بۇگىن الماتى قالاسىنداعى ۇلتتىق كىتاپحانادا قازاقستان رەسپۋبليكاسى مادەنيەت جانە سپورت مينيسترلىگى ءتىل ساياساتى كوميتەتى «شايسۇلتان شاياحمەتوۆ اتىنداعى «ءتىل-قازىنا» ۇلتتىق عىلىمي-پراكتيكالىق ورتالىعى» «لاتىن ءالىپبيىن ەنگىزۋدىڭ عىلىمي ۇيىمداستىرۋشىلىق مىندەتتەرى» تاقىرىبىندا رەسپۋبليكالىق سەمينار-كەڭەس وتكىزدى.
سەمينار-كەڭەستىڭ ماقساتى – لاتىن گرافيكاسىنا نەگىزدەلگەن جاڭا ەملە ەرەجەلەرىندەگى شەت تىلىنەن ەنگەن سوزدەردىڭ ەملەسىنە قاتىستى ۇسىنىس-پىكىرلەردى سارالاۋ، تەرميندەردى بەيىمدەۋ كەزىندە كەزدەسەتىن قيىندىقتاردى انىقتاۋ جانە ولاردى شەشۋدىڭ ءتيىمدى جولدارىن كورسەتۋ. وسى ماقساتتى ورىنداۋ ءۇشىن ورفوگرافيالىق جانە تەرمينولوگيالىق جۇمىس توبىنىڭ مۇشەلەرى كەزدەسىپ، ورتاق عىلىمي قاعيداتتاردى انىقتايدى. ولار جاڭا قازاق ءالىپبيىنىڭ ەملە ەرەجەلەرىندە كورىنىس تابادى.
شاراعا ق ر مادەنيەت جانە سپورت مينيسترلىگى ءتىل ساياساتى كوميتەتىنىڭ قىزمەتكەرلەرى، شايسۇلتان شاياحمەتوۆ اتىنداعى «ءتىل-قازىنا» ۇلتتىق عىلىمي-پراكتيكالىق ورتالىعىنىڭ ماماندارى، ۇلتتىق كوميسسيا جانىنداعى ورفوگرافيالىق جانە تەرمينولوگيالىق جۇمىس توپتارىنىڭ مۇشەلەرى، احمەت بايتۇرسىن ۇلى اتىنداعى ءتىل ءبىلىمى ينستيتۋتىنىڭ، ل.ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ، سۇلەيمەن دەميرەل ۋنيۆەرسيتەتى، قازاقستان رەسپۋبليكاسى پريزيدەنتى جانىنداعى مەملەكەتتىك باسقارۋ اكادەمياسىنىڭ وكىلدەرى جانە جوعارى وقۋ ورىندارىنىڭ عالىمدارى قاتىسىپ، وي-پىكىرلەرىن ءبىلدىردى.
پىكىر قالدىرۋ