بۇگىنگى كۇنى تۇرعىن ءۇي قۇرىلىس جيناق بانكى 364 پاتەردەن تۇراتىن پۋل ازىرلەپ جاتىر. پاتەرلەردىڭ 1 شارشى مەترىنىڭ قۇنى استانا جانە الماتى قالالارىندا 180 مىڭ تەڭگە. بۇل دەگەنىمىز استانا قالاسىنداعى ورتاشا نارىقتىق باعادان ەكى ەسەگە تومەن. بۇل تۋرالى بۇگىن بانك وكىلدەرى ايتتى.
ايتا كەتەيىك، «نۇرلى جەر» مەملەكەتتىك باعدارلاماسى 2016 جىلدان باستاپ ىسكە قوسىلدى. جالپى مەرزىمى 15 جىل. ءارى باعدارلامانى جۇزەگە اسىرۋ ءۇشىن مەملەكەتتەك قازىنادان 4 ملرد 600 ملن تەڭگە قارجى ءبولۋ قاراستىرىلعان.
بۇعان قوسا تۇرعىن ءۇي قۇرىلىس جيناق بانكىنىڭ باسشىلىعى تۇرعىندار مەن جۋرناليستەرگە باعدارلاما اياسىندا ەلوردادا سالىنعان نەمەسە سالىنىپ جاتقان تۇرعىن ۇيلەردى كورسەتتى. نىساندار نەگىزىنەن №227 جانە ماڭگىلىك ەل، №27 جانە №36 كوشەلەردىڭ اۋدانىندا ورنالاسقان.
بانك وكىلدەرى باعدارلاما بويىنشا قالاي پاتەر ساتىپ الۋ كەرەكتىگىن دە ايتىپ ءوتتى:
-بىرىنشىدەن، تۇرعىن ءۇي قۇرىلىس جيناق بانكىنىڭ تۇتىنۋشىسى بولۋ؛
-دەپوزيتكە باستاپقى جارنانى جيناۋ، ءۇي باعاسىنىڭ 20 پايىزىنا تەڭ سوما بولۋى ءتيىس؛
-قارىزدىڭ جىلدىق مولشەرلەمەسى 5 پايىزدى قۇرايدى.
پاتەر باعالارىنىڭ ءبىر شارشى مەترى استانا جانە الماتىدان وزگە قالالاردا 140 مىڭ تەڭگە. 2018 جىل باستالعالى بانك جۇيەسىنىڭ كومەگىمەن 26 مىڭ ازامات باسپانالى بولدى. ونىڭ شامامەن 7 مىڭى «نۇرلى جەر» مەملەكەتتىك باعدارلاماسى ارقىلى يپوتەكالىق قارىز راسىمدەگەن.
2019 جىلى باعدارلاما اياسىندا ەلوردادا 1825 پاتەر ساتۋ جوسپارلانىپ وتىر. جالپى «نۇرلى جەر باعدارلاماسى بويىنشا سالىنىپ جاتقان نىساندار تۋرالى اقپاراتتى baspana.kz پورتالى ارقىلى تولىعىراق وقىپ بىلە الاسىزدار. وسى ورايدا Qamshy.kz اقپارات اگەنتتىگى باعدارلاما بويىنشا قازاقستاندىقتاردىڭ ءبىلۋى ءتيىس اقپاراتتارىمەن ءبولىسۋدى ءجون كوردى.
بىرىنشىدەن، باعدارلاما 15 جىل بويى جۇزەگە اسىرىلادى. جوسپار بويىنشا، 2031 جىلعا دەيىن 1،5 ملن وتباسى ءۇيلى بولۋى ءتيىس. باعدارلامانىڭ ارقاسىندا جىل سايىن 100 مىڭ ادام پاتەردىڭ كىلتىن الادى. جالپى جوسپار مىناداي:
جالدامالى تۇرعىن ءۇيدىڭ 45 مىڭ پاتەرى (2،2 ملن م²)؛
كرەديتتىك تۇرعىن ءۇيدىڭ 245 مىڭ پاتەرى (12 ملن م²)؛
سقجمق، بد، قيك 46 مىڭ پاتەرى؛
600 مىڭ جەكە تۇرعىن ءۇي (60 ملن م²)؛
564 مىڭ كوممەرسيالىق پاتەر پايدالانۋعا بەرىلەدى.
«نۇرلى جەر» باعدارلاماسى بىرنەشە باعىتتان تۇرادى. ولار: كرەديتتىك تۇرعىن ءۇي الۋ، ءۇيدى جالعا بەرۋ جانە جەكە تۇرعىن ءۇي قۇرىلىسىن دامىتۋ بويىنشا جەر ۋچاسكەلەرىن ساتۋ.
باعدارلاما بىرنەشە تالاپتان تۇرادى. سالىمشىنىڭ ەسەپشوتىندا كەلىسىلگەن باعانىڭ كەمىندە 30 پروسەنتى جينالۋ كەرەك. مۇندايدا جىلدىق مولشەرلەمە 5 پايىزدى قۇرايدى. ال پاتەر ەسەپشوتىنا قارجىنى ۋاقىتىلى ءارى قوماقتى سومادا سالىپ وتىرعان ازاماتتارعا بەرىلەدى.
