«ەۋروپا قۇرلىعىندا رەسەيمەن تەكەتىرەسە الاتىن، پۋتين باسقارعان مەملەكەتتىڭ  الداعى ساياساتىن ساراپقا سالىپ، تۇجىرىم جاساي الاتىن جانە جەدەل شەشىم قابىلدايتىن لوگيكاسى مىقتى، سالماقتى ساراپشى-باسشى قالمادى». بۇل تۋرالى پولشانىڭ بۇرىنعى سىرتقى ىستەر ءمينيسترى ۆيتولد ۆاششيكوۆسكيي ءمالىم ەتتى.

پولشانىڭ بۇرىنعى سىرتقى ىستەر ءمينيسترى بۇل اڭگىمەنى نەگە قوزعاپ وتىر؟ ونىڭ پىكىرىنە سەنسەك، رەسەيدىڭ ماڭىنداعى شەكارالاس ەلدەر ماسكەۋدەن قاتتى قاۋىپتەنەدى. سوندىقتان دا ولاردا قاشان دا ۇرەي بار».

–ەۋروپا قۇرلىعىندا تەك قازىرگى كەزدى، ءبىر ساتتىك ساياسي جاعدايدى عانا ويلايتىن ساياساتكەرلەر بار. بولاشاقتى بولجاي الاتىن مىقتى ستراتەگ پرەزيدەنتتەر جوق. ءقازىر رەسەي ەۋروپانىڭ وسى ءالسىز تۇسىن پايدالانىپ قالۋعا تىرىسىپ جاتىر. وسىنداي مۇمكىندىكتى ءتيىمدى پايدالانىپ، ءوزىنىڭ وسى ايماقتاعى قۋاتىن ارتتىرۋدا، –دەيدى ۆيتولد ۆاششيكوۆسكيي.

بۇل ورايدا بۇرىنعى  ەكس- مينيستر 2005 – 2010 جىلدارى پولشانىڭ پرەزيدەنتى بولعان لەح كاچينسكييدىڭ وتە كورەگەن ساياساتكەر بولعانىن ايتادى. لەح كاچينسكيي 2008 جىلدىڭ وزىندە -اق رەسەي بولاشاقتا ءبىرقاتار ەلدەرگە  ۇلكەن قاتەر توندىرەتىن ايتقان. «الدىمەن گرۋزيا، سوسىن ۋكراينا رەسەيدىڭ باستى قارسىلاسى اتانادى، اتالعان ەكى ەلدىڭ ءبىراز بولىگى رەسەيگە قاراۋى مۇمكىن. ودان كەيىنگى ورىندا بالتىق جاعالاۋى ەلدەرى، اتاپ ايتقاندا، لاتۆيا، ليتۆا، ەستونيا تۇر»،– دەگەن كاچينسكييدىڭ مالىمدەمەسىن ەشكىم ءالى ۇمىتا قويعان جوق.  كاچينسكييدىڭ بولجامىنا سەنسەك، «بولاشاقتا اتالعان ءۇش ەلدەن كەيىن رەسەي  پولشانىڭ قاۋىپسىزدىگىنە قاتەر  تونەدى».

پولشا ساراپشىسىنىڭ ايتىپ وتىرعانىندا دا جان بار سەكىلدى. جالپى مۇنداي پىكىردى وسىدان ءبىراز ۋاقىت بۇرىن نەمىس ساراپشىلارى دا ايتقان. ولاردىڭ ويىنشا، «شىن مانىندە ءقازىر ەۋروپادا رەسەيدىڭ  ساياساتىن الدىن الا  سالماقتاي الاتىن، مىقتى ساياساتكەر  پرەزيدەنت جوق. ساراپشىلار تەك قانا اقش، رەسەي جانە جۇڭگو مەن ءۇندىستاننىڭ ساياساتتاعى ارا سالماعىن  ساراپتاۋمەن عانا اينالىسادى. ال ەۋروپاعا ماسكەۋدەن ءقاۋىپ ءتونىپ كەلە جاتقانىن ەشكىم پايىمدامايدى».