مەكتەپكە تاجىريبەدەن وتۋگە كەلگەن ستۋدەنت قىزدار جابىلىپ ءجۇرىپ وقۋشىنى ساباپ تاستادى. وقيعا پاۆلودار قالاسىنداعى ءبىلىم مەكەمەلەرىنىڭ بىرىندە بولعان. زارداپ شەككەن سەگىزىنشى سىنىپ وقۋشىسىن بولاشاق ۇستازدار مەكتەپتىڭ ىشىندە سوققىعا جىعىپتى. ابىروي بولعاندا اراعا دەنەشىنىقتىرۋ ءپانىنىڭ ءمۇعالىمى ءتۇسىپ، اجىراتىپ العان كورىنەدى. بويجەتكەن قىزداردىڭ وزدەرىنەن كىشى وقۋشىعا نەگە سونشا وشىككەن؟ جالپى سوڭعى كەزدەرى جاسوسپىرىمدەردىڭ تاراپىنان بايقالاتىن مۇنداي قاتىگەزدىك پەن وزبىرلىققا نە سەبەپ؟ بۇل تۋرالى ەۋرازيا ءبىرىنشى ارناسى حابارلايدى. 

سەگىزىنشى سىنىپتا وقيتىن داريا دەنەشىنىقتىرۋ پانىنە بارعاندا ولارعا تاجىريبەدەن وتۋگە كەلگەن ستۋدەنتتەر ساباق بەرەتىنىن بىلەدى. ونىڭ سوزىنشە، بويجەتكەندەر وقۋشىلاردى مازاق ەتىپ، تەلەفوندارىنا بەينەجازبا ءتۇسىرىپتى. سوڭىنان كيىم اۋىستىراتىن بولمەگە بارعاندا تورتەۋى دارياعا كەلىپ، ونىڭ وزدەرىنە دەگەن كوزقاراسى ۇناماعانىن ايتىپ سوقتىعا باستايدى. ورنىنان تۇرا الماي قالعانشا تاياق جەگەن سىنىپتاسىن كورگەندەر قورىققانىنان ەشتەڭە ىستەي الماپتى.

«بۇل وقيعا تۋرالى ەستىپ بىلگەندە تاڭ قالدىم. ەش كىناسىز مەنىڭ بالامدى ەرمەك ءۇشىن ابدەن سوققىنىڭ استىنا العان. ولاردى جاپ-جاس ستۋدەنتتەر دەپ اياۋشىلىق جاساعانىن قالامايمىن. ءادىل جازا تاعايىندالۋى كەرەك» - دەيدى زارداپ شەگۋشى ۆلاديمير حراپوۆ.

مەكتەپ وقۋشىسىن ساباپ تاستاعان قىزداردىڭ بارلىعى وڭىردەگى ينوۆاسيالىق كوللەدجدىڭ ستۋدەنتتەرى ەكەن. ولاردىڭ قولىنان تاياق جەگەن قىزدىڭ اتا-اناسى بۇل وقيعاعا قاتىستى ارىز جازىپ، ءىس سوتقا وتكەن. ءبىراق ولار ستۋدەنتتەرگە قاتىستى قىلمىستىق ءىستىڭ قوزعالماي وتىرعانىنا نارازىلىق بىلدىرۋدە. ال مەكتەپ باسشىلىعى «بۇل جاعدايدان ۇلكەن ساباق الدىق»،- دەيدى. 

«ورىن العان وقيعا ءبىز ءۇشىن ۇلكەن ساباق بولدى. بۇدان كەيىن ءبىز ءبىلىم مەكەمەسىمەن حابارلاسىپ، ءار ءتالىم الۋشىعا تالىمگەر تاعايىنداۋدى جانە كۇنى بويى سول تالىمگەردى باقىلاپ وتىرۋدى قولعا الماقپىز»، - دەيدى №43 مەكتەپتىڭ ديرەكتورى سامال اۋباكىروۆا.

بولاشاق پەدوگوگتار ءبىلىم العان كوللەدجدىڭ باسشىلىعى بولسا، ستۋدەنتتەر جىلدىڭ سوڭىندا وقۋ ورنىنان شىعارىلاتىنىن مالىمدەپتى. ءبىراق ءبىلىم وردالارىنداعى قاتىگەزدىك پەن الىمجەتتىك مۇنىمەن بىتپەيدى. اقتوبە وبلىسىندا العا قالاسىنداعى مەكتەپتەردىڭ بىرىندە وقيتىن جوعارى سىنىپتىڭ ەكى وقۋشىسى توبەلەسىپ قالعان. سوراقىسى، جاسى كىشىسى وزىنەن ءبىر سىنىپ جوعارى وقيتىنىن ءولىمشى قىپ ساباپ، بوتەلكەمەن باسىنان ۇرىپ، جاراقاتتايدى. قان-جوسا بولعان قىز ەسىنەن تانىپ قۇلاپ، ساياباقتا جاتقان جەرىنەن جەدەل جاردەم كولىگى الىپ كەتىپتى. 

