ، تامارا ءرولىن ولگا گوربۋنوۆا، مۇرات ءرولىن ەرنار قىرىقبايەۆ ويناپ شىققان.
جوبا بۇعان دەيىن «جەناتيكي»، «قالا اڭىزدارى»، «قازاق ستار» جانە «مەن سەنى جاقسى كورەم، قازاقستان» سياقتى جوبالارمەن تانىمال «بولشايا ۆوسمەركا prod» شىعارماشىلىق توبىمەن بىرلەسە وتىرىپ جاسالعان. «ەڭبەكشى» تەلەحيكاياسىنىڭ سەناريي اۆتورى – ازيم سايدبايەۆ جانە رۋستام مۇحيت، قويۋشى رەجيسسەرى - داستان الدابەك.
«ەڭبەكشى» تەلەحيكاياسىن 12 قاراشادان باستاپ كۇن سايىن ساعات 14:00-دە « 31 ارنادان» تاماشالاي الاسىزدار.
پىكىر قالدىرۋ