باسپانالى بولامىن دەگەن ادام سىرتقا شىقپاي-اق پروسەستى جۇزەگە اسىرا الادى. قادامدارى تومەندەگىدەي:
1.ءوزى قالاعان قالانى تاڭداۋ؛
2.قانداي نىسانداردىڭ قۇرىلىس جۇمىستارى ءجۇرىپ جاتقانىن جانە كليەنتتەردەن تۇسەتىن ءوتىنىش قاشانعا دەيىن قابىلداناتىنىن انىقتاۋ؛
3.ۇناعان پاتەردى تاڭداۋ؛
4.پاتەر ساتىپ الۋشىلار پۋلىنا قاتىسۋ ءۇشىن ءوتىنىش جازۋ.
جالعا الۋ قۇنى 1 شارشى مەترگە 100 تەڭگە. باسپانا الۋ ءۇشىن اكىمدىككە كەزەككە تۇرۋ قاجەت.
باياعدارلاما اياسىندا سوعىس ارداگەرلەرىنە، جەتىمدەرگە، الەۋمەتتىك جاعىنان از قامتىلعاندارعا جانە مەملەكەتتىك قىزمەتكەرلەرگە باسىمدىق بەرىلەدى. ولار دا ءوتىنىش جازىپ، كەزەككە تۇرۋى ءتيىس.
اتالعان ساناتتاعى ادامعا جاتساڭىز دا، «نۇرلى جەر» باعدارلاماسىمەن باسپانا الۋ ءۇشىن بىرنەشە تالاپقا ساي كەلۋىڭىز شارت.
بىرىنشىدەن، سوڭعى بەس جىلدا اتىڭىزدا باسپانا بولماۋى كەرەك. ەكىنشىدەن، استانا مەن الماتىدا ەڭ كەمى ەكى-ۇش جىل تىركەۋدە تۇرعان بولۋىڭىز قاجەت.
«نۇرلى جەر» باعدارلاماسى بويىنشا يپوتەكالىق تۇرعىن ءۇي جىلدىق مولشەرلەمەسى 10 پايىز جەڭىلدىكپەن بەرىلەدى. ول ءۇشىن مىناداي كەزەڭدەردەن وتەسىز:
ءبىرىنشى قادام: بانككە قارىز جونىندەگى قۇجاتتى جانە سۋبسيديا الۋ ءۇشىن جازعان ارىزىڭىزدى كورسەتەسىز. قاجەتتى قۇجات ءتىزىمىن بانكتەن بىلە الاسىز.
ەكىنشى قادام: بانك كەپىلدەمەڭىز مەن تولەم جۇرگىزۋ قابىلەتىڭىزدى تەكسەرەدى.
ءۇشىنشى قادام: ەگەر بانك ءسىزدىڭ ءوتىنىشىڭىزدى قابىل ەتسە، 3 جۇمىس كۇنى ىشىندە قازاقستان يپوتەكالىق كومپانياسىنا سۋبسيديانى بەرۋ تۋرالى قولداۋحاتىن (حوداتايستۆو) جىبەرەدى.
ءتورتىنشى قادام: قازاقستان يپوتەكالىق كومپانياسى 5 جۇمىس كۇنى ىشىندە قۇجاتتارىڭىزدى تەكسەرەدى.
بەسىنشى قادام: قازاقستان يپوتەكالىق كومپانياسى 5 جۇمىس كۇنى ىشىندە بانككە قابىلداعان شەشىمى جونىندە جازباشا جاۋاپ جىبەرەدى.
التىنشى قادام: بانك قازاقستان يپوتەكالىق كومپانياسىنىڭ قابىلداعان شەشىمى نەگىزىندە سىزبەن كەلىسىمشارتقا وتىرادى، يپوتەكالىق كەلىسىم، تولەم كەستەسى قۇرىلادى، ەكى تاراپ سۋبسيديالاۋ كەلىسىمىنە قول قويادى دا، ونى قازاقستان يپوتەكالىق كومپانياسىنا جونەلتەدى. كەلىسىمشارتقا قول قويعاننان كەيىن قازاقستان يپوتەكالىق كومپانياسى 2 جۇمىس كۇنى ىشىندە بانككە كەلىسىمشارتتىڭ ەكى داناسىن جىبەرەدى. ونىڭ ءبىرىن بانك سىزگە بەرەدى.
جەتىنشى قادام: كەلىسىمشارت قول قويعان كۇننەن باستاپ كۇشىنە ەنەدى. ءسىز «نۇرلى جەر» باعدارلاماسى بويىنشا جەڭىلدىكپەن يپوتەكا الاسىز.
ايتا كەتەيىك، «نۇرلى جەر» باعدارلاماسى نەگىزگى 5 مىندەتتى ىسكە اسىرۋ ارقىلى حالىقتىڭ تۇرعىن ءۇي ماسەلەسىن كەشەندى شەشۋگە باعىتتالعان:
حالىقتىڭ الەۋمەتتىك جاعىنان وسال توپتارى ءۇشىن جالعا بەرىلەتىن تۇرعىن ءۇي قورىن قۇرۋ.
جەكە تۇرعىن ءۇي قۇرىلىسىن دامىتۋ.
تۇرعىن ءۇي قۇرىلىس جيناقتارى جۇيەسى ارقىلى وتكىزىلەتىن كرەديتتىك تۇرعىن ءۇي سالۋ.
جەكە قۇرىلىس سالۋشىلاردى تۇرعىن ءۇي سالۋعا ىنتالاندىرۋ.
يپوتەكالىق كرەديت بەرۋدىڭ قولجەتىمدىگىن ارتتىرۋ.
پىكىر قالدىرۋ