جالپى كەيىنگى جاس ۇرپاقتىڭ  ىقىلاسى مەن قۇلشىنىسىن  ارتتىرۋ ءۇشىن قولدان كەلگەننىڭ ءبارىن جاسايتىن شەشەن پرەزيدەنتىنىڭ كەيبىر ىستەرىنە ريزاشىلىعىڭدى بىلدىرەسىڭ.

وسى اپتانىڭ باسىندا  ەل استاناسى گروزنىيدا ەل سۇيسىنەرلىك تاعى ءبىر وقيعا ورىن الدى. كەۋدەسىن جەردەن كوتەرىپ (وتجيمانيە) 4105 رەت  جاتتىعۋ جاساعان 4 جاسار بالاعا شەشەنستان پرەزيدەنتى رامزان قادىروۆ اق ءتۇستى Mercedes اۆتوكولىگىن سىيلادى. اتالعان كولىك احماد قاجى قادىروۆ اتىنداعى قوردىڭ قارجىسىنا ساتىپ الىندى.

–سەن بارىنە دە لايىقتىسىڭ. مىقتىسىڭ. اكەڭ سەنى اركەز وسى كولىكپەن الىپ ءجۇرسىن،–دەدى پرەزيدەنت رامزان قادىروۆ.  

پرەزيدەنت رامزان قادىروۆتىڭ قولىنان كولىكتىڭ كىلتىن العان ءتورت جاسار بالا ماشينانىڭ الدىڭعى كاپوتىنا شىعىپ، بىرنەشە جاتتىعۋ جاسادى. جۇرتشىلىق «شەشەننىڭ شۆارسەنەگگەرى» اتانىپ كەتكەن كىشكەنتاي بالا الداعى ۋاقىتتا ءوزىنىڭ رەكوردىن جاڭارتاتىنىنا  سەندىردى.

ەسكەرتە كەتەيىك، 12 قاراشا كۇنى شەشەنستاننىڭ ايماقتىق سپورت مينيسترلىگى ەلدە رەكوردتىق ناتيجە ورىن العانىن  پرەزيدەنت رامزان قادىروۆقا ءمالىم ەتكەن بولاتىن. ناقتى ايتار بولساق، ءتورت جاسار راحيم كۋرييەۆ قولىن تىرەپ، 2 ساعات 26 مينۋت بويى كەۋدەسىن جەردەن كوتەرىپ 4105 رەت جاتتىعۋ جاساعان. مۇنى ەستىگەن شەشەن باسشىسى قادىروۆ بالانى بىردەن وزىنە  شاقىرىپ الىپ، ىرزا بولعاندىقتان ءتۇن ىشىندە وعان Mercedes سىيلاپ جىبەردى.

جالپى كىشكەنتاي بالالار اراسىندا مۇنداي وقيعا ءبىرىنشى رەت ورىن الىپ وتىرعان جوق. 2015 جىلى ەليستادا بەس جاسار باتۋ بوكتايەۆ 4050 رەت جاتتىعۋ جاساعانى بەلگىلى. ودان كەيىنگى رەكورد كييەۆتە ورىن الدى. جەتى جاستاعى اندرەي كوستاش 4000 رەت قولىن جەرگە تىرەپ، كەۋدەسىن كوتەرىپ جاتتىعۋ  جاساعان. ەندى بۇل ناتيجەنى شەشەن بالاسى  راحيم كۋرييەۆ جاڭارتىپ وتىر.