قازىرگى ۋاقىتتا ۋكراينانىڭ كەرچ بۇعازىنداعى توتەنشە وقيعاعا بايلانىستى 30 كۇندىك اسكەري جاعداي ەنگىزىلگەنى بەلگىلى. الايدا، وسىعان بايلانىستى ۋكرايندىق قوعامنىڭ پىكىرى ەكىگە جارىلدى.  «بۇل پوروشەنكونىڭ الداعى بولاتىن پرەزيدەنتتىك سايلاۋ قارساڭىنداعى ساياسي ءامال-تاسىلى» دەپ جاتقاندار دا بار. اقيقاتىنا كەلسەك، اسكەري توتەنشە جاعداي كەزىندە ەلدە ميتينگ پەن نارازىلىق شارالارىن جانە كوشەدە شەرۋ وتكىزۋگە بولمايدى. «مۇنى الدىن الا ويلاستىرىپ، پوروشەنكو ادەيى ىستەپ وتىر» دەپ وزگە پارتيالار دا مالىمدەمە جاساپ جاتىر. «ءبىزدىڭ كوشەگە شىعىپ، حالىقپەن تىكەلەي تىلدەسۋىمىزگە مۇمكىندىك بەرمەي وتىر» دەۋشىلەر دە تابىلۋدا.

ءبىراق Bloomberg تەلەارناسىنا بەرگەن سۇحباتىندا پرەزيدەنت پەتر پوروشەنكو اسكەري جاعدايدىڭ پرەزيدەنتتىك سايلاۋعا ەش قاتىسى جوق  جانە ونىڭ مەرزىمىن ۇزارتۋدىڭ كەرەگى جوق ەكەنىن ايتتى.

–ەگەر ءبىز الداعى ۋاقىتتا پرەزيدەنتتىك سايلاۋدىڭ مەرزىمىن ۇزارتساق، ونىڭ جەڭىمپازى ءبىر-اق ادام بولار ەدى. ول جەڭىمپازدىڭ ءاتى-جونى – ۆلاديمير پۋتين. سوندىقتان ءبىز وعان ەش مۇمكىندىك بەرمەۋىمىز كەرەك، –دەدى پەتر پوروشەنكو.

بۇل جەردە ۋكراين باسشىسى "پرەزيدەنتتىك سايلاۋدىڭ ۋاقىتىن تاعى ۇزارتساق، وعان كرەمل ارالاسۋى مۇمكىن" دەگەندى مەڭزەپ وتىرسا كەرەك.

ۋكراينا پرەزيدەنتىنىڭ ايتۋىنشا، «ەلدە اسكەري جاعداي ەنگىزۋ  ۋكراين حالقىنىڭ كونستيتۋسيالىق قۇقىن بۇزبايدى. بۇل امال ەلدىڭ قورعانىس قابىلەتىن نىعايتۋ ءۇشىن كەرەك».

قازىرگى ۋاقىتتا اسكەري جاعداي ەلدىڭ 10 وبلىسىنا 29 قاراشادان باستاپ ەنگىزىلگەنى بەلگىلى.

ەسكەرتە كەتەيىك، قارا تەڭىزدىڭ كەرچ بۇعازىندا رەسەيدىڭ تەڭىزدەگى مەملەكەتتىك شەكاراسىن بۇزعان ۋكرايندىق ءۇش  اسكەري كورابلدى ورىستار وق اتىپ، توقتاتقان. سودان بەرى ۋكرايندىق كەمەلەر بۇعازدا قاڭتارۋلى تۇر. ال ۇستالعان 23 تەڭىزشىگە قاتىستى سوت - تەرگەۋ امالدارى جۇرگىزىلۋدە. ال پوروشەنكونىڭ 60 كۇندىك مەرزىمدىك اسكەري جاعدايىن جوعارى رادا دەپۋتاتتارى 30 كۇنگە قىسقارتتى. ازىرگە پرەزيدەنتتىك سايلاۋعا تۇسەتىنى تۋرالى  پەتر پوروشەنكو مالىمدەمە جاساعان جوق. ءبىراق پرەزيدەنتتىك سايلاۋعا ازىرلىك جەلتوقسان ايىنىڭ سوڭىندا باستالادى. ەلدەگى سوسيولوگيالىق «رەيتينگ» توبىنىڭ مالىمدەمەسىنە قاراعاندا، قازىرگى ۋاقىتتا «باتكوۆششينا» پارتياسىنىڭ باسشىسى يۋليا تيموشەنكونىڭ رەيتينگى وتە جوعارى تۇر. بولجامعا سەنسەك، ول پوروشەنكودان 17 پايىز الدا كەلەدى. ال پرەزيدەنت پوروشەنكوعا زەرتتەۋ بارىسى كورسەتكەندەي، سايلاۋشىلاردىڭ 10 پايىزى عانا داۋىس بەرۋگە دايىن سەكىلدى.