جاقىندا مينسك قالاسىندا Junior Eurovision حالىقارالىق بايقاۋى وتەدى. سايىستا ەل تاريحىندا تۇڭعىش رەت قازاقستاننىڭ اتىنان 12 جاستاعى دانەليا تۋلەشوۆا ونەر كورسەتەدى، دەپ حابارلايدى Qamshy.kz اقپارات اگەنتتىگى.

19 قاراشا كۇنى شارانىڭ اشىلۋ سالتاناتىندا جەرەبە بويىنشا دانەليا تۋلەشوۆانىڭ قانداي نومىردە باعىن سىنايتىندىعى بەلگىلى بولادى. جەرلەسىمىز «وزىڭە سەن» ءانىن ورىندايدى. اشىلۋ سالتاناتىن «حابار» تەلەارناسىندا 23.00-دە كورەسىزدەر.

ال 25 قاراشا كۇنى ساعات 21.00-دە «حابار» تەلەارناسى تىكەلەي ەفيردە 20 مەملەكەتتىڭ قاتىسۋشىلارى دوداعا تۇسەتىن بايقاۋدى ۇسىنادى.

قاتىسۋشىلاردىڭ بارلىعى ونەر كورسەتكەن سوڭ، قاتىسۋشى مەملەكەتتەر داۋىس بەرۋگە كىرىسەدى. سونداي-اق داۋىس بەرۋگە 3 ەرەسەك جانە 2 بالادان تۇراتىن قازىلار القاسى دا قاتىسادى.

قازاقستاندىقتار تەك دانەلياعا عانا داۋىس بەرمەيدى، سونىمەن قاتار وزدەرىنە ۇناعان كەز كەلگەن قاتىسۋشىعا داۋىس بەرە الادى. كورەرمەندەردىڭ داۋىس بەرۋى 23-25 قاراشا ارالىعىندا junioreurovisioin.tv سايتىندا وتەدى. جەڭىمپاز قازىلار القاسى مەن كورەرمەندەر داۋىسىنىڭ ورتاق شەشىمى بويىنشا انىقتالادى.

«Junior Eurovision Song Contest» حالىقارالىق ءان بايقاۋى 9 جاستان باستاپ 14 جاسقا دەيىنگى ورىنداۋشىلار قاتىساتىن «ەۆروۆيدەنيەنىڭ» انالوگى. قازاقستان بايقاۋدىڭ 15 جىلدىق تاريحىندا العاش رەت بايقاۋعا قاتىسقالى وتىر. قازاقستاننىڭ اۋماعىندا بايقاۋدى «حابار» تەلەارناسى ترانسلياسيالايتىن بولادى. «حابار» اگەنتتىگى 2016 جىلعى 1 قاڭتاردان باستاپ ءىس-شارانى ۇيىمداستىراتىن ەۋروپالىق حابار تاراتۋ وداعىنىڭ (EBU) قاۋىمداسقان مۇشەسى بولىپ تابىلادى، بۇل مۇشەلىك اتالعان بايقاۋعا قاتىسۋ ءۇشىن ەلدەن ۇمىتكەر ۇسىنۋعا مۇمكىندىك بەردى.