استانالىق بەلسەندى، تىركەلمەگەن "الاش" حالىقتىق سوسيال-دەموكراتيالىق پارتياسىنىڭ جەتەكشىسى سىرىم ءابدىراحمانوۆ ەكى ايعا قامالدى. بۇل جايلى ازاتتىق تىلشىسىنە ونىڭ ادۆوكاتى تولەگەن شايكوۆ حابارلاعان.

♦قازاق ەلىندە ساياسي پارتيالار قۇرىلا ما؟ ءابدىراحمانوۆ نەگە ابىگەرلەنىپ جاتىر؟

ونىڭ ايتۋىنشا، قازىرگى كەزدە استانا پوليسياسى ءتورت باپ بويىنشا پارتيا جەتەكشىسىنىڭ ۇستىنەن قىلمىستىق ءىس قوزعاعان. ارىزدىڭ بىرەۋىن استانالىق شەنەۋنىكتەردىڭ ءبىرى تۇسىرگەن.

- ءتورت باپ بويىنشا تەرگەۋ ءجۇرىپ جاتىر. بۇلار: 274-باپ، 1ء-بولىم ("كورىنەۋ جالعان اقپارات تاراتۋ")، 380-باپ، 3ء-بولىم، 1-پۋنكت ("بيلىك وكىلىنە قاتىستى كۇش قولدانۋ")، 407-باپ، 2ء-بولىم ("سوتقا دەيىنگى تەرگەپ-تەكسەرۋ جۇرگiزۋگە كەدەرگi جاساۋ")، 378-باپ، 1ء-بولىم، 1-پۋنكت ("بيلىك وكىلىن قورلاۋ")، - دەيدى تولەگەن شايكوۆ ازاتتىق تىلشىسىنە.

استانا قالالىق تەرگەۋ سوتى سىرىم ءابدىراحمانوۆتىڭ ەكى ايعا قامالعانىن راستادى. سوتتىڭ باسپا ءسوز حاتشىسى بوتاگوز بايانوۆانىڭ ايتۋىنشا، قورعاۋ تارابى اپپەلياسياعا شاعىم تۇسىرگەن. ءبىراق شەشىمنىڭ قاشان شىعاتىنى بەلگىسىز.

ارىپتەستەرىنىڭ ايتۋىنشا، جازا تاعايىنداۋ بويىنشا سوت وتىرىسى 1 جەلتوقساندا استانا قالالىق تەرگەۋ سوتىندا وتكەن. ءبىراق وعان ادۆوكاتى مەن قوعامدىق قورعاۋشىسىنان باسقا ەشكىمدى قاتىستىرتپاعان. پارتيا حاتشىسى ادىلەت عابدۋللا "سوتتىڭ ەش مۇمكىندىك بەرمەستەن ونى بىردەن قاماپ تاستاعانى تۇسىنىكسىز بولىپ قالدى" دەيدى.

استانا قالالىق ىشكى ىستەر دەپارتامەنتىنىڭ باسپا ءسوز قىزمەتى ءابدىراحمانوۆقا قاتىستى "سوتقا دەيىنگى تەرگەۋ امالدارى" ءجۇرىپ جاتقانىن ايتىپ، ءسال كەيىنىرەك تولىق اقپارات تاراتاتىنىن ايتتى.

ءابدىراحمانوۆ قامالعان سوڭ ينتەرنەتتە پرەزيدەنت نۇرسۇلتان نازاربايەۆقا ارناپ جازىلعان حات پايدا بولدى. وندا پارتيا وكىلدەرى "جەمقورلىق جايلى اشىق ايتىپ جۇرگەن" ءابدىراحمانوۆتىڭ سوڭعى بىرنەشە ايدا "بىرنەشە رەت زاڭسىز ۇستالعانىن" ايتىپ، "قۋعىنعا ۇشىراعانىن" بايانداعان. حات اۆتورلارى ونى قۋعىنداۋدى توقتاتىپ، بوساتۋدى تالاپ ەتكەن.

بۇعان دەيىن جەرگىلىكتى باسىلىمدار استانا قالاسى اكىمىنىڭ ورىنباسارى سەرگەي حوروشۋننىڭ سىرىم ءابدىراحمانوۆتىڭ ۇستىنەن پوليسياعا ارىز تۇسىرگەنىن حابارلاعان. شەنەۋنىك بلوگەردى وزىنە قاتىستى “جالعان اقپارات تاراتتى” دەپ ايىپتاعان ەدى. سەيسەنبى كۇنى استانا قالالىق اكىمدىگىنە حابارلاسقانىمىزبەن جاۋاپ الا المادىق.

قوعامدىق پىكىر تۋعىزاتىن وقيعالاردىڭ ورتاسىندا جۇرەتىن سىرىم ءابدىراحمانوۆ 2017 جىلى "الاش" پارتياسىنىڭ قۇرىلاتىنىن مالىمدەپ، كوپكە تانىمال بولا باستاعان. ول كەزدە كوپ ادام ونى "بيلىكتىڭ جاساندى جوباسى" دەپ سىناعان ەدى. ال ءابدىراحمانوۆ "الاش" قوزعالىسى الدەكىمدەر ايىپتايتىنداي "بيلىك تاپسىرماسىمەن قۇرىلاتىن پارتيا ەمەس، حالىقتىڭ ىشىنەن شىعاتىن پارتيا" دەپ ايىپتاۋلاردى جوققا شىعارعان. نۇر-وتان" پارتياسىنىڭ بۇرىنعى مۇشەسى 36 جاستاعى بەلسەندى ساياساتتا "قاجەت بولسا، بيلىكپەن دە جۇمىس ىستەسۋ كەرەك" دەگەن كوزقاراس ۇستانادى.

پارتيا وكىلدەرىنىڭ ايتۋىنشا، "الاش" پارتياسى ازىرگە، ەلدە رەسمي تۇردە تىركەلمەگەن. ونىڭ شامامەن بەس مىڭ جاقتاۋشىسى بار.