«قىزىم قۇلاپ بارا جاتىپ، توبەلەستى شىعارعان قىزعا دوعار دەگەنىنە قۇلاق اسپاي، ۇرا بەرگەن. قولىنا تۇسكەن بوتەلكەمەن باسىنان ۇرعاندا شىتىناپ، قاسىنان قۇلاعىنا دەيىن جىرىپ كەتكەن. تىرتىقتىڭ ءىزى ءالى بار، 10 سم. وز-وزىنە ءالى كەلە الماي ءجۇر، تەك ءدارىنىڭ كۇشىمەن ءجۇرمىز. مەن قىزىمدى اياۋسىز ۇرىپ-سوققان وقۋشىنىڭ جازالانۋىن تالاپ ەتەمىن!» - دەيدى زارداپ شەككەن وقۋشىنىڭ اناسى يرينا سامارسكايا.

قىزداردىڭ جۇدىرىقتاسۋىنا ۇرلانعان سىرعا سەبەپ بولىپتى. توبەلەستەن بىرەر كۇن بۇرىن تاياق جەپ قالعان قىز اۋلادا ويناپ جۇرگەن 5 جاسار ءبۇلدىرشىننىڭ التىن سىرعاسىن شەشىپ العان. ول بولعان جايتتى كورشىنىڭ قىزىنا ايتادى. وسىلايشا، ول كىشكەنتاي قىزدى رەنجىتكەن تانىسىن «اڭگىمەلەسۋ» ءۇشىن ساياباققا شاقىرعان ەكەن. ال اناستاسيا زاگليادوۆا بولسا، بالاسىنىڭ قۇلاعىنان سىرعاسىن سىپىرىپ العانى ءۇشىن وقۋشى قىزدىڭ وتباسىنان مورالدىق شىعىن تالاپ ەتەتىنىن ايتتى. ويتكەنى، بەس جاسار قىز وسى وقيعادان كەيىن ۇيىقتاي الماي، مازاسىزداناتىن بولىپتى. 

«گوپ-ستوپ دەيتىن با ەدى مۇندايدى؟ بارىپ تۇرعان باسسىزدىق عوي؟! قىزىمنىڭ قۇلاعىمەن قوسا جۇلىپ الماعانىنا شۇكىر. مەن مورالدىق شىعىن تالاپ ەتەمىن، قىزىما پسيحولوگتىڭ كومەگى كەرەك» - دەيدى العا قالاسىنىڭ تۇرعىنى اناستاسيا زاگليادوۆا.

مەكتەپتەگىلەر ەكى قىزدىڭ دا وقۋ ۇلگەرىمى ورتاشا ەكەنىن ايتىپ وتىر. ءقازىر ەكەۋى ينسپەكتورلاردىڭ باقىلاۋىندا. مەكتەپ ديرەكتورى قىزداردىڭ «تۇزدەگى قىلىعىنا» وتباسىنداعى تاربيەسى دە اسەر ەتەتىنىن ايتادى.

«اتا-انالارىنا ايىپپۇل سالۋ ۇسىنىلدى. بۇل بالالاردى باقىلاۋعا الۋ ۇسىنىلدى. سول ساتتەن باستاپ، كۇنبە-كۇن ساباقتارىن ءۇزىپ جاتقان جوق. جالپى ەكەۋىنىڭ دە وقۋ ۇلگەرىمدەرى جامان ەمەس» - دەيدى العا قالاسىنىڭ №4 ورتا مەكتەپ ديرەكتورى ءابدىمۇرات كورگۋلين.

ءقازىر الەۋمەتتىك جەلى مەن ۆيدەوحوستينگتەردە جاسوسپىرىمدەردىڭ وسىنداي ىس-ارەكەتى تولعان بەينەجازبالار تولىپ جۇر. ءبىر تاڭقالارلىعى، ونىڭ كوبىندە نازىك جاندىلاردىڭ بولۋى ويلانتارلىق.  سولاردىڭ ءبىرى، مىنە، مىناۋ. 

كادردان ءبىر توپ قىزدىڭ قورعانسىز جاندى باسى-كوزىنەن توپەلەپ، بالاعاتتاپ جاتقانىن كورۋگە بولادى. اشۋعا بۋلىققانداردىڭ ءبىرى ءتىپتى قولىنا قايشى الىپ، ونىڭ شاشىن قيىپ تاستاعان. سودان كەيىن جەردە جاتقان زارداپ شەگۋشىنى اياماي تەپكىلەيدى. جەلى قولدانۋشىلارىنىڭ جازۋىنشا، وقيعا بايقوڭىردا بولعان كورىنەدى. ال ىشكى ىستەر مينيسترلىگى ينتەرنەتتى شارلاپ كەتكەن ۆيدەونى ءجىتى تەكسەرىپ، ءبارىنىڭ نىسپىسىن انىقتاپ جاتقانىن حابارلادى.