گۇلۆيرا بيعالييەۆا - رەترو FM راديوسىندا حابار جۇرگىزۋشىسى. راديو ورنالاسقان عيماراتقا "بومبا قويىلدى" دەگەن اقپاراتتى ەستىسە دە، گۇلۆيرا جۇمىس ۇستەلىن تاستاپ، ات-تونىن الا قاشقان جوق. حالىققا ماڭىزدى جاڭالىقتى جەتكىزۋگە اسىقتى.
♦كتك رەداكسياسىنا بومبا قويىلعاندىعى تۋرالى قوڭىراۋ ءتۇستى
"بىزدە بۇگىن ماسقارا كۇن بولدى. "ساعات تۇسكى 13:00-گە قاراي كتك، نتك، ەۋرازيا ارنالارىنىڭ عيماراتىنا بومبا قويىلعان" دەگەن اقپارات تۇسكەن كەزدە، پوليسيا بۇكىل قىزمەتكەرلەردى سىرتقا قۋالادى. قالپاعىمدى كيىپ مەن دە سىرتقا قاراي قاشىپ بارا جاتسام، 13:00-گە بەس مينۋت قالىپتى. ساسقانىمنان رەتروداعى ەفيرىمە قاراي قايتا جۇگىردىم. ەفيرگە كەلىپ وتىرىپ جاتسام، "نە، ولەيىن دەپ پە ەدىڭ، شىق دەيمىن دەپ" "رەتروعا" دا پوليسيا كىرىپ كەلدى. "بەس مينۋت قالدى، تىعىز جاڭالىقتارىمدى ايتا سالايىنشى" دەدىم دە، پوليسەيدىڭ اۋزىنان ەستىگەن اقپاراتىمدى جەدەل ەفيرگە شىعاردىم. باسىمداعى باس كيىمىمدى جاڭالىقتى وقىپ بىتكەن سوڭ بايقادىم. قاشىپ بارا جاتىپ جاڭالىق وقىعان جاقسى ەكەن. وقىپ بىتكەن سوڭ ءبارىبىر مەنى قۋالاپ شىقتى. ءبارىمىزدى قۇداي ساقتاسىن. تىرقىلداپ قاشقان، نە دەگەن جامان"، - دەپ توتەنشە جاعداي بارىسىنداعى ەموسياسىمەن ءبولىستى جۋرناليست گۇلۆيرا بيعالييەۆا.
گۇلۆيرا حانىمنىڭ بۇل ارەكەتى ارىپتەستەرى تاراپىنان ۇلكەن قۇرمەتكە يە بولدى. جەلىدە ول "جانكەشتى جۋرناليست"، "باتىر جۋرناليست" اتانىپ، كوپشىلىكتىڭ ريزاشىلىعىنا بولەندى.
♦بومبا جايلى اقپاراتتىڭ استارىندا جۋرناليستەرگە قارسى قاستاندىقتىڭ بولۋى مۇمكىن بە؟
2006 جىلدىڭ 5 ماۋسىمىندا "ايقىن" جانە "ليتەر" گازەتتەرى ورنالاسقان عيمارات تا ورتكە ورانعانىنان جۇرتشىلىق حاباردار. بارلىق قىزمەتكەرلەر سىرتقا جۇگىرگەندە،، "ايقىننىڭ" سول كەزدەگى جۋرناليستەرى تەلجان كۇدەروۆ جانە ماقسات ءادىلحان ءورت بولىپ جاتقان عيماراتقا قايتا كىرىپ كەتەدى. سونداعى ماقساتتارى - گازەتتىڭ ماڭىزدى مالىمەتتەر بازاسىن امان الىپ قالۋ ەدى. بۇل تۋرالى رەداكسيادا قىزمەت اتقارعان جۋرناليست بەرىك بەيسەن ۇلى بىزگە اڭگىمەلەپ بەردى.
ءوز ومىرىنەن جۇمىسىن ءبىرىنشى ورىنعا قوياتىن، قىزمەتىنە ادال جۋرناليستەر كەمدە-كەم. حالىققا قىزمەت ەتۋدى ماقسات تۇتقان مۇنداي ماماندار قاشان دا زور العىسقا، قۇرمەتكە لايىق.
پىكىر قالدىرۋ