ءبىزدىڭ ەلدىڭ بيۋدجەتىنەن حالىقتى الەۋمەتتىك قورعاۋ، سونىڭ ىشىندە جۇمىسپەن قامتۋدى قولداۋعا ءبولىنىپ جاتقان قاراجاتتار ورنىمەن جۇمسالاتىن بولسا، ەندىگى جۇمىسسىزدىق دەگەن مۇلدە بولماس ەدى. الايدا ءبولىنىپ جاتقان وراسان قارجىعا قاراماي ونىڭ ۇلەسى ازايار ەمەس. ەڭبەك جانە حالىقتى الەۋمەتتىك قورعاۋ مينيسترلىگى جۇمىس ىستەپ جاتىرمىز، جۇمىسسىزدىقتى ازايتىپ جاتىرمىز دەگەنىمەن جۇمىسسىزدىقتىڭ ۇلەسى ءبىر ورىننان جىلجىماي تۇر ەكەن. 

بۇل تۋرالى ءماجىلىستىڭ سوڭعى پلەنارلىق وتىرىسىندا دەپۋتات ايقىن قوڭىروۆ جاريا ەتتى. الدىمەن دەپۋتات جۇمىسپەن قامتۋدىڭ 2019-2021 جىلدارعا ارنالعان باعدارلاماسىنا ۇكىمەتتىڭ وزگەرىس ەنگىزگەنىن سىنادى. وزگەرىس ەنگىزبەس بۇرىن بۇرىنعى باعدارلامانىڭ قالاي ورىندالعانىن جانە ۇسىنىلعان وزگەرىستەردىڭ قانشالىقتى قاجەتتىلىگى بارىنا ساراپ جاسالۋى كەرەك ەدى دەيدى دەپۋتات. مۇنىڭ ورنىنا شىندىعى كۇماندى ساندىق كورسەتكىشتەرگە سەنىپ، وزگەرىستەر ەنگىزىلگەن. ماسەلەن، ەڭبەك جانە حالىقتى الەۋمەتتىك قورعاۋ مينيسترلىگى ۇستىمىزدەگى جىلدىڭ توعىز ايىندا بولىنگەن 82 ملرد. تەڭگەگە 327 مىڭ ادام جۇمىسقا ورنالاسقان دەيدى. دەمەك، جۇمىسسىزدىق ازايۋى كەرەك ەدى عوي. ءبىراق ستاتيستيكا ورگاندارى ونىڭ 2017 جىلدىڭ باسىنان بەرى وزگەرمەي، 4،9 پايىز دەڭگەيىندە تۇرعانىن ايتقان. دەمەك، ەكى قىزمەتتىڭ ءبىرى جالعان سويلەپ تۇر. ناقتىراق ايتساق، ستاتيستيكا ورگاندارىنىڭ مالىمەتىنە قاراعاندا ۇستىمىزدەگى جىلدىڭ ءى توقسانىندا جۇمىسسىزدار سانى 439 مىڭ ادام بولعان، ال ءىى توقساندا ول ءسال ارتىپ، 441 مىڭ ادامعا جەتكەن. ەندەشە ەڭبەك مينيسترلىگىنىڭ 327 مىڭ ادامى كىمدى نەمەسە نەنى ازايتقان؟

سونىمەن قاتار دەپۋتات ا.قوڭىروۆ جاڭا جۇمىس ورىندارىن اشۋدى ىنتالاندىرۋ دا تومەن ەكەنىن سىنادى. ماسەلەن، بيىل تەك 1042 جوبا عانا قولداۋ تاۋىپ، ميكروكرەديتتىك ادىسپەن قارجىلاندىرىلعان. بۇل سان جالپى رەسپۋبليكاعا شاققاندا تۇك ەمەس دەيدى دەپۋتات. ەگەر كورسەتكىشتەر جاقسارماسا وراسان قاراجات قايدا قۇيىلىپ جاتىر؟ ەڭبەك مينيسترلىگىنىڭ اقپاراتتارى شىندىققا قانشالىقتى جاناسادى؟ وسى جانە باسقا ماسەلەلەردى تەكسەرىپ، ساراپ جاساۋدى سۇراپ، دەپۋتات ۇكىمەت باسشىسى ب.ساعىنتايەۆتىڭ اتىنا دەپۋتاتتىق ساۋال جولدادى. 

س.ەلەۋ، ساراپشى